Kinaan te Taromauri Ae Koaua

A TAKU angiin Aaro bwa a tataekina ana taeka te Atua. Ngaia are ti riai ni mutiakin ana taeka Iesu aika koreaki iroun te abotoro Ioane aikai: “Ngkami aika kam tangiraki, kam na tai iri nanoia tamnei ni kabaneia, ma kam na kataiia tamnei ba tao mairoun te Atua ke tiaki: ba a bati burabeti ni kewe aika oti nako nako aonaba.” (1 Ioane 4:1) Ti na kanga n tuoa te bwai teuana bwa ti aonga n ataia bwa e roko mairoun te Atua, ke e aki?

A kaotiota aroaron te Atua bwaai ni kabane aika roko mairouna, ao e a moamoa riki bon aroarona ae moan te kakawaki ae te tangira. N te katoto, arora n aroboi, are ti a kona n aroka iai boiararan aroka, uee ke te kariki ae e a tibwa mwai, boni kaotan ana tangira te Atua. E kona naba ni kaotiotaki ana tangira te Atua man arora ni kona n nora bungintaai, te man ae te bwebwe ke moangaren te ataei ae uarereke. Ao ai uana naba ma arora ni kona n ongoraea te katangitang ae tangiraoi, tangitangia mannikiba, ke bwanaan ae tangiraki iroura. Karikara bwa aomata ngaira e ngae naba ngkai ti aki kororaoi, e kaotiotaki naba iai ana tangira te Atua. Ao anne bukina ngkai ti aki toki n nora koauan ana taeka Iesu aikai: “E kakabaia riki te anga nakon te anganaki.” (Mwakuri 20:35) Ti kukurei ni kaota ara tangira ibukina bwa ti karikaki ‘bwa katotongan te Atua.’ (Karikani Bwaai 1:27) E ngae ngke a mwaiti riki aroaron Iehova, ma moan te rianako riki mai buakoia te tangira.

E riai naba ni kaotiotaki ana tangira te Atua ni koroboki aika roko mairouna. A mwaiti koroboki rimoa man Aaro n te aonnaba. Tera aron nakoraoin koroboki aikai ni kaineti ma kaotiotan ana tangira te Atua?

Ni koauana, e karako kabwarabwaran aron tangirara iroun te Atua ke arora ni kona n tangiria, ni kiibu rimoa man angiia Aaro. Mangaia are akea kaekan aia titiraki aomata aika mirion ma mirion ae kangai: “Bukin tera bwa ti nora ana tangira te Atua n ana karikibwai, ma te rawawata ao te buakaka ae boni waaki nako naba?” N te itera are teuana, te Baibara bon tii ngaia te koroboki man Aaro ake rimoa ae kona ni kabwarabwaraa raoi ana tangira te Atua. E reireinira naba arora ni kaotiota te tangira.

Te Boki ae Taekina te Tangira

E kaotaki n Ana Taeka te Atua ae te Baibara, bwa Iehova bon “te Atua are e reke mai Rouna te tangira.” (2 I-Korinto 13:11) E kabwarabwaraki n te Baibara aron Iehova ni kainaaomataia te moan taanga man te aoraki ao te mate, ibukin ana tangira. Ma te karitei nakoni mwaakan te Atua n tautaeka, e a karekea te karawawataki nakon te botannaomata. (Te Tua-Kaua 32:4, 5; I-Rom 5:12) E mwakuri Iehova ibukin manga kaokan te baere e bua. E kangai Ana Taeka te Atua: “E tangiriia aomata te Atua n te aro are E anga Natina ae te riki-temanna iai, ba e aonga n aki mate ane onimakinna, ma e na reke i rouna te maiu are aki toki.” (Ioane 3:16) E kamatataaki riki ana tangira te Atua n te Baibara ngke e a manga kabwarabwaraki aron te Atua ni katauraoa te tautaeka ae kororaoi are e na kairaki iroun Iesu, ike e nang kaokaki iai te raoi nakon te botannaomata ae ongeaba.​—Taniera 7:13, 14; 2 Betero 3:13.

E katiteuanai mwiokoan te aomata te Baibara n taeka aikai: “Ko na tangira Iehova ae Atuam n nanom ni kabanea, ao n tamneim ni kabanea, ao ni wanawanam ni kabanea. Mooa te tua aei, ao e korakora. Ao ai aron naba are te kauoua, are kangai, Ko na tangira raom n ai aron tangiram i bon i roum. E bane te Tua . . . n tauraki n tuua aika uoua aikai.” (Mataio 22:37-​40) E taekinaki n te Baibara bwa a kairaki korean koroboki aikai iroun te Atua. Kioina ngkai e teretere bwa a kaotiotaki i nanona aroarona, ti a kakoauaa raoi iai ngkanne bwa e bon roko mairoun “te Atua are e reke mai Rouna te tangira.”​—2 Timoteo 3:16.

