AWTIK POU ÉTIDIÉ 19
KANTIK 6 « Sièl-la ka gloriyé Jéova »
Annou imité sé zanj fidèl la
« Gloriyé Jéova, zòt, tout zanj-li » (SÒM 103:20).
MI SA NOU KÉ WÈ
Nou ké wè kisa sé zanj fidèl la ka aprann nou.
1-2. a) Kisa ka fè nou diféran sé zanj-lan ? b) Kisa ka fè nou ka sanm sé zanj-lan ?
KONM nou sé pèp Jéova, nou adan an fanmi ki ni lanmou é ki ka adoré’y. Adan fanmi-tala, i ni frè é sè-nou asou tout latè, men osi milion zanj fidèl adan sièl-la (Dan. 7:9, 10). Lè nou ka sonjé sé zanj-lan, sa ki ka vini an tèt-nou, sé ki yo pa kon nou piès. É pou vré, yo fèt lontan avan lézòm (Jòb 38:4, 7). Yo lontan pli fò ki nou. É davwè nou pa pawfé, nou pé pa toutafètman sen kon yo é atenn menm nivo jistis ki yo (Lik 9:26).
2 Men nou kanmenm ni an patjé bagay ka fè nou ka sanm sé zanj-lan. Kon yo, nou pé imité kalité Jéova é nou ni libèté chwézi. Kon yo, nou chak la ni an non, é an pèrsonalité. Kon yo, nou ni diféran rèsponsabilité adan lòwganizasion Jéova-a. É kon yo, nou bizwen adoré Kréyatè-nou (1 Piè 1:12).
3. Kisa sé zanj-lan ka aprann nou ?
3 Davwè nou ka sanm sé zanj-lan adan pliziè domenn, lègzanp yo pé ankourajé nou, é nou pé aprann anpil épi yo. Adan awtik-tala, nou ké wè pliziè lison sé zanj-lan ka aprann nou. Nou ké wè ki manniè nou pé imité limilité-yo, lanmou-yo ba lézòm, landirans-yo épi éfò yo ka fè pou endé lasanblé-a rété pwòp.
SÉ ZANJ-LAN NI LIMILITÉ
4. a) Kisa ka fè nou di sé zanj-lan ni limilité ? b) Poutji sé zanj-lan ni an gran limilité konsa ? (Sòm 89:7).
4 Sé zanj fidèl la ni limilité. Yo ka obéyi dirèksion Jéova ka ba yo, menmsi yo puisan, yo ni sajès, épi yo ni an patjé lèspérians (Sòm 103:20). Lè Jéova ka ba yo an travay pou fè, janmen yo pa ka vanté kòyo, é yo pa ka itilizé pouvwa yo ni pou mété kòyo douvan. Yo kontan fè tousa Jéova ka mandé yo, menmsi pèsonn pa konnèt non-yoa (Jén. 32:24, 29 ; 2 Wa 19:35). Anplis, yo ka rifizé pran laglwa ki ta Jéova. Kisa ka fè yo ni gran limilité-tala ? Pas yo enmen Jéova é yo ni an gran rèspé ba’y (li Sòm 89:7).
5. Ki manniè an zanj montré i té ni limilité lè i korijé manniè wè Jan ? (gadé zimaj-la osi).
5 Annou palé di an épizòd adan Labib ka montré ki sé zanj-lan ni limilité. Pa koté lanné 96 apré Jézikri, an zanj ba lapòt Jan an vizion, men nou pa konnèt non zanj-tala (Rév. 1:1). Ki manniè Jan réyaji douvan vizion-tala ? I jété kòy atè pou adoré zanj-lan. Men zanj fidèl-tala frennen’y lamenm épi i di’y : « Prangad ! Pa fè sa piès ! Man sé an èsklav kon wou menm, kon sé frè’w la […]. Adoré Bondié ! » (Rév. 19:10). Mi an zanj ki té vréman ni limilité ! I pa té ka chèché yo pòté’y anlè. Lamenm i di Jan, lonnè-a sé ta Jéova. Men, i pa méprizé lapòt Jan non pli. I té ka sèvi Jéova dépi pli lontan ki Jan é i té ni plis lafòs ki’y. Men, épi limilité i di, i sé an èsklav Bondié kon li menm. É menmsi i té oblijé korijé manniè wè Jan, i pa fè sa an manniè blip, i palé ba’y épi bonté. Zanj-lan konprann, ki Jan jété kòy atè pas i té rété ababa douvan sa i té wè a.
