Bug-os nga Pagkuhag Kaayohan Gikan sa 1993 “Balaang Pagpanudlo” Distritong Kombensiyon
1 “Tudloi ako, O Jehova.” (Sal. 86:11) Kini ang angay nga mainitong pangamuyo sa tanang dedikadong alagad sa Diyos. Kita determinado nga dili gayod mohunong sa pagkat-on ug dili gayod mohunong sa pagpadapat kon unsay atong nakat-onan. May mga panahong gikinahanglan nato nga mapaangay pag-usab, ug ingon sa gibuhat sa salmista, kita nanginahanglang mohangyo sa Diyos sa paghiusa sa atong kasingkasing aron nga dili kini mabahin. Ang programa sa “Balaang Pagpanudlo” Distritong Kombensiyon magtaganag mapuslanong pagpanudlo ug pagpasibo nga atong gikinahanglan aron makaalagad kang Jehova nga matinumanon taliwala sa mga pagpit-os niining sistema sa mga butang.
2 Upat-Adlaw nga Kombensiyon: Ang programa igapresentar diha sa 36 ka dapit sa tibuok Pilipinas. Ang tulo niining mga kombensiyona maoy dinhi sa Metro Manila ug pagahimoon sa Nobyembre 4-7, 1993, samtang ang ubang 33 pagahimoon sa kataposan sa Disyembre ug sayo sa Enero. Ang programa magsugod sa Huwebes sa 1:20 s.h. ug matapos sa Domingo sa mga 4:15 s.h. Matikdi: Ang programa sa tanang 36 ka dapit managsama ra, lakip na ang dinhi sa Manila. Ang kalainan lamang mao ang presensiya sa langyawng mga delegado dinhi sa Manila.
3 Unsa man ang giandam alang kanato? Usa ka dagayang solidong espirituwal nga pagkaon ang ipresentar sa nagkadaiyang paagi: mga pakigpulong, mga pasundayag, mga interbiyu, ug duha ka drama. Ayawg sipyata ang bisan hain niining mahinungdanong instruksiyon! Dugang pa, ginadahom nato ang pakighimamat sa daang mga kaila ug paghimog daghang bag-ong higala. Ang mga misyonaryo nga nag-alagad sa langyawng mga asaynment mahimong motambong sa inyong kombensiyon. Pahimusli ang kahigayonan sa pag-ilaila niining matinumanong mga igsoong lalaki ug babaye. Kon ikaw usa ka ginikanan, ilakip ang imong mga anak sa panaghisgotanay. Ang mangayaon ug nagasakripisyo-kaugalingong espiritu niining mga misyonaryoha mahimong magpahilunag pasukaranan sa imong mga batan-on nga mamalandong sa usa ka karera sa bug-os panahong pag-alagad.
4 Dad-on Mo ba ang Tibuok Ikapulo Ngadto sa Balay Tipiganan? Sa Malaquias 3:10, si Jehova misaad sa mga Israelita nga kon sila andam nga ibutang siya sa pagsulay ug dad-on ang tibuok ikapulo ngadto sa balay tipiganan, siya magabubo ug panalangin hangtod wala nay panginahanglan pa.
5 Alang sa pipila, ang pagbutang kang Jehova sa pagsulay nagakahulogan sa pagduol sa ilang amo sa labing sayong maarangan aron paghangyog bakasyon o panahon nga makabiya para makatambong sa kombensiyon. May mga panahon ang mga igsoon nagpanuko sa pagbuhat niini, nga nagahunahunang ang ilang amo dili gayod mohatag ug pagtugot kanila sa pagtambong ug kombensiyon. Bisan pa niana, sa mga butang nga wala maglangkit sa espirituwal nga mga butang, mahimong sila diyutay ra o dili maglisod sa pagpahibalo sa ilang amo kon unsay buot nilang buhaton.
6 Angay natong suknaon ang kaugalingon: Kon ang usa ka minahal nga higala magminyo sa laing dapit, dili ba nato duolon ang atong amo ug mohangyog panahon nga di-motrabaho aron makatambong sa kasal? Ug kon siya daw magapanuko, dili ba matinahoron natong ipatin-aw kon unsa gayod ang kahulogan alang kanato nga makaadto? Seguradong labaw nga mahinungdanon ang pagkanatudloan ni Jehova kay sa pagtambong sa usa ka kasal! Kon kita nakombinser gayod nga ang programa sa kombensiyon mahinungdanon sa atong espirituwal nga pagtubo, mas masayon unya ang pagkombinser sa atong amo sa pagtugot natog panahon nga di-motrabaho aron makatambong sa kombensiyon.—Sant. 1:7, 8.
