Bag-ong Sirkitong Asembliyang Programa
1 Sa pagsugot sa mga pulong ni Jesus sa Mateo 6:33, ang matuod nga mga Kristohanon kanunayng naghupot sa Gingharian nga una sa ilang mga kinabuhi. Busa, ang “Padayong Pangitaa Pag-una ang Gingharian” maoy tukmang tema alang sa sirkitong asembliyang programa nga magsugod sa Pebrero, 1994.
2 Gikan sa sinugdan ang programa magpatugbaw sa katinuoran sa Gingharian, nga nagapasiugda nga kini maoy nagalihok nga gobyerno nga may usa ka dominyo, mga magmamando, mga sakop, ug mga balaod. Sa tinuod, daghang balaod sa tawhanong mga gobyerno nga nakaayo sa katilingban karon maoy pinasukad sa mga balaod sa Bibliya. Sukad sa 1914 atong nakita ang mga epekto sa Gingharianong kagamhanan diha sa mga ginsakopan niini, nga karon anaa na sa 229 ka nagkalainlaing dapit sa yuta.
3 Ang panalipod ug mga panalangin nga atong madawat tungod sa pag-una sa Gingharian sa tanang bahin sa atong mga kinabuhi pagatagdon. Ang mapuslanong tambag igahatag sa pagpakita kon sa unsang paagi malikayan nato ang wala-kinahanglanang kabalaka. Ang mga pakigpulong, mga pasundayag, ug mga panaghisgot magapakita kon nganong mahinungdanon kaayong magbaton ug yanong mata.
4 Sa Sabado sa asembliya, ang takos nga mga kandidato sa bawtismo maghimog publikong pagpahayag sa ilang dedikasyon kang Jehova. Ug sa Domingo, kitang tanan buot nga maanaa alang sa pahayag publiko, nga nagaulohag “Kon Unsay Pagabuhaton sa Gingharian sa Diyos Alang sa Katawhan.”
5 Paneguroang planohon nimo nga maanaa gayod sa duha ka adlawng sirkitong asembliya, ug dapita kadtong gidumalahan nimo ug mga pagtuon sa Bibliya nga makatambong usab. Ang inyong magtatan-aw sa sirkito magapahibalo kaninyo sa mga petsa alang niini sa nagakaigong panahon. Ang programa sa asembliya, dinuyogan sa makapahimuot nga inigsoong panag-ubanay, magataganag makapalig-on ug makapahayahay nga pagdasig nga dili gayod buot sipyaton ni bisan kinsa kanato.