Туслӑх хӑрушлӑха кӗрсе ӳксен те тус пулма ан пӑрахӑр

ЛАЙӐХ туссем — чӑн-чӑн пуянлӑх. Вӑй хумасӑр туслӑх ҫирӗп пулаймӗ. Туслӑх арканас пек туйӑнать пулсассӑн, ӑна упраса хӑвармашкӑн мӗн пулӑшма пултарать? Библири тӗслӗхсем. Унта чӑн-чӑн туссем хӑйсен туслӑхӗ хӑрушлӑха кӗрсе ӳксен мӗн туни ҫинчен каласа панӑ.

ТУС ЙӐНӐШ ТУСАН

Давидӑн яланах шанчӑклӑ туссем пулнӑ, кӗтӳҫӗ пулнӑ чухне те, патша пулса тӑнӑ хыҫҫӑн та. Тен, эсир тӳрех Ионафан ҫинчен аса илетӗр пулӗ (1 Патш. 18:1). Анчах та вӑл Давидӑн пӗртен-пӗр тусӗ пулман. Давид Нафан пророкпа та туслӑ пулнӑ. Библире вӗсем хушшинчи туслӑх хӑҫан пуҫланса кайни ҫинчен каламан. Анчах та унта Давид Нафана чӗрери шухӑшӗсене уҫса пани ҫинчен ҫырса пани пур. Ҫакӑнтан патша пророка шанчӑклӑ тус вырӑнне хуни курӑнать. Давидӑн Иегова валли ҫурт туса лартас килнӗ. Ҫакӑн ҫинчен Нафан пророк мӗн шутлани Давидшӑн пысӑк пӗлтерӗшлӗ пулнӑ, мӗншӗн тесен Нафан унӑн ҫывӑх тусӗ пулнӑ тата ун ҫинче Иеговӑн сывлӑшӗ пулнӑ (2 Патш. 7:2, 3).

Анчах та кайран вӗсен туслӑхӗ хӑрушлӑха кӗрсе ӳкнӗ. Давид патша Вирсавипе аскӑн ӗҫ тунӑ тата унӑн упӑшкине Урияна ҫапӑҫура вӗлерттернӗ (2 Патш. 11:2—21). Нумай ҫул хушши Давид Иеговӑна шанчӑклӑ пулнӑ тата яланах тӗрӗссине тунӑ. Халӗ вара вӑл йывӑр ҫылӑха кӗнӗ. Ҫав ырӑ патшапа мӗн пулса тухнӑ-ха? Вӑл хӑй мӗн тери йӗркесӗр ӗҫ тунине ӑнланман-им? Е вӑл хӑйӗн ҫылӑхне Турӑран пытарма пулать тесе шутланӑ-ши?

Нафан мӗн тӑвӗ-ши? Патшапа кам та пулин урӑххи калаҫасса кӗтӗ-ши вӑл? Давид Урияна вӗлерттерни ҫинчен вӑл анчах мар пӗлнӗ-ҫке. Давидпа калаҫса Нафанӑн хӑйсен нумай ҫула тӑсӑлакан туслӑхне хӑрушлӑха кӗртсе ӳкермеллех-ши вара? Унсӑр пуҫне, патшапа уҫҫӑн калаҫсассӑн пурнӑҫа ҫухатма та пулать, мӗншӗн тесен Давид хушнипе ним айӑпсӑрах пӗр ҫынна вӗлернӗ те ӗнтӗ.

