1996 “Mga Mensahero sa Diyosnong Pakigdait” Distritong Kombensiyon
1 Ang programa sa distritong kombensiyon niining tuiga makatabang gayod kanato sa pagmentinar sa atong diyosnong pakigdait, ug magsaysay kini sa atong papel sa pagtabang sa uban nga makaplagan ang maong pakigdait. Ingon sa gipahibalo sa Septiyembre 1996 nga Atong Ministeryo sa Gingharian, ang tema maoy “Mga Mensahero sa Diyosnong Pakigdait.” Nakahimo ka na ba sa imong mga plano aron dili malaktawan ang bisan hain sa programa?
2 Tulo ka Adlaw nga Programa: Maylabot sa “Malipayong mga Magdadayeg” Distritong Kombensiyon sa miaging tuig, ang usa nga mitambong miingon: “Pagkamalipayon nato nga nakagahin ug tulo ka talagsaong adlaw sa malinawon, nahiusang panag-ubanay, nga nanagdayeg kang Jehova! Ang atong kombensiyon nagpamatuod nga kita nagakinabuhi sa usa ka matahom nga espirituwal nga paraiso. Kita sa pagkatinuod adunay katarongan nga mosuliyaw sa kalipay bisan niining gisamok nga kalibotan.” Kami nasayod nga ikaw usab malipay sa bug-os sa kombensiyon niining tuiga ug mopauli uban ang nabag-ong kusog. (2 Cron. 7:10) Aduna na usab kitay tulo ka adlaw nga programa. Nakahimo ka na ba ug mga kahikayan sa pagpalta sa sekular nga trabaho aron makatambong ka sa tibuok nga yugto? Sa tumoy niini nga pasukip mao ang mga petsa ug mga dapit sa 45 ka kombensiyon sa Pilipinas.
3 Ang programa magsugod sa Biyernes sa alas 8:30 s.b. ug matapos sa Dominggo sa mga alas 4:00 s.h. Sa Sabado, ang programa magsugod sa alas 8:30 s.b. ug sa Dominggo mosugod kini sa alas 9:00 s.b.
4 Ikaw ba Mapahait?: Human makutlo ang Proverbio 27:17 nga, “Pinaagig puthaw, ang puthaw usab mapahait,” ang Agosto 15, 1993, Bantayanang Torre miingon: “Kita samag mga instrumento nga kinahanglag regular nga bairon. Sanglit ang pagpahayag ug gugma kang Jehova ug paghimog mga desisyon pinasukad sa atong pagtuo nagkahulogan sa pagkahimong lahi gikan sa kalibotan, kita kinahanglang mosubay ug lahi nga dalan kanunay, pagaingnon pa, gikan sa dalan sa kadaghanan.” Unsaon nato pagpadapat ang maong tambag?
5 Angay kitang magpabiling lahi sa kalibotan. Ang kanunayng paningkamot sa pagpalampos niini angay nga mamentinar kon kita magmasiboton sa maayong mga buhat. (Tito 2:14) Mao nga ang artikulo sa Bantayanang Torre nga gikutlo sa ibabaw mipadayon sa pag-ingon: “Apan kon kita mahiuban sa mga tawong nahigugma kang Jehova, kita nagabaid sa usag usa—kita nagadasig sa usag usa sa paghigugma ug sa maayong binuhatan.” Ang distritong kombensiyon maoy usa sa mga tagana gikan kang Jehova sa pagtabang kanatong magpabiling hait sa espirituwal. Hinaot nga magmadeterminado kita nga motambong sa matag sesyon sulod sa tulo ka adlaw nga kombensiyon. Dili kita makatugot nga malaktawan ang bisan unsang bahin sa programa.
6 Ang Maalamong Tawo Maminaw: Wala kita mahimugso uban ang katakos sa pagpaminaw. Ang pagpaminaw maoy usa ka arte nga kinahanglang ugmaron. Gikaingon nga ang kasarangang tawo makahinumdom ug katunga lamang kon unsay iyang nadunggan. Sanglit nagakinabuhi kita sa panahon sa mga kabaldahan, mahimong malisod alang kanato ang pagpaminaw sa taas nga mga panahon. Masulayan ba natong pauswagon kini sa panahon sa kombensiyon? Kon hangyoon ka sa paghatag ug sumarya sa kada adlaw nga programa human makapauli gikan sa kombensiyon, makahimo ka ba niana? Unsaon natong tanan sa pagpauswag sa atong katakos sa pagpaminaw?