Zanj-lan palé ba Jan épi limilité (gadé paragraf 5-lan).
6. Koumanniè nou pé imité limilité sé zanj-lan ?
6 Koumanniè nou pé imité limilité sé zanj-lan ? Kon yo, nou lé travay rèd adan sèvis Jéova-a san vanté kònou parapòt a sa nou ka fè, ni fè konsi nou ni kapasité èspésial (1 Kor. 4:7). Anplis, fòk pa nou pansé nou pli wo pasé lézòt, menmsi nou ka sèvi Jéova dépi pli lontan ki yo, ouben pas yo ba nou tjèk rèsponsabilité. Anfèt, pli nou ni rèsponsabilité, sé pli nou pou wè kònou ‘toupiti’ (Lik 9:48). Kon sé zanj-lan, nou lé sèvi lézòt, pito ki mété kònou douvan.
7. Koumanniè nou ka montré nou ni limilité lè nou ka konséyé oben korijé an moun ?
7 Fòk nou montré nou ni limilité osi, lè nou ka konséyé oben korijé an moun. Moun-tala pé an frè ouben an sè adan lasanblé-a, ouben yich-nou. Délè, konsèy-la ouben disiplin-lan nou ké ba kèy fwanch épi dirèk. Men toukon zanj-lan korijé Jan épi bonté, nou pé korijé an moun épi fwanchiz, san pou otan i santi nou ka krazé’y. Si nou pa ka pansé nou méyè pasé lézòt, nou ké ba konsèy ki ka vini di Labib épi rèspé èk konpasion (Kol. 4:6).
SÉ ZANJ-LAN ENMEN LÉZÒM
8. a) Koumanniè Lik 15:10 ka montré ki sé zanj-lan enmen lézòm ? b) Ki rèsponsabilité sé zanj-lan ni adan aktivité prédikasion-an ? (gadé zimaj-la osi).
8 Sa lézòm ka fè ka entérésé sé zanj-lan anpil. Yo enmen lézòm. Yo kontan menm lè an moun ki péché ka ripanti kòy, sa lé di, lè an ti mouton ki garé ka viré bò Jéova ouben lè an moun ka fè chanjman adan lavi’y pou sèvi’y (li Lik 15:10). Anplis, yo ka ba kòyo anpil pou soutienn travay prédikasion-an (Rév. 14:6). Menmsi yo pa ka vini préché ba sé moun-lan yo menm, yo pé djidé an pwoklamatè pou endé an moun ki lé aprann konnèt Jéova. Men avrédi, nou pé pa afirmé ki sé zanj-lan ka dirijé nou chak lè-a, pou préché ba an moun. Pas pou vré, Jéova pé endé an moun ouben djidé sèvitè’y dòt manniè ankò, kontèl, épi lèspri sen’y (Akt 16:6, 7). Men nou pé di kanmenm, ki bien souvan, i ka sèvi sé zanj-lan, pou endé nou lè nou ka préché. Kidonk, nou pé asiré senten ki lè nou ka préché bon nouvèl-la, sé zanj-lan la pou ba nou fòs-la (gadé kad-la « Bondié tann lapriyè-yob »).
An koup fini fè prézantwè. Lè yo ka rantré kay-yo, sè-a ka rimatjé an madanm ki tou tris. I ka santi fòk i palé ba’y pou konsolé’y, pas i sav ki sé zanj-lan pé dirijé nou pou palé ba sé moun-lan ki ka chèché lavérité (gadé paragraf 8-la).
9. Ki manniè nou pé imité lanmou sé zanj-lan ba lézòm ?
9 Ki manniè nou pé imité lanmou sé zanj-lan ba lézòm ? Lè nou aprann yo asèpté an moun viré adan lasanblé-a, fòk nou kontan kon sé zanj-lan. Annou akéyi’y épi chalè, épi annou fè’y santi nou enmen’y (Lik 15:4-7 ; 2 Kor. 2:6-8). Nou ké imité osi sé zanj-lan si nou ka fè tousa nou pé adan aktivité prédikasion-an (Ékl. 11:6). É, toukon sé zanj-lan ka soutienn nou pou préché bon nouvèl-la, annou chèché solision pou soutni frè é sè-nou lè yo ka préché. Pa ègzanp, ès nou pé pa endé an pwoklamatè ki fini koumansé préché ? Ouben, ès nou pé pa fè mannèv pou ba frè é sè ki ajé ouben andikapé laposibilité préché ?
