Tus Qaathei Lapa Ne Xomi Meköt

Drei Lai Tusi Hun Koi Nyipunie Itre Trejin, Itretre Anyipici Iehova:

Hnei Paulo aposetolo hna xome la nöjei ijine ka ijij troa qaja la ihnim i angeic, me hni ne ole i angeice kowe la itre trejine me angeic. Ame kowe la itre Keresiano ne Roma, hnei nyidrë hna cinyihan ka hape: “Ini a pane ole koi Akötesingö, jëne Iesu Keriso, göi nyipunie asë ke hlemu hë la lapaune i nyipunie e cailo fen.” (Rom. 1:8) Nyipici, kola hlemu hnene la itre pane Keresiano hnene la aqane catre la lapaune i angatr ngöne la nöjei götrane hna musi ngön hnei Roma ngo loi fe hnene la aqane catr angatr ngön la huliwa ne cainöj. (1 Thes. 1:8) Thaa sesëkötre kö së pine laka, atraqatre la ihnimi Paulo kowe la itre trejine me angeic!

Tui Paulo, eahuni a olene koi Iehova la nöjei ijine eahuni a meku nyipunie. Atraqatre la ihnimi huni koi nyipunie asë! Nge loi e xecie fe koi nyipunie laka Iehova a hnimi nyipunie isa ala caas. Itre xan e nyipunie a qëmeke kowe la icilekeu, ngo nyipunieti pala hi a catre cainöj. Drei la kola amadrinën la hni Iehova la aqane catrei nyipunie me hetre hni ne pë xou!—Ite edomë 27:11.

Kola hamëne hnine la itus Annuaire la hatrene laka, Iesu Keriso Joxu a “tropi kola cate me troa cat,” nge pëkö ketre jia ne isi hna hnëkëne thatraqane la itre ka xötrethenge Keriso ka troa ie.—Hna ama. 6:2; Is. 54:17.

Hnei Paulo hna cinyihane kowe la itre Keresiano ne Filipi ka hape: “Ini a olene koi Akötesingö . . . ke ce hni nyipunie ngöne la maca ka loi.” (Fil. 1:3-5) Celë hi la mekuna hun, itre atrene la Lapa Ne Xomi Meköt, göi nyipunie. Ame lo macatre ne huliwa 2007, 6 691 790 lao ka cainöj, nge 1 431 761 554 lao hawa hna kuca ngöne la huliwa ne cainöjëne la maca ka loi ngöne la 236 lao nöje e cailo fen. Drei la aqane catrei nyipunie tro pala hi a cainöjëne la maca ka loi! Pane mekune jë la itre hadredr me thauzane lao atr hna kete la ite hni angatr jëne la trenge catre së asë, nge nyine troa atrunyi Iehova!

Ame ngöne la ketre ijin, hnei Paulo hna amamane la ihnimi angeice kowe la itre trejine me angeic. Hnei angeice hna cinyihane kowe la itre Keresiano ne Thesalonika ka hape: “Nge tha mano kö huni mekune . . . la xomi hni ngöne la mejiune koi Joxu shë Iesu Keriso, xajawa i Akötesieti Keme shë.” (1 Thes. 1:2, 3) Nyipici, tru catre la ejolene la mel. Kolo pala hi a elë trootro la itre jole hne së hna cile kow, ngo nyipi ewekë catre tro sa xomihni ahoeany. Nemene la itre jole hnei nyipunieti isa ala caas hna qëmeke kow? Nyipunie a kucakuca pine la ketre meci ka eje thei epuni, nge ka nyi ifegone hi la hnei epuni hna atreine troa kuca ngöne la huliwa i Iehova? Hapeu, nyimu macatre hë ne paatre la föi nyipunie, lo hnimina i nyipunie hna thapa hnene la ithupëjia ka thaa meji kö, ene la mec? (Ite edomë 30:15, 16) Nyipunieti pala hi a thele la föe ka troa ce mele me nyipunie me hnimi nyipunie, nge nyipunieti kö a catre fedre kowe la eamo qa hnine la Tusi Hmitrötre, ene la troa faipoipo hmekuje hi thei Joxu? (1 Kor. 7:39) Nyipunieti kö a catre troa hiane la itre nekö i nyipunie ngacama tru catre la itre ejolene göi mani? Ngacama nyipunie a cile kowe la itre jole ka nyimutre, ngo e hnei nyipunie hna catre troa amë panëne la itre ewekë ne la Baselaia, loi e xecie koi nyipunie laka, thaa tro kö Iehova a “thëthëhmine la huliwa i nyipunie, memine la ihnimi hnei nyipunie hna amamane kowe la atesiwa i nyidë,” Eahuni a sipon iele nyipunie, trejine trahmanyi me itre trejine föe, “the kucakuca kö shë ngöne la huliwa ka loi”!—Heb. 6:10; Gal. 6:9.

Nemene la ka troa xatua nyipunie troa xomihni ahoeany? Ame kowe la itre Keresiano ne Thesalonika, tre, ene la “mejiune koi Joxu shë Iesu Keriso.” Celë hi kepine ka lolo matre aceitunënejë hi hnei Paulo la “mejiune la mel” me itrapetr ka catr, ka troa thupëne la ketre Keresiano qa ngöne la aqane mekune ka iajojezi, me itre luelue hna lapa fë.—1 Thes. 5:8.

Nyipici, maine tro nyipunieti a xomihni ahoeany cememine la madrin, nyipunieti hi lai a sa lo trenga thoi i Satana göne lo jole ka tru, ene la musi cile e hnengödrai me e celë fen. Satana a uune ka hape, ame la itre hlue i Akötresie, tre, itre ka pane sipu meku angatre kö, ke atre hi angatre laka, thaa hmitre pe kö la pune la fene celë, ene pe angatre a sipu nyihlue i Akötresie, ngo e catrehnine hë elanyi la itre itupath, tre kösë thaa mekune kö angatre laka troa qea menu pala ha la pun, nge tro hë angatre a nanazije ngöne la huliwa i Iehova. Drei la ketre hnëqa ka sisitria hna aijijë epuni troa amamane koi Satana ka hape, ketre atre thoi angeic hna methinën! Ame ngöne la nöjei drai ne la mele së, tre, easë pala hi a easenyi trootro kowe la ijine troa eatrëne la mejiune së.

Tui Paulo, hnei angeice hna xome la itre ijine ka ijij troa qaja aloine la itre trejine me angeice hnene la aqane catre la lapaune i angatr, me aqane hamëne angatre la trenge catre i angatre me ewekë i angatre kowe la huliwa ne cainöj, memine fe la aqane xomihni ahoeanyi angatr, celë hi matre eahuni fe a xome la ijine celë troa qaja aloinyi nyipunie, me anyipicine la ihnimi huni koi nyipunie. Catre jë troa kuca la huliwa ka loi!

Epi troa elitrauje la macatre ka troa xulu hnene la itre manathith ngöne la ua. Atraqatre la aja huni tro nyipunie a catr me kepe manathith

Itre trejine me nyipunie,

Lapa Ne Xomi Meköt Ne La Itretre Anyipici Iehova