Mga Kabataan​—Kamo ang Among Kalipay!

¹ Mga batan-ong lalaki ug babaye, nasinati ba kamo sa sugo ni Jehova nga kamo ilakip sa mga kalihokan sa kongregasyon? (Deut. 31:12; Sal. 127:3) Usa ka kalipay nga kamo among ikatapad samtang duyog natong simbahon si Jehova! Gipainit ninyo ang among mga kasingkasing sa dihang molingkod kamong hilom diha sa mga tigom ug maminaw pag-ayo. Ilabinang kini magpalipay kanamo sa dihang maningkamot kamo sa pagkomento sa inyong kaugalingong mga pulong. Mahimuot ang tibuok nga kongregasyon sa dihang ipresentar ninyo ang natudlong mga bahin sa Tunghaan sa Teokratikanhong Ministeryo, sa dihang kamo masibotong makigduyog kanamo sa pag-alagad sa kanataran, ug sa dihang among madungog nga kamo maisogong mosangyaw sa inyong mga klasmet ug mga magtutudlo.​—Sal. 148:12, 13.

² Buot namong inyong masayran nga kami magarbohon kaninyo sa dihang among makita ang inyong maayong pamatasan, ang inyong mahapsay nga panagway, ang inyong mahinlong panggawi, ug ang inyong pagtahod sa mga edaran. Ilabinang dako ang among kalipay sa dihang inyong ipakita nga kamo ‘nagahinumdom sa inyong Dakong Maglalalang’ pinaagig pagpahilunag teokratikanhong mga tumong alang sa inyong kaugalingon.​—Eccl. 12:1; Sal. 110:3.

³ Sultihi Kami sa Inyong mga Tumong: Usa ka otso-anyos nga batang lalaki misulti ngadto sa magtatan-aw sa distrito: ‘Una buot kong mabawtismohan, dayon buot kong makatabang sa kongregasyon pinaagig pag-alagad sa sistema sa sound ug pag-atiman sa mga mikropono, ingon nga atendant, pagtabang diha sa literatura, pagbasa diha sa mga pagtuon sa libro ug sa mga Pagtuon sa Bantayanang Torre. Dayon buot kong mahimong ministeryal nga alagad, dayon usa ka ansiyano. Buot ko usab nga mahimong payunir ug motambong sa tunghaan sa payunir. Dayon buot kong motrabaho sa Bethel, mahimong usa ka magtatan-aw sa sirkito o magtatan-aw sa distrito.’ Pagkamaayong pagpabili ang iyang gipakita alang sa pribilehiyo sa pag-alagad sa Diyos!

⁴ Samtang kamo mouswag sa pisikal ug sa espirituwal, kami malipay nga makita kamong makakab-ot sa inyong mga tumong. (Itandi ang Lucas 2:52.) Matag tuig, linibo kaninyo mahimong di-bawtismadong mga magmamantala ug dayon mahimong takos sa bawtismo ingong dedikadong mga alagad ni Jehova. Ang among kalipay magtubo sa dihang sa sunod among makita kamo nga mangab-ot sa pag-oksilyare payunir ug sa pagsulod gani sa bug-os-panahong pag-alagad. Sa pagkatinuod, mga kabataan, kamo ang among kalipay ug usa ka kahibulongang tinubdan sa pagdayeg sa atong langitnong Amahan. Hinaot si Jehova dagayang magapanalangin kaninyo!​—Prov. 23:24, 25.