10. Kisa lègzanp Sara ka aprann nou ?
10 É si sitiyasion-nou pa ka pèwmèt nou fè otan nou sé voudré ba Jéova ? Magré sa, nou pé touvé solision pou travay kantékant épi sé zanj-lan adan ministè-a. Annou palé di Sarac, an sè ka viv pa koté Lend. Sa té ka fè ventan i té pionié lè i tonbé malad. Malérèzman, i pa té pé maché ankò, kifè, toulong i té kouché anlè kabann-li. O dépa, nou pé konprann sa, sè-nou té déprimé anpil. Men konm i té ni lanmou fanmi èspiritièl li épi i té ka li Labib touléjou, piti a piti i ritouvé lajwa’y. Sa vré, i té pou touvé nouvo manniè pou préché. Anplis, i pa té pé asiz pou préché pa lèt. I té pé sèlman préché pa téléfòn. Kidonk, i kontinié fè sé ti kozé-a pa téléfòn, é sé moun-lan ba’y niméwo dòt moun ki pétèt té ké lé étidié Labib. Ki rézilta i trapé ? Kèk mwa apré, i koumansé 70 létid Labib, vréman plis ki sa i té pé fè ! Kidonk, i ba moun adan lasanblé’y la yonn-dé létid. Pami tout sé moun-tala ki koumansé étidié Labib, anlo ka vini réyinion jòdi-a. Sé pa ti kontan sé zanj-lan kontan, travay kantékant épi frè é sè ka fè tousa yo pé adan ministè-a kon Sara !
SÉ ZANJ-LAN NI LANDIRANS
11. Poutji nou pé di ki sé zanj fidèl la, sé dé bèl lègzanp landirans ba nou ?
11 Sé zanj fidèl la sé dé bèl lègzanp landirans ba nou. Sa ka fè milié lanné, yo ka wè ouben yo ka sibi lenjistis épi méchansté. Yo wè Satan, épi an patjé dòt zanj ki té ka sèvi Jéova épi yo, viré do ba’y (Jén. 3:1 ; 6:1, 2 ; Jid 6). Labib ka rakonté nou, ki manniè an démon puisan opozé kòy épi raj a an zanj ki té fidèl (Dan. 10:13). É anfinaldikont, dépi lòm anlè latè, sé zanj-lan wè sèlman an tizizing nonm ki chwézi sèvi Jéova. Magré tousa, yo ka kontinié sèvi Jéova épi lajwa èk balan. Yo asiré senten, ki lè lè-a kèy rivé, Jéova kèy fè tout lenjistis disparèt.
12. Kisa ki pé endé nou tjenbé ?
12 Koumanniè nou pé imité landirans sé zanj-lan ? Pétèt, kon sé zanj-lan, nou ka wè douvan zié-nou lenjistis ouben nou ka jwenn lopozision. Men kon yo osi, nou asiré senten ki Jéova kèy tiré laméchansté. Sé poutji, kon yo, nou pa ka « sispann fè sa ki bien » (Gal. 6:9). Anplis di sa, Jéova ka pwonmèt endé nou tjenbé (1 Kor. 10:13). Kidonk, annou mandé’y lèspri sen’y. Pou vré, gras a lèspri sen’y, nou pé ni plis pasians épi lajwa (Gal. 5:22 ; Kol. 1:11). É si nou ka jwenn lopozision, fòk nou fè Jéova konfians épi tout tjè-nou, é fòk pa nou pè. I ké toujou soutienn nou é ba nou lafòs (Ébré 13:6).
SÉ ZANJ-LAN KA TRAVAY POU LASANBLÉ-A RÉTÉ PWÒP
13. Ki gwo mision sé zanj-lan pou akonpli pandan sé dènié jou-a ? (Matié 13:47-49).
13 Jéova ba sé zanj-lan an mision enpòwtan pou yo akonpli pandan sé dènié jou-a (li Matié 13:47-49). Aktivité prédikasion-an ka sanblé milion moun. I ni adan ka vini dé vré krétjen épi dòt non. Mision sé zanj-lan sé ‘séparé sé méchan-an épi sé jis-la’. Kidonk, fòk yo fè pa ta yo pou lasanblé-a rété pwòp. Sa pa lé di, pé ké janmen ni pwoblèm adan lasanblé-a. Sa pa lé di non pli, ki sé moun-lan ki sispann frékanté lasanblé-a pou kisiswa rézon-an, pé kèy pé viré. Men antouléka, an bagay nou sèten, sé ki sé zanj-lan ka travay rèd pou sé lasanblé-a rété pwòp.