7 Ang maidlot nga kaikag kinahanglanon, kay ang atong memorya dili molihok pag-ayo kon wala kana. Hinunoa, nagadepende ug dako sa atong pagpatalinghog nga labaw pa kay sa kasagaran kon unsay atong madunggan. Unsa kahay nahitabo kon pipila ka pamilyang Israelinhon sa Ehipto niadtong 1513 W.K.P. wala kaayo maminaw sa mga instruksiyon sa Paskuwa? Ang Exodo 12:28 nag-ingon: “Ang mga anak sa Israel mibiya ug mihimo sumala sa gisugo ni Jehova kang Moises ug Aaron. Gihimo gayod nila ang ingon.” Ang pagtuman sa balaang mga instruksiyon nagkahulogan sa katunhayan sa mga panganay sa Israel. Ang atong maidlot nga kaikag ug pagkamatagdanon sa matag bahin sa programa sa kombensiyon magbutyag sa atong presenteng espirituwal nga kahimtang ug makaapektar sa atong umaabot nga mga kalaoman. Diha sa mga kombensiyon kita ginatudloan sa mga paagi ni Jehova ug ginahatagag mga instruksiyon sa pagpalampos sa nagaluwas-kinabuhing buluhaton. (1 Tim. 4:16) Hunahunaang usa ikaw ka barko sa gituyatuya-sa-bagyong kadagatan. Ang mga saad ni Jehova mao ang solidong angkla sa paglaom. Kon ang usa ka tawo di-maminaw ug tugotan ang iyang hunahuna sa pagkaanod, unsay mahitabo? Hayan malaktawan niya ang hinungdanong mga puntos sa talambagan nga makapugong kaniya gikan sa espirituwal nga pagkalunod.—Heb. 2:1; 6:19.
8 Sa daghang bahin sa kalibotan, ang atong mga igsoon naningkamot pag-ayo aron makatambong sa mga tigom. Makapahibulong ang pagkakita sa ilang tim-os nga pagtagad sa mga kombensiyon. Sa pipila ka dapit, hinunoa, ang mga indibiduwal nakabalda sa uban pinaagig pagsuroysuroy sa mga hawanan sa kombensiyon sa panahon sa mga sesyon. Ang uban moabot nga ulahi. Sa pipila ka miaging kombensiyon, nahimong lisod ang pagpaminaw sa unang pipila ka minutos sa programa gumikan kay daghan kaayong naglaroylaroy sa mga agianan. Kasagaran dili sila mga igsoon nga adunay mga asaynment sa trabaho o mga inahan nga nagaatiman sa mga panginahanglan sa ilang gagmayng mga anak. Ang kadaghanang disturbo naggikan sa mga tawong nanggitabi lamang. Niining tuiga ang Attendant Department mohatag ug dugang pagtagad sa suliran, ug hinaot unta nga ang tanan makalingkod na sa dihang ang tsirman modapit kanato sa pagbuhat niana. Pabilhan pag-ayo ang imong kooperasyon niining bahina.
9 Unsay praktikal nga mga sugyot nga makatabang kanato nga labi pang magmatinagdanon sa programa ug sa paghinumdom pa ug dugang kon unsay gipresentar? Ang mosunod hayan makatabang: (a) Hinumdomi ang pangunang katarongan sa pag-adto sa siyudad sa kombensiyon. Kini maoy, dili aron maglingawlingaw, apan sa pagpaminaw ug pagkat-on. (Deut. 31:12) Sulayi ang pagpahulay ug husto sa matag gabii. Kon moabot ka sa kombensiyon nga kapoy kaayo, ang konsentrasyon mahimong lisod. (b) Hatagig daghang panahon ang imong kaugalingon aron makalingkod na sa dili pa magsugod ang programa. Ang pagdalidali ngadto sa mga lingkoranan sa kataposang minutos moresulta nga imong malaktawan ang pipila ka pasiunang bahin. (c) Isulat ang mugbong mga nota sa pangunang mga puntos lamang. Ang sobrang pagsulat ug mga nota makabalda sa maayong pagpaminaw. (d) Sa dihang ipailaila ang bahin sa kombensiyon, isipa kana uban ang kahinam gayod. Pangutan-a ang kaugalingon, ‘Unsa may akong mahagdaw gikan niining bahina nga makapausbaw sa akong pagpabili ug gugma kang Jehova? Sa unsang paagi ang impormasyon makatabang kanako sa pagpasundayag sa bag-ong personalidad nga mas bug-os pa? Sa unsang paagi kini makatabang kanako sa pagpauswag sa akong ministeryo?’
