Thele Jë Troa Xome Hnyawa La Traeme i Epuni Ngöne La Huliwa Ne Cainöj
1 Nyipici laka, nyimutre la itre ewekë nyine kuca ngöne la huliwa ne cainöje së, nge xoxopatre hi la traem. (Ioane 4:35; 1 Kor. 7:29) Maine tro sa eköthe hnyawa la huliwa së, me canga hnëkë, ijije hi tro sa xome hnyawa la traeme hne së hna amë hë thatraqane la huliwa ne cainöj.
2 Loi e Tro Sa Hnëkë Hnyawa: Qëmekene troa tro kowe la icasikeu göi cainöje trootro, loi e xecie koi epuni laka, hetre itusi epuni nyine tro fë, me hneheene hnyawa la aqane nyiqaane ithanata hnei epuni hna hnëkën. Ame la kola ase la icasikeu hnene la thith, tro meköti jë hë kowe la teritoar. Tro lai a aijijë epuni me itre sine ce tro i epuni troa eatrëne la itre huliwa hnei epuni hna atrein kuca, ngöne la traeme hna xome thatraqane la huliwa ne cainöj.
3 Maine hna upi epuni troa xomiujine la icasikeu göi cainöje trootro, nyiqaane jë ngöne la hawa hna sa. The aqeane kö—thaa tro kö a sasaithe la 10 koi 15 menetr. Qëmekene troa isa ije hnene la itre trejin, loi e xecie koi epuni laka, isa atre hnyawa hi la itre ka tro troa cainöj la götrane hnei angatr hna troa cainöj ngön, me isa sine tronge i angatr.
4 Ngöne La Epuni a Cainöje Trootro: Ame la kola ase la icasikeu göi cainöje trootro, the hmitre menu kö, ngo tro meköti jë hë kowe la teritoar. Maine epuni a mekune troa canga fenes, loi e tro epuni a ketre sipu wai ka itrothei, matre thaa tro kö a ajolëne la itre xaa trejine ka cainöje pe ngöne la teritoar. Ame ngöne la kola ce cainöje me itre xaa trejin, loi e troa wanga atrunyi angatr, ke angatre a treqene la epuni a ase porotrik. Kolo lai a hape, troa hni ka menyik me atreine nyipune la porotrike së memine la ketre atr ka isi ithanata, maine pena troa isa pui matre troa wange hmaca la ketre atr ka hni ka ajan.—Mat. 10:11.
5 Ame ngöne la kola kuci vizit, thaa nyipi loi kö e troa canga kuca la itre ka lapa easenyi së, nge tro pi pë hë kowe la ketre götran. Loi e tro sa pane hë ngöne telefon kowe la itre xaa vizit matre troa xecie koi së ka hape, angatre hi ngöne la hnalapa i angatr. (Ite edomë 21:5) Maine epuni a mekune laka, epuni a troa lapa aqeanyi thene la ketre vizit, loi e tro la itre xaa trejin ne la gurup a thele matre tro angatr a cainöje easenyine lai uma, maine tro pena a kuca la ketre vizit.
6 Easa melëne la ketre ijine menue ka sisitria ngöne la götrane la ua. (Mat. 9:37, 38) Easenyi hë matre nyipune pi la huliwa. Qa ngöne lai, loi e eje the së la aja troa xome hnyawa la traeme së ngöne la easa xome la huliwa ne cainöj.