LESION 03
¿Bibliaba ariɗe jaraɓoabaka?
Chi Bibliaba kosarã pasabudau ʉ̃rʉbena ãrĩãdu jaraɓua mauɗe konsejo siɗa deaɓua. ¿Bichia kawa kʉ̃rianika? Maamina, chi eɗa jarakoɓeeɗebena jãuɗe ãrĩãdu kereebai ɓuka bichia, chi ariɗe jaraɓuu o maka jaraɓuuwẽ. Chi Biblia libro sõre ãrĩã ɓuu bẽrã, ¿dachirãba kereɗai ɓue chi jãma eɗa ɓʉkoɓeeɗebena? ¿Bichia kerei ɓue chi konsejorã Bibliaba deaɓuu dachirãmaa jaradeɗekaɓuu kĩrajʉʉ nureaɗai baita iɗi mauɗe puturuɗe? Ẽbẽrarã ãrĩãrãba kereduanua, kawas bichia biɗa saka kerei ɓuu jãuɗe.
1. ¿Chi Bibliaba jaraɓuu jãu ariɗe pasaska?
Chi Bibliaɗe eɗa “beɗearã arikʉɗe ɓee” ɓʉkuɓua, jãma eɗa kosarã ariɗe pasapeɗaaɗarãɗebena jaraɓua (Eclesiastés 12:10). Bibliaba ẽbẽrarã bibinureapeɗaaɗabaɗa ʉ̃rʉbena jarapeɗa mauɗe kosarã naeɗe pasaɗabaɗa ʉ̃rʉbena jaraɓua (Lucas 1:3; 3:1, 2 leas). Ẽbẽrarã ãrĩãrã unibersidaɗe estudiapeɗaaɗarãba jarabadau chi pecha, kãare sãaɗabaɗa mauɗe kãare kakua nejoma pasaɗabaɗa chi Bibliaɗe jarakoɓee mau ariɗe pasaɗa jarapanuu.
2. Bariara chi Biblia libro sõre abadaamina, ¿sakayua ichiɗe ãrĩãdu kereɗai ɓua?
Chi Bibliaba kosarã ʉ̃rʉbena jaraɓoosia, chi naeɗe ẽbẽrarãba aduabaɗa. Mambea waabenarãba añaa jaradeɗekasiɗaa chi jãka ɓee ʉ̃rʉbena jari baniaɗebena, chi iujãaɗebena mauɗe jeɗeko ʉ̃rʉbena, ara chi iujãa purra ɓuu ʉ̃rʉbena siɗa. Maka ɓuumina iɗi diaɗe, chi sientipikorãba kawasiɗaa, chi Bibliaba jaraɓooɗa, nau ewaɗe ariɗe ɓuu chi ãchia inbestikasiɗau ome. Chi beɗearã Bibliaɗe eɗa ɓʉkoɓeeɗe “ãrĩãdu kereɗai ɓua iɗi mauɗe waaburu” (Salmo 111:8).
3. ¿Sakayua kereɗai ɓua dachia chi Bibliaba jaraɓuu pasaburuu ʉ̃rʉbena?
Chi Bibliaba jaraɓua kosarã pasabudau ʉ̃rʉbenaa dachirãba “ara maka unuɗawẽa duanuuɗebena” (Isaías 46:10). Ichia jarasia arikʉɗe yataɗeeɗa chi kãare pasai ʉ̃rʉbena. Maubapeɗa biʼia ãrĩã jarasia saka nureaɗai dachirã nau iujãaɗe iɗi ewaɗe. Nau lesionɗe, chi Bibliaɗe jaraɓuu ariɗe kumpliɗabaɗa ʉ̃rʉbena kawabudaa.
AUDE KAWABA
Kawaɗaika chi Bibliaba jaraɓuu iujãaɗebena, baniaɗebena, moɗeɗebena, joma jaraɓuu ara aɓa ɓuu, chi sientipikorãba jaraduanuuɗebena. Mauɗe leaɗaika chi ɓee kosarãɗebena chi Bibliaba jaraɗabaɗa chi pasabudau ʉ̃rʉbena.
4. Chi Bibliaba jaraɓuu sientipikorãba jãu ariɗe jãka ɓuu apanua
Yataɗeeɗa ẽbẽrarãba kerepanasia chi iujãa akare animararã mechia panuurãba ichi jira irapanasii ʉtʉareba ɓaebiɗaamaba. Bideo ochiábaɗa.
Kawa ochias chi libro Jobɗebenaba jaraɓuu, nau librora 3500 año basii ɓʉpeɗaaɗabaɗa. Job 26:7 leaɗapeɗa, mambea nau ʉ̃rʉbena beɗeasturu:
Ẽbẽrarãba chi iujãa ʉtʉ jĩa jiranuu kawaɗai naeɗe, Bibliaba naeɗe jaraɗabasia, ¿saka unuɓua bichia jãu?
Ʉ̃rʉburu 200 año basiiɗe kawasiɗau chi bania saka jeɗa ɓaepeɗa waya ʉtʉ bajãaɗaa wãbarii. Ʉmadaba do choroma jũrũabaria, mau jũrũaɗabaɗa ʉtaa wãkuɓua bajãaɗaa mama ʉtʉbenadu waya iujãaɗaa chi do choromaɗaa ɓaeɓua kue kĩra. Ochias saka aɓuu Bibliaba yataɗeeɗa jãu ʉ̃rʉbena. Job 36:27, 28 leaɗapeɗa, mambea nau ʉ̃rʉbena beɗeasturu:
¿Chi bania ʉ̃rʉbena leasiiɗe sãdu aude bichia ãrĩãdu bustasaa?