Анчах та Нафан Туррӑн представителӗ пулнӑ. Вӑл ҫакна пӗлсе тӑнӑ: калаҫса пӑхмасан вӗсем унчченхи пекех ҫывӑх туссем пулаймӗҫ, совеҫӗ те канӑҫ памӗ. Давид тӗрӗс мар ҫулпа кайса Иеговӑна кӳрентернӗ. Пӗр тӑхтаса тӑмасӑр патшана Иегова патне таврӑнма пулӑшмалла пулнӑ. Ҫакна Нафан пек шанчӑклӑ тус тума пултарнӑ. Давид унччен кӗтӳҫӗ пулнине шута илсе, калаҫӑва Нафан унӑн чӗрине пырса тивме пултаракан тӗслӗхпе пуҫланӑ. Хӑй калас сӑмахӗсене пророк тӗплӗн суйласа илнӗ, вара Туррӑн хыпарне пӗлтернӗ чухне Давида хӑй мӗн тери йывӑр ҫылӑх тунине ӑнланса илме тата ӳкӗнме пулӑшма пултарнӑ (2 Патш. 12:1—14).

Калӑпӑр, эсир хӑвӑрӑн ҫывӑх тус пысӑк йӑнӑш е йывӑр ҫылӑх туни ҫинчен пӗлтӗр. Ӑна питлесен сирӗн туслӑх пӗтсе ларас пек туйӑнма пултарать. Е ӑна пулӑшу паччӑр тесе пӗтӗмпех старейшинӑсене каласа парас пулсан, ҫакӑ туса сутнипе пӗрех пулассӑн туйӑнать. Ҫак лару-тӑрура эсир мӗн тӑвӑр-ши?

Ҫӳлерех асӑннӑ Джанни акӑ мӗн каласа парать: «Эпӗ тусӑмпа темскер пулса тухнине ӑнланса илтӗм. Маурицио манпа унчченхи пекех уҫҫӑн калаҫма пӑрахрӗ. Питӗ йывӑр пулсан та, эпӗ унпа калаҫса пӑхас терӗм. Малтан ман пуҫра ҫакнашкал шухӑшсем явӑнчӗҫ: „Ман ӑна мӗн калас? Вӑл хӑй те веҫех лайӑх пӗлет. Калаҫсан вара вӑл тарӑхса кайма та пултарӗ“. Анчах та унпа пӗрле унччен мӗн-мӗн вӗреннине аса илнӗ хыҫҫӑн ун патне пырса калаҫма хӑюлӑх ҫитертӗм. Мана пулӑшу кирлӗ чухне Маурицио яланах ҫапла тӑватчӗ. Манӑн тусӑма ҫухатас килместчӗ. Эпӗ уншӑн пӑшӑрханаттӑм, ҫавӑнпа ӑна пулӑшасшӑн пултӑм».

Маурицио калать: «Джанни манпа уҫҫӑн калаҫрӗ — ҫапла тумалла та. Хам тӗрӗс мар ӗҫсем тунине пула эпӗ йывӑрлӑха кӗрсе ӳкнишӗн вӑл та, Иегова та айӑплӑ маррине ӑнланса илтӗм. Эпӗ старейшинӑсем панӑ канаша йышӑнтӑм, вара вӑхӑт иртнӗҫемӗн Иеговӑпа хам хушӑри хутшӑнусене ҫирӗплетрӗм».

ТУС ИНКЕКЕ ЛЕКСЕН

Давидӑн ҫывӑх туссем татах пулнӑ, вӗсем ӑна йывӑр килнӗ вӑхӑтра та пӑрахман. Вӗсенчен пӗри — Хусий ятлӑскер. Библире ун пирки «Давид тусӗ» тенӗ (2 Патш. 16:16; 1 Ҫулс. 27:33). Хусий патша таврашӗнчи ҫын пулнӑ. Давид ӑна шанчӑклӑ тус вырӑнне хунӑ, хушӑран ӑна ятарлӑ ӗҫсем те шанса панӑ.