7 Sa Israel ang ikapulo nag-apil sa materyal nga suportar sa dapit sa pagsimba kang Jehova. Sa atong adlaw ang ikapulo nagarepresentar sa panahon, kusog, ug mga galastohan nga diretsong gigamit sa pag-alagad kang Jehova ug sa pagsuportar sa buluhaton sa Gingharian. Ang ikapulo nagalakip sa panahon nga atong gigugol sa mga tigom, mga asembliya, ug mga kombensiyon, maingon man usab sa pagmentinar ug paghinlo sa atong mga dapit tigomanan. Ang “Balaang Pagpanudlo” Distritong Kombensiyon maghatag kanatog daghang kahigayonan sa pagdala sa tibuok ikapulo ngadto sa espirituwal nga balay tipiganan ni Jehova. Unsa man ang pipila niini?
8 Atong madala ang ikapulo pinaagig pagkamapatalinghogon sa programa sa kombensiyon, pinaagig mainitong pagpakig-ambit sa pag-awit matag alawiton sa Gingharian, ug pinaagig maampingong pagpamati sa kada pag-ampo, aron atong ikadugang ang atong kinasingkasing nga amen.
9 Ang atong pag-uswag sa kamatuoran nagadepende sa dakong gilapdon kon giunsa nato pagpatalinghog. Sa usa ka dakong awditoryom o estadyom, maoy sayon lamang nga malinga pinaagig ginabuhat sa uban libot kanato, ug tungod nianang katarongana kinahanglang itumong nato kanunay ang atong mga panghunahuna. Paneguroang moabot sa kombensiyon nga bug-os nga nakaandam, uban sa imong Bibliya, songbok, igsusulat ug papel-sulatanan, ug ang gula sa Ang Bantayanang Torre nga tun-an nianang semanaha. Makatabang ang paghimog mga nota sa mga punto ug mga kasulatang gigamit sa kada mamumulong. Hupting mubo ang mga nota; ang pagkuhag daghan kaayong nota makabalda sa konsentrasyon. Ang mga batan-on usab kinahanglang bansayon sa pagkamapatalinghogon. Ang mga anak makadala sa ikapulo kauban sa ilang mga ginikanan pinaagig suod nga pagsunod sa programa segon sa mahimo.
10 Ang pipila ka ginikanan magahikay ug hilom nga panahon sa balay ug hilom nga panahon kada adlaw sa dihang ang ilang mga batan-on gidahom nga magbasa o motan-aw sa mga hulagway sa usa sa mga basahon sa Sosyedad. Kining maayong pagbansay mas makapasayon alang sa mga anak sa paglingkod nga hilom sa panahon sa mga tigom ug mga kombensiyon. Ang mga ginikanan nga nakapatunghag maayog panig-ingnan nga mga anak miingon nga wala gayod sila magtugot sa ilang mga batan-on nga magdalag mga dulaan o mga librong koloranan ngadto sa mga tigom. Bisan ang batan-on pa kaayong mga anak makakat-on nga ang hinungdan sa pagtambong sa mga tigom mao ang pagsimba kang Jehova. Ang mga ginikanan nga magtudlo sa ilang mga batan-on kon unsay kahulogan alang kanila sa pagdala sa tibuok ikapulo ngadto sa balay tipiganan pagadayegon gayod!
11 Kita usab makadala sa ikapulo pinaagig pagbulontaryo sa atong panahon ug kusog sa pag-abag sa organisasyon sa kombensiyon. Sa kadaghanang dapit ang una pa sa kombensiyon nga pagpanghinlo gieskedyol mga usa o duha ka adlaw una pa magsugod ang kombensiyon. Kon nagpuyo ka sa duol, nganong dili hikayon ang tibuok pamilya nga makigbahin? Ang pipila ka igsoon nagkuyog sa ilang mauswagong mga estudyante sa Bibliya aron nga bisan una pa sa ilang bawtismo kini nga mga bag-ohan makakat-on kon unsay nalangkit sa pagsuportar sa pagsimba kang Jehova. Adunay daghang mabuhat aron pagseguro nga ang kombensiyon hapsay nga magalihok. Nganong dili mobulontaryo ingong pamilya?