¿Nau learuuba chi testorã jaraɓuu jambera aude kereɓue chi Bibliaba jaraɓuuɗe?
5. Bibliaba jaraɗabasia chi ɓee puururã joma akabaɗai
Isaías 44:27-45:2 leaɗapeɗa, mambea nau ʉ̃rʉbena beɗeasturu:
¿Kãare jarasaa Bibliaba 200 año naeɗe chi kaiba mauɗe saka chi Babilonia akabai ʉ̃rʉbena?
Chi nebʉrʉbadaurãba jarabadau chi año 539 Jesus naeɗeb, rei Persiaɗebena ichi trʉ̃ Ciro, ichi ejersito omeba chi puuru choroma Babilonia adausiɗaa. Ãchia chi do puuru adu jʉ̃rakoɓooɗabaɗa añaa eaɓuiɗapeɗa wãsiɗaa. Chi poroa Babiloniaɗebena ewakuaɓoosii bẽrã ãchi eɗaa peleaɗawẽa wãusiɗaa. Nau 2500 año basii mauɗeeɗabena Babilonia iɗiɗaa ara maka jeɗa kuaduatapeɗaaɗa modu bari ɓea. Ochiachãu jambea chi Biblia naeɗe jaraɗabaɗa.
Isaías 13:19, 20 leaɗapeɗa, mambea nau ʉ̃rʉbena beɗeasturu:
¿Saka kumplisaa Dachi Akõreba pasai ʉ̃rʉbena jaraɗabaɗa?
Babilonia jeɗa kuaduatapeɗaaɗa modu bari ɓea, Irakɗe koɓee
6. Chi Bibliaba naeɗe jarasia chi dachia iɗi unumaaduanuu
Bibliaba jaraɓuu chi joma kachirua barau akabaiɗaa iraɓua mauɗeeba dachirã “chi ultimo diarãɗe” duanuu (2 Timoteo 3:1). Kawas kãare jarasii naarã diarã ʉ̃rʉbena.
Mateo 24:6, 7 leaɗapeɗa, mambea nau ʉ̃rʉbena beɗeasturu:
Chi Bibliaba jaraɓuu, ¿kãare pasai basaa chi ultimo diarãɗe?
2 Timoteo 3:1-5 leaɗapeɗa, mambea nau ʉ̃rʉbena beɗeasturu:
Chi Bibliaba jaraɓuu, ¿kãare kosarã miaɗaa ɓee aseɗai basaa ẽbẽrarãba chi ultimo diarãɗe?
Chi jãarã kosarã kachiruarãɗebena beɗeaɓuu chi testoɗe, ¿sãarã unuɓua bichia iɗi?
CHI NUREE ẼBẼRARÃBA NAKA JARABADAA: “Chi Biblia kuento jaraɓuu abadaa setaa jaraɓuu aɗapeɗa maebʉrã naaberãra beɗeakaɓuu” abadau.
¿Sakayua kereɓua chi Bibliaba biawãradu jaraɓuu ʉ̃rʉbena?
NAU KAWASIƊAA
Dachia kereɗai ɓua chi Bibliaba jaraɓuuɗebena ichia jaraɗabaɗa ariɗe pasaɓuu bẽrã. Maubapeɗa, chi sientipikorã mauɗe chi nebʉrʉbadaurã baara ariɗe jarapanua chi Biblia ome.
Waya berreaɗaika
¿Chi Bibliaba ariɗe jaraɓue o kuentodu jaraɓoobaka?
¿Kãare kosarã jarasaa Bibliaba mau kaaɗe chi sientipikorãba ariɗe ɓuu ʉ̃rʉbena jarasiɗau?
¿Kereɓue bichia Bibliaba jaraɓuu chi kãare neeburuu ʉ̃rʉbena? ¿Sakayua maka kʉ̃risiaɓua?
NAU OCHIAS MAUCHABURU KAWAYUA
Chi sientipikorãba ochiapanuu deeɗabena, ¿Bibliaba añaa jaraɓoabaka?
“¿Chi Biblia sientipikorãba jaraduanuu ome ara ambua aɓa ɓuudu jarapanue?” (Artikulo jw.org ɗebena)
¿Sakayua kuitaapanaa dachirã “chi ultimo diarãɗe” duanuu?
Biʼia kawas chi saka kobierno Greciaɗebena kumpliɗabaɗa, chi Bibliaba jaraɓuu.
Dachi jãaduanuree “chi pasaruuɗebena jaraɗabaɗa kuitaaduuba” (5:22)
Leachãu saka mukĩra niiba chi Bibliaɗe kerekaɓuu nibaɗa jambera ichi empesa estudiakoɓeesiiɗe keresii chi Bibliaɗe.
“Dachi Akõreɗe kerekabachia” (Chi Kartaba, 2017ɗebena chi 5)
a Dachi Akõreba jaraɗabaɗa yataɗeeɗa kumpliɗabaɗa mauɗe iɗi ewaɗe biɗa kumplimaaɓuu.
b Dachia beɗeaɗayua Jesus naeɗe pasaɗabaɗa ʉ̃rʉbena, chi letrarã J.N. utilisabadaa. Mauɗe chi nau diaɗebena Jesus kaaɗebenarã jaraɗayua, dachia chi letrarã J.K. utilisabadaa.