10 Panggawi nga Nagadayandayan sa Atong Ministeryo: Gidasig ni Pablo si Tito nga ipakita ang iyang kaugalingon “nga panig-ingnan sa maayong mga buhat.” Pinaagig pagpasundayag ug kahinlo sa iyang pagpanudlo, si Tito makatabang sa uban nga “madayandayanan ang pagtulon-an sa atong Manluluwas, ang Diyos, sa tanang butang.” (Tito 2:7, 10) Matag tuig, makadawat kitag malulotong mga pahinumdom kon nganong ang diyosnong panggawi bililhon kaayo samtang kita nagabiyahe ngadto sa ug gikan sa kombensiyon, maingon man kon kita anaa sa mga hotel o mga restawran ug sa kombensiyon mismo. Sa miaging tuig nakadungog na usab kitag makapadasig-kasingkasing nga mga komento ug buot namong ipaambit kini kaninyo.
11 Ang manedyer sa usa ka hotel miingon: “Makapahimuot kanunay ang pagdawat sa mga Saksi tungod kay sila mapailobon, matinabangon, ug gibantayan nila pag-ayo ang ilang mga anak.” Usa ka desk clerk sa hotel miingon nga nakapahimo kini sa iyang trabaho nga “sayon kaayo dihang ang mga Saksi mosulod ug mogawas sa hotel sanglit kay, bisan kon maghulat sa paglinya, kanunay silang buotan, mainantoson, ug masinaboton.”
12 Sa laing bahin, ang mga ginikanan kinahanglang magbansay sa ilang mga anak aron makasabot nga ang Kristohanong panggawi wala matapos sa dihang kita mobiya sa pasilidad sa kombensiyon. Kinahanglang molungtad kinig 24 oras sa usa ka adlaw. Ang atong panggawi sa atong mga sak-anan, sa mga restawran, ug sa kadalanan kinahanglang sama ka dungganon sa dihang kita nagatambong sa mga sesyon.—1 Ped. 2:12.
13 Bisan tuod ang pagtaganag pagkaon gihunong sa atong mga kombensiyon, aduna gihapoy igoigong galastohan nga nalangkit sa pag-arkila sa pasilidad, pagtaganag mga sound system, ug pag-atiman sa uban pang mga panginahanglan. Ang atong boluntaryong mga donasyon magamit alang niini nga mga galastohan. Usa ka sister nga may tin-edyer nga kabataan mitambong sa kombensiyon nga limitado ang salapi. Bisan pa niana, siya ug ang iyang mga anak mihatag gihapon ug gamayng amot. Kon unsa may desisyon sa matag usa nga buhaton niining bahina maoy personal nga butang, apan kami nasayod nga imong gipabilhan ang maong mga pahinumdom.—Buh. 20:35; 2 Cor. 9:7.
14 Nailhan sa Atong Paagi sa Pamesti: Ang atong paagi sa pamesti magbutyag ug dako bahin kanato. Kasagarang mga tin-edyer ug daghang hamtong ang napalibotan sa uso nga mga estilo sa pamesti sa tunghaan o sa ilang dapit gitrabahoan. Kon dili kita magbantay, dali kitang maimpluwensiyahan sa kalibotanong mga kaubanan nga mamesti sama kanila. Daghang estilo ang di-haom nga isul-ob sa mga tigom alang sa pagsimba. Usa ka sulat ang nadawat human sa usa sa mga kombensiyon sa miaging tuig mipahayag ug apresasyon sa programa apan midugang: “Ako nalibog kon nganong adunay daghang batan-ong babaye nga nagsul-ob ug mugbong mga sinina, lawom ug mga liab, ug tag-as ang mga bingal.” Kitang tanan buot gayod nga mamesting angay sa Kristohanong mga ministro didto man sa kombensiyon ug samtang nagapahayahay human sa programa. Sa tanang panahon mapuslanon ang pagsumbaliksilaw sa tambag ni apostol Pablo nga madayandayanan sa “mahapsay nga sinina, uban ang kaligdong ug pagkamabuot sa hunahuna.”—1 Tim. 2:9.