12 Ang atong suportar sa panalapi sa kombensiyon maoy laing paagi sa pagdala sa atong ikapulo. Sa paglaraw kon sa unsang paagi ang materyal nga mga gasa himoon sa pagsuportar sa putling pagsimba, si Jehova misugo sa nasod sa Israel: “Walay mausa nga moatubang kang Jehova nga walay dala. Ang gasa nga anaa sa kamot sa kada usa kinahanglang kaangay sa panalangin nga gihatag kanimo ni Jehova nga imong Diyos.” (Deut. 16:16, 17) Bisan kon ang katawhan nakaarang sa paghatag ug daghan o diyutay, ang ilang halad, nga giandam nga abante, nakapahimuot kang Jehova. Sa susama, daghang igsoon ang nagahatag ug mainampoong panghunahuna sa amot nga ilang himoon, bisan pinaagig kuwarta o tseke. Gitugotan ba nimo sukad ang imong gagmayng mga anak sa paghulog ug amot diha sa kahon?
13 Pasidunggi ang Pagtulon-an sa Atong Manluluwas, ang Diyos: Pinaagi sa atong maayong pamatasan ug atong maayong panggawi, kita “makadayandayan sa pagtulon-an sa atong Manluluwas, ang Diyos, sa tanang butang.” (Tito 2:10) Sa laing pagkasulti, diha mismo sa kombensiyon, atong ikapakita nga ang balaang pagpanudlo ginapadapat sa atong mga kinabuhi.
14 Kumosta na man ang atong mga pamatasan? Ang konsiderasyon alang sa uban maoy talagsaon karong adlawa sa kalibotan. Apan ang katawhan ni Jehova, nga nagiyahan pinaagig Kasulatanhong mga prinsipyo, nagahunahuna, dili sa ilang kaugalingong kaayohan, apan sa kaayohan sa ilang isigkatawo. (Filip. 2:4) Kita mabalak-on sa uban libot kanato. Dili kita manukmod o mangwakli sa dihang magalinya alang sa pagkaon o sa mga basahon. Kita matinagdanon sa tigulang ug sa gagmayng mga bata nga mahimong nagahulat diha sa linya uban sa ilang mga ginikanan ug nga dali rang iwakli sa mga hamtong nga wala makamatikod kanila. Sa mga restawran kita matimbayahon ug matinahoron sa mga tagdumala, dili haras o mapugsanon kon ang serbisyo wala motakdo sa atong ginadahom.
15 Ang atong diyosnong panggawi adunay tinuod nga gibug-aton niadtong anaa sa palibot nato. Sa usa ka siyudad sa kombensiyon sa miaging tuig, usa ka polis nga nag-alagad sulod na sa 21 ka tuig nakasulti niini: “Ako nakadayeg sa disiplina sa inyong mga tawo. [Sila maoy] talagsaon; sila mamunit sa basura nga walay nagsugo kanila ug sila mahapsay ug ang inyong kombensiyon organisado kaayo.” Siya midugang: “Sa dihang ang inyong mga tawo makakita namo, sila mopahiyom. Kana maoy maayong ilhanan. Gipangita namo kana. Kana maoy ilhanan sa pagkamahigalaon ug walay bisan unsang gitago. Ug amo usab nga namatikdan kon sa unsang paagi ang mga bata anaa sa ilang mga ginikanan ug disiplinado kaayo. Tuohi ko, ako nakadayeg. Makalilipay ang pagkanatudlo dinhi.”
16 Ikaw ba sa personal magadayandayan sa pagtulon-an sa atong Manluluwas, ang Diyos, pinaagi sa imong maayog panig-ingnan nga panggawi? Ania ang pipila ka paagi nga mahimo kini:
Senina ug Pamostura: Sa panahon nga kita magatambong ug kombensiyon, dili nato angayng isipon ang atong kaugalingon nga anaa sa bakasyon. Hinunoa, kita magapresentar sa atong kaugalingon kang Jehova aron matudloan niya. Sanglit mao man kana ang kahimtang, dili ba angay tang manapot sama nianang nagatambong ta sa mga tigom sa Kingdom Hall? (1 Tim. 2:9, 10) Dugang pa, kinahanglang hatagan tag maampingong panghunahuna kon unsa ang atong isul-ob human nga matapos ang mga sesyon. Sa dihang mopauli sa atong mga sak-anan, angay ba alang kanato nga ilisan ang atong kasarangan, ligdong nga panapot sa kombensiyon sa senina nga maghatag kanatog nagakagidlay nga panagway sa mga kalibotanon? Dili ba kini makahatag ug impresiyon nga ang atong mga senina sa panagkatigom maoy senina sa usa lamang ka panahon inay nga usa ka banaag sa atong paagi sa kinabuhi? Hinumdomi, kita nagadala sa ngalan ni Jehova, ug ang matag usa nato kinahanglang magtino nga walay ikapatunghang makataronganong sumbong batok sa dalan sa kamatuoran.