Давид ывӑлӗ, Авессалом, влаҫа хӑй аллине ярса илсен израильтянсем нумайӑшӗ ҫав пӑлхавҫӑ енне тӑнӑ, Хусий вара патшапах юлнӑ. Давидӑн тухса тарма тивсен Хусий ун хыҫҫӑн кайнӑ. Ун чухне Давидӑн чӗри питӗ ыратнӑ, мӗншӗн тесен ывӑлӗ те, хӑй шанса пурӑннӑ ҫынсем те унпа сутӑнчӑкла хӑтланнӑ. Анчах та Хусий патшана шанчӑклӑ тӑрса юлнӑ. Давид Авессаломӑн каварлӑ шухӑшӗсене аркатма ыйтсан, вӑл хӑйӗн пурнӑҫне хӑрушлӑха кӗртсе ӳкерсех ҫавна пурнӑҫланӑ. Хусий патша умӗнче яваплӑ тесе мар, унӑн шанчӑклӑ тусӗ пулнӑран ҫапла тунӑ (2 Патш. 15:13—17, 32—37; 16:15—17:16).

Пухури тӑвансене пӗр-пӗрин умӗнче яваплӑха туйни мар, чӑн-чӑн туслӑх пӗрлештерсе тӑрать. Ҫакӑ чӑннипех савӑнтарать! Хӑйсен ӗҫӗсемпе вӗсем: «Эпӗ христианин пулнӑран мар, сана чун-чӗререн хакланӑран санӑн тусу пуласшӑн»,— тесе каланӑнах туйӑнать.

Федерико ятлӑ тӑван ҫакна хӑй ҫинче туйса курнӑ. Ҫывӑх тусӗ Антонио пулӑшнипе вӑл хӑйӗн пурнӑҫӗнчи ҫӑмӑл мар тапхӑра чӑтса ирттерме пултарнӑ. Федерико аса илет: «Антонио пирӗн пата урӑх пухуран куҫса килчӗ. Кӑшт вӑхӑт иртсенех эпир туслашса кайрӑмӑр. Эпир иксӗмӗр те пулӑшакан ӗҫченсемччӗ, пухури ӗҫсене пӗрле тума та пире питӗ килӗшетчӗ. Тепӗртакран вӑл старейшина пулса тӑчӗ. Антонио маншӑн тус кӑна мар, лайӑх тӗслӗх те пулчӗ». Анчах та пӗррехинче Федерико ҫылӑхлӑ ӗҫ тунӑ. Вӑл старейшинӑсенчен тӳрех пулӑшу ыйтнӑ пулсан та, малалла пионер тата пулӑшакан ӗҫчен пулса ӗҫлеме юрӑхлӑ пулман. Ҫавӑн хыҫҫӑн Антонио хӑйне мӗнле тытнӑ?

Федерико каласа парать: «Эпӗ Антонио маншӑн мӗн тери пӑшӑрханнине кураттӑм. Вӑл яланах манпа юнашарччӗ тата Турӑпа хам хушӑри туслӑх каллех ҫирӗп пултӑр тесе тӑрӑшатчӗ. Вӑл мана парӑнмасӑр малалла утма хавхалантаратчӗ». Антонио ҫапла калать: «Эпӗ Федерикопа ытларах вӑхӑт ирттерме пуҫларӑм. Манӑн ӑна хӑйӗн чӗринче мӗн пуррине, мӗншӗн чунӗ ыратнине веҫех каласа партарас килетчӗ». Телее, Федерико хӑйпе Иегова хушшинчи хутшӑнусене лайӑхлатса пычӗ, вара вӑл каллех пионер тата пулӑшакан ӗҫчен пулса тӑчӗ. Антонио калать: «Халӗ эпир тӗрлӗ пухусенче, анчах та пирӗн туслӑх тата ҫирӗпрех пулса тӑчӗ».

ХӐВӐРПА СУТӐНЧӐКЛА ХӐТЛАНСАН КАҪАРАЯТӐР-И?

Пулӑшу нихҫанхинчен те ытларах кирлӗ чухне сирӗн ҫывӑх тус ҫурӑмпа ҫаврӑнса тӑрсан эсир хӑвӑра мӗнле туйнӑ пулӑттӑр? Сутӑнчӑкла хӑтланни чӗрене чӑтма ҫук ыраттарать паллах. Эсир хӑвӑр тусна каҫарма тата ӑна унчченхи пекех юратма пултарӑттӑрччӗ-и?