15 Kinsa may motino kon unsay kasarangan, “mahapsay” nga sinina? Ang pagkakasarangan nagakahulogang “dili mahinaykon ni mapugsanon-kaugalingon.” Ang diksiyonaryo nagahubad usab sa pagkakasarangan ingong “di-mapasundayagon.” Dili ang Sosyedad ni ang mga ansiyano mohimo ug mga lagda maylabot sa pamesti o pamostura. Apan, dili ba gayod usab tin-aw ngadto sa usa ka Kristohanon kon unsang mga estiloha sa pamesti ang tinong dili makasaranganon o ugdang? (Itandi ang Filipos 1:10.) Ang atong pamostura ug pamesti angay nga dili makadani ug di-tukmang pagtagad. Angay kitang maayong tan-awon, dili kalibotanon o makapaulaw, sa panagway. Ingong mga ministro sa maayong balita, ang atong tukmang pamesti ug pamostura maghatag ug pasidungog kang Jehova ug magbanaag ug maayo sa organisasyon. Ang atong panagway ug pamesti samtang anaa sa siyudad sa kombensiyon angay nga tukma kon unsay atong naandang ginasuot sa Kingdom Hall sa dihang nagatambong sa mga tigom. Busa, ang mga ginikanan magpahiluna ug panig-ingnan ug dayon tinoon nga ang ilang mga anak magsinina ug tukma alang sa okasyon. Ang mga ansiyano buot nga mopahiluna ug maayong panig-ingnan ug magmaandam sa pagtanyag ug malulotong tambag kon gikinahanglan.
16 Paghupot nga Hinlo sa Atong mga Palibot: Dili lamang ang atong sinina, apan usab ang atong mga palibot angay nga huptang hinlo ug hapsay. Huptan natong hinlo ang pasilidad sa kombensiyon, dili manglabay ug papel, mga putos sa kendi, o uban pang mga sudlanan diha sa salog. Sa dili pa mopauli inigkagabii, punita ang bisan unsang basura nga anaa sa palibot ug ibutang kana sa tukmang basurahan o kaha dad-a sa balay aron didto na ibasura.
17 Mga Kalihokan sa Negosyo: Kita motambong sa kombensiyon aron mokaon sa espirituwal nga pagkaon. Busa dili tukma nga mopahimulos sa dagkong panon sa katawhan pinaagig paghimog mga butang nga ibaligya, sama sa T-shirts, mga paypay, o mga kalendaryo nga may pinatik nga tema sa kombensiyon diha niana. Ang mga hawanan sa kombensiyon sa aktuwal mahimong sama sa dakong Kingdom Hall nga niana walay luna ang mga kalihokan sa negosyo.
18 Mga Kamera, mga Camcorder, ug mga Audiocassette Recorder: Ikatugot man ang paggamit ug mga kamera ug uban pang kagamitan sa pagrekord, basta ipakita nato ang konsiderasyon sa ubang nanambong. Kon kita mosuroysuroy sa pagpangletrato sa panahon sa mga sesyon, dili lamang kita makabalda sa uban apan malaktawan usab nato ang pipila ka programa sa atong kaugalingon. Sa kasagaran makapahimulos kitag dako sa kombensiyon pinaagig pagpatalinghog pag-ayo sa mga mamumulong ug pagkuhag mga nota. Kita tingali magrekord alang sa usa ka igsoong lalaki o babaye nga baldado ug dili makatambong; apan, alang sa atong kaugalingong paggamit, atong makaplagan sa atong pagpauli nga tapos makarekord sa daghang oras sa programa, wala diay kita ing panahon sa pagsubli sa kadaghanan nga atong girekord. Walay mga kagamitan sa pagrekord sa bisan unsang matang ang ikonektar ngadto sa elektrikal o sound system, ni ang kagamitan mobabag sa mga pasilyo, mga agianan, o sa panan-aw sa uban.