Ang mga kandidato sa bawtismo angayng pahinumdoman nga dili tukma alang nianang sagradong okasyon nga magsul-ob ug mga kamisen nga may kalibotanong mga panultihon, mga pagya, o propaganda sa negosyo. Angay nga paneguroon sa mga ansiyano nga ang mga pangutana sa bawtismo narepaso pag-ayo nga abante ug nga ang kada kandidato nasultihan sa hustong panahon kon siya nauyonan ba alang sa bawtismo o wala. (Sa dihang magrepaso sa mga pangutana, mahimong kini maoy tukmang panahon sa paghatag ug mga sugyot mahitungod sa husto, kasarangang panapot alang sa bawtismo.) Dili na kinahanglan alang sa mga kandidato sa bawtismo nga giuyonan na sa mga ansiyano nga magparehistro didto sa kombensiyon.
Paghupot nga Mahinlo sa Atong Palibot: Ingon sa gihisgotan nga mas sayo pa, daghan ang mikomento sa kahinlo sa katawhan ni Jehova sa mga kombensiyon. Huptan nato kanang maong hataas nga suntoan, nga dili magsalibay ug papel, mga putos sa kendi, o ubang sudlanan, diha sa salog. Una pa mobiya sa pagkagabii, tan-aw sa palibot sa inyong mga lingkoranan ug punita ang bisan unsang basura nga anaa sa palibot ug mahimong isulod kana sa tukmang mga sudlanan sa basura o dalhon kana sa balay aron didto kana idespatsar. Hinumdomi nga ang convention hall mao ang atong Kingdom Hall sulod sa upat ka adlaw ug kinahanglang tratahon ingon sa atong gibuhat sa atong lokal nga Kingdom Hall.
Sekular nga Trabaho: Kita motambong sa kombensiyon aron pagkuhag espirituwal nga pagkaon. Busa dili kana maoy panahon sa paghimog sekular nga trabaho o mangitag bisan unsang ganansiya sa panalapi, nga magpahimulos sa dakong panon nga manambong. Sa makausa pa buot namong pahinumdoman ang tanan nga walay baligya sa personal nga mga gamit ang tugotan sa sulod sa mga nataran sa kombensiyon, ug ang mga gamit lamang sa Sosyedad ang tugotan diha sa bookroom o ubang mga departamento sa kombensiyon.
Mga Himan sa Recording: Samtang gitugotan man ang video nga mga kamera, kami nasayod nga magmatinagdanon kamo sa uban. Maoy dili mahigugmaon nga mag-ali sa panan-aw sa mga isigka-kombensiyonista samtang magalilas sa programa. Kon ikaw hilom nga makarekord gikan sa imong lingkoranan, walay kasupakan sa pagbuhat mo niana. Palihog hinumdomi, hinunoa, nga walay mga kamera o rekording nga mga himan ang ikonektar ngadto sa elektrikal o sound systems sa kombensiyon, ni ibutang ang himan diha sa mga agianan o mga dapit trapiko.
Lingkoranan: Palihog hupti sa hunahuna nga ang MGA LINGKORANAN IKARESERBA LAMANG SA SUOD NGA MGA MEMBRO SA IMONG PAMILYA UG SI BISAN KINSA NGA NAGABIYAHE UBAN KANIMO SA IMONG SAKYANAN. Palihog nga magmatinagdanon sa mga tigulang. Sa nangaging panahon, ang pipila ka mas edarang igsoon kinahanglang mangitag mga lingkoranan sa di-kombeniyenteng mga dapit tungod kay ang mga mas batan-on nagpuno na sa mga lingkoranan diha sa seksiyon nga gireserba alang sa mga tigulang.
Personal nga mga Gamit: Gisugyot nga limitehan nimo ang bisan unsang personal nga mga gamit nga imong dalhon sa kombensiyon. Kon ang usa ka gamit dili maigo sa ubos sa imong lingkoranan, mas maayo tingaling ibilin kana sa balay o diha sa sulod sa sakyanan. Ang dagkong mga gamit dili tugotan diha sa mga agianan tungod sa kahilwasan nga mga katarongan, ug kon kini ibutang sa ibabaw sa lingkoranan tapad nimo, may usa nga mahikawan ug lingkoranan.
