Hapeu, Hetre Ewekë Hne Së Hna Thele Troa Traqa Kow?
1 Nyimutre la itre mekune hnei Iehova hna troa eatrën. (Is. 55:10, 11) Kola ithuecatre koi së troa xötrethenge la tulu i Nyidrë. (Efe. 5:1) Troa mama hnyawa lai ngöne la aqane xome së la huliwa ne cainöje së. Qa ngöne lai, nyipi ewekë tro së a isa thele ka hape: “Hetre ewekë kö hne së hna hane thele troa traqa kö?”
2 Nyipici, pine laka, hetre hni ne ajane së troa xome la huliwa ne cainöj, haawe, easë a thele troa eatrëne la nöjei götrane la huliwa cili, ene la troa cainöje ngöne itre hnalapa trootro, me troa cainöje ngöne la nöjei ijin, me troa tro fë la itre itusi së. Ngo loi e tro pala hi së a mekune hnyawa ka hape, ame la hnëqa së, ke thaa ene hmekuje kö la troa cainöj, ngo tro fe a inine la itre atr. (Mat. 28:19, 20) Thupene la hna traane la itre itine nyipici, nyipi ewekë troa bëeke hmaca troa fi itre ej, me nyihnyawane pala hi itre ej, nge hetrenyi the së la mejiune laka, tro Iehova a aciane itre ej. (1 Kor. 3:6) Nyipi ewekë tro pala hi së a bëeke troa iwai hmaca, me nyiqaane troa inine la Tusi Hmitrötre memine la itre atr.
3 Loi e Tro Së a Akökötrene La Huliwa Së: Thaa sihngödri kö la madrine së nge lapa hnyawa la mekune së, ngöne la easë a goeëne hmaca la ewekë hne së hna kuca ha ngöne la huliwa ne cainöj, nge easë a ketre qaja e kuhu hni së ka hape: “Ase hë ni kuca la ewekë hnenge hna mekune troa kuca.” Tune la hna cinyihane ngöne 2 Timoteo 4:5, hnei Paulo hna ithuecatre me hape: “Kuca asë jë la qâ i ö.” Kola qaja fe la pengöne la trenge catre hne së hna kuca, matre troa wange hnyawa pala hi la itre atr ka ajane troa drei së. Celë hi matre loi e troa eje ngöne la porogarame ne cainöj hne së hna hnëkëne thatraqane la nöjei wiik, la ketre ijine hna troa xome matre troa iwai hmaca. Loi e tro së a huliwa mekune laka, easë a thele troa nyiqaane inine la Tusi Hmitrötre memine la itre atr ka hetre hni ka menyik. Celë hi ewekë lai hne së hna ajane troa eatrën, ngöne la easë a cainöje trootro.
4 Hnyingëne jë kowe la itre trejine la mekune i angatr, ngöne la angatre a öhne la kola xome la bapataiso hnene la itre atr hnei angatre hna ini tusi memin, ngöne la ketre ijine asabele. Maine jë tru catre kö la hnei angatre hna madrine hune lo lai itre ka xome la bapataiso. Haawe, angatre hi lai a eatrëne la ketre mekune ka tru! Celë hi matre hna qaja hnene la ketre ka ini, ka hape: “Pine laka, kola tru pala hi la itre atr hne së hna inin, haawe, ketre kola kökötre pala fe la etrune la itre ka atrune la ëje i Iehova. Ame koi itre ka kapa la nyipici, ke jëne mele hi lai koi angatr. Ajange troa inine la nyipici kowe la itre atr—huliwa ka lolo catr! . . . Ala nyimu catre angatr, itre enehmunge enehila, ene lo itre atr ka atre Iehova me amamane la ihnimi angatre koi Nyidrë.”
5 Hapeue fe e hane jë së xatuane la ketre atr, troa hane nue la mele i angeice troa nyihluei Iehova! Drei kö la ketre madrine ka tru koi së! Celë hi ketre thangane lai ka lolo hne së hna kapa, qa ngöne la hna huliwa mekune la ketre ewekë nyine troa eatrëne ngöne la hna cainöje trootro.—Kol. 4:17.