Fer Konnen Non Zeova ek Son Bann Fason Azir
1 “Ofer remersiman Zeova, envok son non, fer konnen parmi bann pep son bann fason azir. . . . Les leker sa bann ki pe rod Zeova rezwir.” (Ps. 105:1, 3) Sa psalmis ki ti ekrir sa bann parol ti trouv bokou lazwa kan i ti rakont lezot lo Zeova e lo son “bann fason azir.” Ki sa bann fason azir? San dout, i annan pour fer avek rwayote glorye Bondye e avek “sa bon nouvel delivrans par li.”—Ps. 96:2, 3; 145:11, 12.
2 Anmezir ki Memoryal 2001 pe aprose, nou annan bokou rezon pour rezwir konsernan bann fason ki Zeova in azir avek nou. Konman i leka? San dout Repa Senyer i lafet pli enportan dan lannen pour tou vre Kretyen. I napa okenn lezot lokazyon ki parey li an sa ki konsern son lenportans, lobzektif, oubyen prosedir. Sa i en letan pour nou tou rapel sa ki Zeova ek Zezi in fer pour fourni en mwayen pour nou delivrans. I pa etonnan ki pandan sa peryod Memoryal nou ekspekte vwar en ogmantasyon dan aktivite predikasyon, anmezir ki nou fer konnen “sa bon nouvel delivrans”!
3 Eski Ou Pou Fer Pionye Asistan? Ti annan 34 ki ti pran servis pionye asistan an Avril lannen pase e sa ti en rikord. Sa lannen, eski nou kapab fer Mars ek Avril vin de mwan spesyal pour plis aktivite dan minister? Mars i annan senk Sanmdi, e Avril i annan senk Dimans. Bokou proklanmater ki travay aplentan in dekouver ki zot kapab fer pionye asistan si zot plàn lazournen antye pandan wikenn pour predikasyon. Pour ganny 50 er-d-tan par mwan, en pionye asistan i bezwen fer en mwayenn 12 er-d-tan par semenn. Egzamin atantivman sa bann progranm ki ganny sizere dan bwat lo paz 4. Eski i annan enn sa bann progranm ki adapte avek ou sirkonstans? Si non, petet ou kapab plàn ou prop progranm pour fer pionye asistan mwan Mars ek Avril.
4 Bann ansyen i devret konmans batir lantouzyasm ek sipor pour plis aktivite predikasyon depi la konmela menm. Lannen pase, dan en kongregasyon kot tou bann ansyen ek asistan ministeryel ti pran servis pionye asistan, 64 dan sa 121 proklanmater ti fer pionye asistan an Avril! Sa kongregasyon ti osi byen kontan pour vwar sis proklanmater non batize konmans remet en rapor predikasyon an Mars ek Avril. Vreman, i napa en pli bon moman ki sa pour bann zanfan ek bann nouvo demann bann ansyen si zot kalifye pour konmans partisip dan aktivite predikasyon.
5 Zefor Ekstra i Anmenn Benediksyon: Bann kongregasyon ki etablir bann lobzektif spesifik e fer zefor ekstra i rezwir bokou benediksyon. Serten kongregasyon i kapab met lanfaz partikilyerman pour kouver teritwar ki rarman ganny travay, oubyen konsantre lo bann diferan form temwannyaz, met lanfaz lo temwannyaz par telefonn—en mwayen efikas pour kontakte bann absan ek bann lakaz ki enposib pour ganny akse avek.
6 Eski move lasante oubyen lavyeyes i devret absoliman anpes okenn dimoun partisip otan posib dan servis? Pa dan tou sirkonstans. Par egzanp en ser 86 an ki annan kanser, ti fer pionye asistan Avril lannen pase menm si son lipye ti anfle. Temwannyaz par telefonn ti fer li posib pour li annan en par konplet dan servis e ogmant son louanz pour Zeova. Sa in stimil li menm e osi kongregasyon.
7 Prepar Byen pour Memoryal: Sa lannen Memoryal pour fer le 8 Avril. Vi ki i tonm en zour Dimans, i posib ki bokou plis dimoun i asiste. Nou kapab annan en pli gran nonm lasistans si nou fer nou par pour (1) ki nou menm nou asiste e (2) envit lezot pour zwenn nou dan Memoryal. Lekel ki nou devret envite?