17 Sa mahigugmaong pagtagad sa uban, planoha ang sayong pag-abot kada adlaw, ilabina sa Huwebes nga maorag mas dugay kay sa kasagaran ang pagpangitag maparkingan ug lingkoranan.
18 Pagkadako natong pribilehiyo nga matudloan ni Jehova! Ang paggamit nato sa atong panahon, kusog, ug materyal nga mga kahinguhaan aron pagsuportar sa “Balaang Pagpanudlo” Distritong Kombensiyon niining tuiga mosangpot sa malungtarong espirituwal nga mga benepisyo sa atong kaugalingon ug sa atong mga pamilya.
Distritong Kombensiyon nga mga Pahinumdom
BAWTISMO: Ang mga kandidato sa bawtismo kinahanglang anaa na sa ilang mga lingkoranan diha sa tinudlong dapit una pa magsugod ang programa sa Sabado sa buntag. Ang kasarangang humdonon ug usa ka tuwalya kinahanglang dalhon sa usa nga nagaplanong magpabawtismo. Human sa pakigpulong sa bawtismo ug pag-ampo sa mamumulong, ang tsirman sa sesyon mohatag ug mubong mga instruksiyon sa mga kandidato sa bawtismo ug unya magpaawit ug usa ka awit. Human sa kataposang laray, ang mga attendants motultol sa mga kandidato sa bawtismo ngadto sa dapit bawtismohanan o sa mga sakyanan nga mohatod kanila didto. Sanglit kay ang bawtismo nga simbolo sa pagpahinungod sa usa maoy usa ka suod ug personal nga butang tali sa indibiduwal ug kang Jehova, walay kahikayan alang sa gitawag magkaubang pagbawtismo sa duha o kapin pang mga kandidato sa bawtismo nga magginaksanay o maggunitay sa mga kamot samtang bawtismohan.
PAGBULONTARYO: Ang bulontaryong tabang gikinahanglan alang sa mahapsay nga pagpadagan sa usa ka distritong kombensiyon. Kon ikaw makaabag, palihog sa pagreport ngadto sa Volunteer Service Department sa kombensiyon. Ang mga kabataan nga ubos sa 16 anyos ang edad makaamot usab sa kalamposan sa kombensiyon, apan gikinahanglan silang motrabaho uban sa usa ka ginikanan o laing responsableng hamtong.
LAPEL CARDS: Palihog itaod ang espesyal pagkadesinyong ‘lapel card’ sa kombensiyon ug samtang nagabiyahe ngadto ug gikan sa dapit sa kombensiyon. Kini sagad makapaarang kanato nga makahatag ug maayong pagpamatuod samtang nagabiyahe. Ang ‘lapel card’ kinahanglang kuhaon pinaagi sa inyong kongregasyon, kay kini dili man mabatonan sa mga kombensiyon.
ESPESYAL NGA MGA MITING: Ang usa ka miting himoon uban sa tanang regular ug espesyal nga mga payunir ug nagapanawng mga magtatan-aw sa 11:15 s.b. sa Biyernes sa tanang kombensiyon sa probinsiya, samtang ang usa ka miting uban sa tanang ansiyano ug ministeryal nga mga alagad himoon sa 11:15 s.b. sa Sabado. Ang mga lokasyon niining mga mitinga ipahibalo sa entablado. Kining mga mitinga dili himoon sa mga kombensiyon sa Metro Manila.
PIONEER IDENTIFICATION: Ang tanang regular ug espesyal nga payunir ug nagapanawng mga magtatan-aw magdala gayod sa ilang Identification and Assignment nga kard (S-202) ngadto sa kombensiyon. Ang mga payunir nga anaa sa listahan sukad sa Hulyo 1, 1993 o una pa nianang petsaha makadawat ug ₱100.00 nga bili sa mga tiket sa kombensiyon sa dihang ilang ipakita ang ilang ID nga kard nianang usa ka kombensiyon lamang.
PAHIMANGNO: Bisan diin kamo motambong, bantayi ang inyong mga butang sa tanang panahon. Kon kamo adunay sakyanan, paneguroang kini nakandadohan ug ayaw ibilin ang bililhong mga butang sulod sa giparking nga sakyanan. Usab, pagbantay batok sa mga mangunguot, kinsa modugok sa dagkong mga panagkatigom. Kini nagalakip sa dili pagbiya sa bisan unsang bililhong butang nga dili mabantayan sa mga lingkoranan sa kombensiyon. Palihog magmabinantayon.