Хӑй виличчен кӑшт маларах Иисус Христоспа мӗн пулса тухни ҫинчен шухӑшласа пӑхӑр-ха. Вӑл хӑйӗн апостолӗсемпе нумай вӑхӑт ирттернӗ, вӗсене «тусӑмсем» тенӗ (Иоанн 15:15). Анчах та ӑна тытса кайсан мӗн пулса тухнӑ-ха? Апостолсем ӑна пӑрахса тарнӑ. Петр хӑйӗн Ҫӳлхуҫине нихӑҫан та хӑвармастӑп тенӗ пулин те, ҫав каҫах Иисусран туннӑ (Матф. 26:31—33, 56, 69—75).

Иисус юлашки тӗрӗслев вӑхӑтӗнче пӗр-пӗччен тӑрса юласси ҫинчен малтанах пӗлнӗ пулин те, вӑл хытӑ куляннӑ, унӑн чӗри питӗ ыратнӑ. Анчах та чӗрӗлсе тӑнӑ хыҫҫӑн темиҫе кунтан Иисус вӗренекенӗсемпе мӗнле калаҫнине пӑхсан, вӑл вӗсем ҫине ҫилленсе, кулянса ҫӳренӗ тесе тата вӗсене шанма пӑрахнӑ тесе калаймӑн. Иисусӑн хӑйӗн вӗренекенӗсен йӑнӑшӗсене шутласа пырас шухӑш пулман, хӑйӗнчен туннине те вӑл асра тытман.

Иисус Петра та, ытти апостолсене те вӗсене унчченхи пекех шанни пирки каланӑ. Вӑл вӗсене историри чи аслӑ вӗрентӳ ӗҫне хутшӑнма каланӑ, ҫавна мӗнле тумаллине те ӑнлантарнӑ. Иисус апостолсемшӗн малалла та тус пулма пӑрахман. Унӑн юратӑвӗ вӗсен чӗрисем ҫине пысӑк витӗм кӳнӗ. Апостолсем хӑйсен Ҫӳлхуҫи умӗнче шанчӑкран тухас марччӗ тесе мӗн тума пултарнине тума яланах тӑрӑшнӑ. Ҫапла вара вӗсем Иисус шанса панӑ ӗҫе ӑнӑҫлӑн туса ҫитернӗ (Ап. ӗҫ. 1:8; Кол. 1:23).

Эльвира ятлӑ тӑван хӑйпе унӑн ҫывӑх тусӗ Джулиана хушшинче мӗн пулса тухни ҫинчен каласа парать: «Эпӗ мӗн туса хуни ун чӗрине ҫав тери ыраттарчӗ тесен, хама питӗ япӑх туйрӑм. Унӑн ман ҫине ҫилленме, паллах, сӑлтав пурччӗ. Анчах та чи малтан вӑл ман ҫинчен тата ман ӗҫсем мӗн патне илсе ҫитерме пултарасси ҫинчен шухӑшланӑ, ҫакӑ мана хытӑ тӗлӗнтерчӗ. Вӑл хӑйне кӳрентерни ҫинчен мар, эпӗ хама мӗнле сиен кӳни ҫинчен ытларах шухӑшланӑшӑн питӗ савӑнатӑп. Эпӗ Иеговӑна ҫакӑн пек тус пурришӗн тав тӑватӑп, мӗншӗн тесен Джулиана ытларах мана лайӑх пултӑр тесе тӑрӑшать».

Апла пулсан, туслӑх хӑрушлӑха кӗрсе ӳксен чӑн-чӑн тус хӑйне мӗнле тытать? Вӑл ӑшшӑн калаҫать, анчах та кирлӗ чухне тӳррӗн те калать. Вӑл Иисус пекех хӑйӗн тусӗсене каҫарма хатӗр, юлташӗ инкеке лексен вара Нафанпа Хусий пекех ӑна шанчӑклӑ тӑрса юлать. Сирӗн пирки эсир те ҫавнашкалах лайӑх тус тесе калама пулать-и?