19 Lingkoranan: Padayon natong namatikdan ang maayong pagsanong maylabot sa pagreserba ug mga lingkoranan. Sa miaging tuig, kadaghanan kaninyo misunod sa direksiyon: ANG MGA LINGKORANAN IKARESERBA LAMANG PARA SA SUOD NGA MGA MEMBRO SA IMONG PAMILYA UG SI BISAN KINSA NGA NAGABIYAHE UBAN KANIMO SA IMONG SAKYANAN. Lagmit nakaplagan nimong dili kini kaayo lisod sanglit daghan ang misunod niining tin-aw nga mga gimbut-an. Mas bililhon pa, ang imong pagsugot makapahimuot kang Jehova ug sa ‘kasaligang ulipon,’ nga maoy nagatagana sa espirituwal nga pagkaon.—Mat. 24:45.
20 Palihog hinumdomi nga ang Departamento sa First Aid sa kombensiyon wala sa kahimtang nga moatiman sa dugay nang mga masakiton. Kon ang membro sa imong pamilya nanginahanglan ug linaing pag-atiman, palihog tinoa nga dili siya biyaang mag-inusara kon motungha man ang emerhensiya. Ang mga ansiyano buot nga magmaalisto kang bisan kinsa sa ilang kongregasyon nga adunay linaing panginahanglan sa panglawas ug tinoon nga ang mga kahikayan nahimo na nga abante sa panahon alang sa ilang kaayohan.
21 Mga Panginahanglan sa Pagkaon sa Kombensiyon: Pipila kanato medyo nabalaka sa dihang gipahibalo sa miaging tuig nga walay pagkaon o ilimnon ang itagana sa kombensiyon. Kon mao, sama sa kadaghanan sa atong mga igsoon, kita nalipay pag-ayo sa mga kaayohan sa pagdala sa atong kaugalingong pagkaon. Usa ka igsoong lalaki misulat: “Tin-aw nakong nakita ang dakong espirituwal nga kaayohan niini. Kadtong tanang panahon ug kusog magamit na karon sa espirituwal nga mga butang. Wala akoy nadungog nga usa ka negatibong komento.” Usa ka sister misulat: “Pinaagig panig-ingnan, kamong minahal nga mga igsoon midasig kanamo ingong indibiduwal nga mga Kristohanon nga susihon ang among kaugalingon ug mangitag mga paagi sa pagpayano sa among mga kinabuhi ug palamboon ang among teokratikanhong kalihokan.” Usa ka nagapanawng magtatan-aw misulat maylabot sa mga tagana kanhi sa pagpakaon: “Ang kahikayan kanhi nagpahimo sa daghang kaigsoonan nga masayloan ang enterong programa sa asembliya.” Bahin sa pagkaon nga gidala sa mga igsoon, usa ka ansiyano misulat: “Nabatonan gayod nila ang ilang gusto, ug wala nila kinahanglanang maglinya alang niana.” Daghan ang mikomento sa kamatuoran nga aduna na silay dakong panahon sa pagbisita sa ilang mga higala.
22 Walay tagana sa pagkaon usab niining tuiga. Palihog sublia sa pipila ka minutos ang pasukip sa Nobyembre 1995 nga Atong Ministeryo sa Gingharian, parapo 27, alang sa praktikal nga mga pagkaon nga madala sa kombensiyon. Palihog hinumdomi, nga walay bildong mga sudlanan o alkoholikong mga ilimnon ang pagadad-on ngadto sa pasilidad sa kombensiyon. Kon kinahanglanon ang gagmayng mga cooler, kinahanglang mohaom kini duol sa imong lingkoranan ug dili moilog sa lingkoranan sa uban. Adunay igoigong panahon sa tingpaniudto aron kaonon ug imnon kon unsay imong gidala. Sama sa atong mga Kingdom Hall panahon sa mga tigom, kanunay natong likayan ang pagkaon sa panahon sa mga sesyon. Sa ingon atong gipasundayag ang pagtahod alang sa espirituwal nga pagkaon nga ginatagana.