14-15. Koumanniè nou pé imité sé zanj-lan pou lasanblé-a rété pwòp adan domenn èspiritièl épi moral ? (gadé zimaj-la osi).
14 Koumanniè nou pé imité sé zanj-lan pou lasanblé-a rété pwòp ? Sé lè nou chak la ka fè pa ta nou pou sanblé-a rété pwòp adan domenn èspiritièl épi moral. Pou koumansé, annou fè tousa ki fo pou pwotéjé tjè-nou. Pou rivé fè sa, annou chwézi zanmi ki enmen Jéova, épi annou pa fè ayen ki sé pé krazé lanmitié-nou épi’y (Sòm 101:3). Annou fè éfò osi, pou endé frè èk sè-nou rété fidèl a Jéova. Pa ègzanp, kisa fòk nou fè, si nou vini aprann an frè ouben an sè konmèt an péché ki grav ? Pas nou enmen’y, nou ké ankourajé ay wè sé ansien-an. É si i pa ka fè’y, fòk nou menm ay wè sé ansien-an pou di yo sa ki pasé. Sa nou lé, sé ki tout krétjen ki fébli èspiritièlman risivwè pal-la yo bizwen an, é sa, san pèd tan ! (Jak 5:14, 15).
15 Malérèzman, yonn-dé fè péché ki grav é fòk tiré yo adan lasanblé-a. Nou ka obéyi koumandman Labib-la ki ka mandé nou « sispann frékanté [yo] »d (1 Kor. 5:9-13). Tiré an moun ki péché adan lasanblé-a, sé an dispozision ka endé lasanblé-a rété pwòp. Anplis, lè nou ka désidé pa frékanté sé moun-lan yo tiré adan lasanblé-a, pou vré, sé konsa nou ka montré nou lé fè yo dibien. Si nou ka rété asou pozision-nou, sa pé endé yo ritouvé bon sans-yo. É lè yo ka viré bò Jéova, nou kontan, menm manniè ki Jéova épi sé zanj-lan (Lik 15:7).
Kisa pou fè si nou sav an frè ouben an sè-nou konmèt an péché ki grave ? (gadé paragraf 14-la).
16. Ki kalité sé zanj-lan ou té ké enmen imité ?
16 Mi bèl privilèj nou ni, konnèt tibren sa ka pasé adan sièl-la, épi travay kantékant épi sé zanj-lan ! Annou imité kalité-yo, kontèl, limilité-yo, lanmou-yo ba lézòm, landirans-yo, épi éfò yo ka fè pou endé lasanblé-a rété pwòp adan domenn èspiritièl épi moral. Si nou ka imité sé zanj fidèl la, asiré nou ké toujou rété adan fanmi sèvitè Jéova pou létèrnité.
KANTIK 123 Nou soumi a latéokrasi
a I ni milion épi milion zanj, men Labib-la ka ba nou non 2 zanj sèlman : Michèl épi Gabriyèl (Dan. 12:1 ; Lik 1:19).
b Ou ké touvé dòt témwayaj adan Index des publications des Témoins de Jéhovah, an fwansé, adan ribrik-la « direction angélique (exemples) », apré sa chèché mo-a « Anges ».
c Nou chanjé non-an.
d Kon Aktialité no 2 Komité santral-la (2024) ka èsplitjé, sé chak pwoklamatè ki ka désidé annakò épi konsians-li fòwmé asou Bib-la, si i ké di an ti bonjou épi swété labienvini, an moun yo tiré adan lasanblé-a ki vini lasal.
e DÉ-TWA MO ASOU SÉ ZIMAJ-LA : An sè ka ankourajé an zanmi alé palé ba sé ansien-an. Titak tan apré, davwè zanmi’y pa alé wè sé ansien-an, sé-a ka alé wè yo li menm, pou di yo sa ki pasé.