Ase Hë Akötresie Qaja Ka Hape Tha Tro Kö a Patr La Ihnadro

Celë hi hna qaja hnene la itre ka ithel göne la changement climatique. Maine ka mejiun epun kowe la Atre Xup, hapeu la aqane xup Nyidrë la ihnadro, tha kolo kö lai a amamane la ihnimi Nyidrë kowe la itre atr? Hna xup la ihnadro cememine la atreine troa sipu aporopëne ej.

Ngazo pe, tru menu palaha la aqane angazone la ihnadro hnene la atr. Eloine pe, tha tro kö Akötresie a nuetrije la ihnadro. Pine nemene matre ka xecie lai koi së?

Tro sa ce wang la itre xötre ne la Tusi Hmitrötr hna amë ngöne la hna eköhagen. Itre ej a amamane laka, tha tro kö a patr la ihnadro, nge tro kö ej a lolo hmaca elany.

• Akötresie la ka xup la ihnadro. “Ngöne la qaan, hnei Akötresie hna xup la hnengödrai me ihnadro.”​—Genese 1:​1, NWT

• Akötresie la atrekë ewekën ne la ihnadro. “Ewekë i Iehovaa la ihnadro me nöjei ewekë e hnin, ene la fen me itre ka lapan ej.” —Salamo 24:​1, NWT

• Hnei Akötresie hna xup la ihnadro matre tro ej a cilehut. “Hnei nyidrë hna acil la ihnadro ngöne la itre trepen ej; nge tha tro jë kö a fej qa ngöne la göhnen ej epin, epine palua.”​—Salamo 104:​5, NWT

• Ase hë Akötresie qaja ka hape, tro palahi a hetre ka mel hune la ihnadro. “Atre Xupe la hnengödrai, lo nyipi Akötresie, atre xupe la ihnadro, . . . tha hna xupe menune kö, ngo hnei nyidrëti pe hna xup ej matre troa lapan.”​—Isaia 45:​18, NWT

• Ase hë Akötresie qaja ka hape, tro la itre atr a mele palua hune la ihnadro. “Tro hë la itre ka meköt a lapane la fen, me mele epine palua e cili.”​—Salamo 37:​29, NWT

Hnei Akötresie hna xup la ihnadro nyine loi me thue madrine ne la atr, ngo tha tro kö a angazone ej. Öni Tusi Hmitrötr, hetre ijin hnei Nyidrëti hna sa, matre troa apatrene la itre ka qanangazone la ihnadro.—Hna Amaman 11:18

Öni Tusi Hmitrötr, tro Akötresie a aparadraisone la ihnadro. Tro ej a lolo me mingöming, nge tro Nyidrëti a ‘fe la iwanakoime i nyidrë me kapa la aja ne la nöjei ka mel asë.’​—Salamo 145:​16, NWT