BEƊEA ERDAUBA
LECCIÓN 5
Respeto iɗaa beɗeaba
Bibliaba naka jara ɓuu: “Beɗea biaɗeeba berreásturu jomaurãba biʼia ũriɗamera” (Col. 4:6).
Chi Pabloba aseɗa
1. VIDEO ochias maebʉrã Hechos 17:22, 23 leas. Maabea nauɗe kʉ̃risiaba:
¿Pablo saka sentiɗaba Atenasɗe imagen ãrĩã wauka koɓeerã unusiiɗe? (Hechos 17:16 ochias).
¿Saka Pabloba respeto iɗaa beɗeaɗa basaa chi Atenasɗebenarãmaa?
¿Kãare kawa panaa Pabloba aseɗa?
2. Dachia biʼia kʉ̃risiabudaubʉrã beɗeai naeɗe, kãare jaraɗayu, saka jaraɗayu mauɗe sakaya jaraɗayu, makarã chi ẽbẽraba dachi ũri kʉ̃riai ɓua.
Pabloba aseɗa kĩra aseba
3. Beɗea adaui naeɗe biʼia kʉ̃risiaba. Chi ẽbẽra Biblia unu adua niimaa junebena beɗeaɗe beɗea adauyua, kawabii baita kãareba mau chi Biblia mauɗe kai Jesús.
4. Aɓaeɗe ẽbẽramaa jãkawẽma aabayua. Chi ẽbẽradu ida beɗeabiba. Ichia diwara beɗeaburuubʉrã Bibliaɗebena, makawẽma aabayua (Sant. 1:19). Bichia biʼia ũriburuubʉrã ichia jaramaa ɓuu, kawayua ichia ijãa ɓuu mauɗe sakayua maka ijãa nii (Prov. 20:5).
5. Chi ẽbẽraba jaraburuu biʼia jarasiibʉrã, ariɗe jara ɓuma ayua. Kʉ̃risiaba ichia ijãa nii, ichi baita ariɗe ɓuu. Beɗeaba chi ichia mauɗe bichia ijãabariiɗebena, ɓiɗĩi ɓiɗĩia kawabiayu chi Bibliaba jara ɓuu ʉ̃rʉbena.
NAU SIƊA OCHIAS
Prov. 25:15; 2 Tim. 2:23-26; 1 Ped. 3:15