23 Sa dili madugay ang una sa “Mga Mensahero sa Diyosnong Pakigdait” Distritong mga Kombensiyon magsugod na. Nabug-os mo na ba ang imong mga pagpangandam sa pagtambong, ug andam ka na ba karon sa pagpahimulos sa tulo ka adlaw sa malipayong panag-ubanay ug maayong mga butang sa espirituwal? Maoy among tim-os nga pag-ampo nga si Jehova magapanalangin sa imong mga paningkamot nga makatambong sa kombensiyon niining tuiga.
[Kahon sa panid 6]
Distritong Kombensiyon nga mga Pahinumdom
Bawtismo: Ang mga kandidato sa bawtismo angay nga nakalingkod na sa gitudlong dapit una pa magsugod ang programa sa buntag sa Sabado. Namatikdan nga ang pipila nagsuot ug mga matang sa sapot nga dili ligdong ug nakadaot sa okasyon. Ang kasarangan nga humdonon ug usa ka tualya angayng dad-on sa matag usa nga nagplano sa pagpabawtismo. Segurohon sa mga ansiyano sa kongregasyon nga mosubli sa mga pangutana sa librong Atong Ministeryo uban sa mga kandidato sa bawtismo nga ang matag usa makasabot niining mga puntoha. Human sa pakigpulong sa bawtismo ug pag-ampo pinaagig mamumulong, ang tsirman sa sesyon mohatag ug mubong mga instruksiyon ngadto sa mga kandidato ug dayon mopahibalo sa pag-awit. Human sa kataposang laray, tultolan sa mga atendant ang mga kandidato ngadto sa dapit bawtismohanan. Sanglit ang bawtismo ingong simbolo sa pahinungod sa usa maoy suod ug personal nga butang tali sa indibiduwal ug kang Jehova, walay kahikayan sa ginaingong magkaubang mga bawtismo nga niana duha o kapin pa ka kandidato sa bawtismo maggakos ug maggunitay samtang bawtismohan.
Mga Badge Card: Palihog itaod ang 1996 badge card didto sa kombensiyon ug samtang nagabiyahe ngadto sa o gikan sa dapit sa kombensiyon. Kasagaran makapahimo kini nga posibleng kita makahatag ug maayong pamatuod samtang nagabiyahe. Ang mga badge card ug mga sudlanan angay nga mabatonan pinaagi sa inyong kongregasyon, kay dili kini mabatonan sa kombensiyon. Ayaw paghulat hangtod sa pipila ka adlaw una pa ang kombensiyon nga mohangyog mga kard alang kanimo ug sa imong pamilya. Hinumdomi ang pagdala sa imong bag-ong kard nga Advance Medical Directive/Release.
Pagboluntaryo: Kay wala na may serbisyo sa pagkaon, daghan niadtong kinsa nagtrabaho nianang departamentoha hayan makahimo na karon sa pagtrabaho bisan diin. Makagahin ka bag pipila ka panahon sa kombensiyon aron makatabang sa usa sa mga departamento? Ang pag-alagad sa atong mga igsoon, bisan sulod lamang sa pipila ka oras, makatabang kaayo ug makahatag ug dakong katagbawan. Kon makatabang ka, adto palihog sa Volunteer Service Department sa kombensiyon. Ang kabataan ubos sa 16 anyos ang pangedaron makahimo usab ug maayong amot sa pagtrabaho ubos sa direksiyon sa usa ka ginikanan o uban pang responsableng hamtong.
Mga Pahimangno: Magmaalisto sa posibleng mga suliran aron malikayan ang wala kinahanglanang mga gumonhap. Ang mga kawatan kasagarang mamiktima sa katawhan nga halayo sa palibot sa ilang balay. Tinoa nga nakandadohan ang imong sakyanan sa tanang panahon, ug ayaw pagbilin ug bisan unsang makita nga makatental sa usa nga manglungkab. Ang mga kawatan ug mga mangunguot mopunting sa ilang pagtagad sa dagkong panagkatigom. Dili gayod maalamon nga magbilin ug bisan unsang bililhong butang sa imong lingkoranan. Dili ka makaseguro nga ang matag usa sa imong palibot maoy Kristohanon. Nganong motanyag man ug bisan unsang panental? Ang mga taho nadawat nga ang mga pagsulay gihimo sa pipila ka tagagawas sa paghaylo nga mahilayo ang kabataan. SEGUROHANG BANTAYAN ANG INYONG KABATAAN SA TANANG PANAHON.