8 Get ou bann not personnel pour predikasyon pour vwar non bann dimoun ki’n montre en serten lentere dan laverite, menm si ou pa neseserman vizit zot regilyerman. De ou trwa semenn avan Memoryal, fer zefor pour vizit tou sa bann dimoun, avek en lenvitasyon Memoryal pour sakenn. Si ou sirkonstans i permet, ofer pour fourni mwayen transport pour sa bann ki ti a anvi asiste.
9 Dan serten kongregasyon, pa tou sa bann fey lenvitasyon ki ganny servi. Bann sekreter kongregasyon i devret fer sir ki bann fey lenvitasyon i disponib byen davans afen ki tou i ganny distribye. Ou kapab tipe oubyen enprim ler ek landrwa alafen sa lenvitasyon. Oubyen ou kapab enkli en fey lenvitasyon ki endik ladres Lasal Rwayonm si Memoryal pou fer kot Lasal. Nou rapel zot ki laplipar-di-tan lenvitasyon Memoryal i devret ganny donnen personnelman avek bann dimoun.
10 Mazin Bann Inaktif: I en rezon pour rezwir ler en etidyan Labib i dedye son lavi avek Zeova e senboliz sa par batenm. Kantmenm sa, sak lannen, serten parmi nou i arete asosye avek nou e zot arete anons lezot non Zeova ek son bann fason azir. Nou annan bon rezon pour montre nou konsernen. Kantmenm laplipar bann inaktif pa’n abandonn laverite, petet zot in aret prese parski dekourazman, bann problenm personnel, oubyen lezot lenkyetid lavi. (Mat. 13:20-22) Sa bann ki feb spirityelman i bezwen led pour retourn dan kongregasyon avan ki zot ganny anvale par sistenm Satan. (1 Pyer 5:8) Pour sa peryod Memoryal, nou anvi fer en zefor spesyal pour ed tou bann inaktif pour rekonmans pres ankor sa bon nouvel.
11 Sekreter kongregasyon i devret fer konnen bann kondikter letid liv si i annan okenn manm dan son group ki inaktif. Komite Servis Kongregasyon pou pran linisyativ pour organiz bann vizit pastoral avek tou bann inaktif. Si zot deside ki sa endividi pou benefisye atraver en letid Labib personnel, konmite servis i devret deside lekel ki pou byen apropriye pour kondwir sa letid. Kantmenm i kapab pa neseser kondwir sa letid pour en gran peryod letan, sa enn ki kondwir sa letid i kapab raport son ler, retourn vizit, ek letid Labib.
12 Avril lannen pase, en ser ki ti pe travay port-an-port ti ofer magazin avek en zennonm lo semen. Sa zonm ti dir ki son madanm i en Temwen inaktif. I ti demande kote Lasal Rwayonm i ete e i ti envit sa ser pour vizit li ek son madanm. Rezilta se ki sa koup ti asiste prosenn renyon e zot ti dakor pour etidye Labib.
13 Met Ou Pare Pour Plis Aktivite! Sa psalmis ki ti deklare ki nou devret fer konnen non Zeova ek son bann fason azir ti azoute: “Sant pour li, fer lanmizik pour li, enteres ou avek tou son bann travay merveye. Glorifye ou dan son non sen.” (Ps. 105:2, 3) Annou demontre nou lentere pour gran non Zeova ek son “bann travay merveye” par fer zefor ekstra dan nou minister, e fer sa letan Memoryal vin enn pli meyer ki zanmen oparavan!
[Bwat lo paz 4]
Plizyer Fason Pour Progranm 12 er-d-tan par Semenn Pour Fer Pionye Asistan
Zour Er-d-tan
Lendi 1 2 − −
Mardi 1 − 3 −
Merkredi 1 2 − 5
Zedi 1 − 3 −
Vandredi 1 2 − −
Sanmdi 5 4 3 5
Dimans 2 2 3 2
Total: 12 12 12 12
Eski i annan enn parmi sa bann progranm ki ideal pour ou?
Si non, akoz ou pa fer ou prop progranm?