Ngkana ti ira te kaetieti aei, ti a kona iai ni kinaa te koroboki rimoa ae roko mairoun te Atua. A kinaaki naba taan taromauria raoi te Atua ni kaotiotan aia tangira, ibukina bwa a katotonga te Atua ni kaotiotan te tangira.

Aron Kinaakia Aomata Aika Tangira te Atua

A rangi ni kai kinaaki te koraki ake a tangira te Atua ma nanoia ni koaua, ao e a moamoa riki ngkai ti a mena n taai ake e aranna te Baibara bwa “boong aika kaitira.” A a rikirake aomata bwa taan “tangiriia i bon i rouia, taani kani manemane, . . . taan tangira riki te maie nakon te Atua.”​—2 Timoteo 3:1-4.

Ko na kanga ni kinaia aomata aika tangira te Atua? E taku te Baibara: “Bon tangiran te Atua te baei, ae tauan ana tua i roura.” (1 Ioane 5:3) A kairaki aomata n tangiran te Atua bwa a na ongeaba nakon ana kaetieti te Baibara, ni kaineti ma te aroaro ni maiu ae riai. N te katoto, iai n Ana Taeka te Atua tuua ni kaineti ma te wene n taanga ao te mare. E kariaiakaki te wene n taanga tii irouia aika mareaki, ao e na teimatoa te mare. (Mataio 19:9; Ebera 13:4) E taku temanna te aine i Tibein ae reiakina taekan te Aro are e kaea aia botaki Ana Tia Kakoaua Iehova are e reiakinaki iai ana tua te Baibara ni kaineti ma te aroaro ni maiu ae riai: “I kitana te botaki ma te ungannano, tiaki tii ibukin kabwarabwara man te Baibara aika mataata, ma man te katiteuanaki are I noria ibuakoia aomata aikai, aroaroia aika moan raraoi ao kateiia aika tamaroa.”

Irarikin tangiran te Atua irouia, a rangi ni kai kinaaki Kristian ni koaua n aroaroia ni kaotiota tangiraia raoia. Aia mwakuri ae moan te kakawaki, bon tataekinan te kaantaninga ae raoiroi ibukin te botannaomata, ae ana Tautaeka n Uea te Atua. (Mataio 24:14) Akea riki te bwai ae kona ni karekea kakabwaiaaia raoraoia nakon buokaia bwa a na karekea ataakin te Atua. (Ioane 17:3) A kaotiota naba aia tangira Kristian ni koaua n aaro riki tabeua. A karababaa nako aia ibuobuoki nakoia ake a karawawataki. N te katoto, ngke e riki te kabuanibwai man te mwaeiei i Itare, e taekinaki n te nuutibeeba teuana rongorongoia Ana Tia Kakoaua Iehova bwa a “karaoi mwakuri aika manena ao ni karababa nako aia ibuobuoki nakoia aomata ake a karawawataki, n aki ongeia bwa tera aia Aaro.”

Irarikin tangiran te Atua ao raoraoia, a itangitangiri naba i marenaia Kristian ni koaua. E taku Iesu: “I anganingkami te tua nabangkai, ba kam na i tangitangiri; n ai arou ngke I tangiringkami, ba kam na i tangitangiri naba. Ane a na ataingkami aomata ni kabaneia ba au reirei ngkami n aei, ngkana kam i tangitangiri.”​—Ioane 13:34, 35.

Te koaua bwa e kai noraki kaokoron aia itangitangiri Kristian ni koaua? E kakoauaa aei temanna te tia kaitiaki n te auti ae arana Ema. E mwakuri neiei n te tabo ae La Paz, i Bolivia, ae n angiin te tai aomata aika kaubwai iai, boni kaain te reeti teuana ao aomata aika raarikin kaain te reeti are teuana. E taku neiei: “I nora te mwaane ae kaubwai n tekateka ni maroro ma te aine ae kaain Inria n au moantai n ira aia botaki Ana Tia Kakoaua Iehova. I tuai n nora aei mai imwaina. Man te tai anne, ao I a ataia ae bon ana aomata te Atua te koraki aikai.” N aron naba anne, e taku temanna te ateiaine ae kaain Brazil ae Miriam: “I aki ataia bwa tera arou ae N na kukurei iai, ao I aki ataa aron karekean te kukurei naba n au utu. Te moantai are I a nora iai te tangira ae kaotiotaki n te mwakuri, boni ngke I mena i buakoia Ana Tia Kakoaua Iehova.” E korea ae kangai te mataniwi n te kanako rongorongo n te botaki n TV teuana n te United State: “Ngkana a mwaiti riki aomata aika kakairi n ami onimaki, e na kaokoro aron te natannaomata aei ma ae nonoraki ngkai. Boni ngai temanna te tia kanako rongorongo ae I ataia bwa e aanaki ami botaki n te tangira ao e korakora onimakinan te tia Karikiriki iroumi.”

Ukoukora te Taromauri ae Koaua

E kinaaki te taromauri ae koaua man te tangira. E kabotaua kunean te taromauri ae koaua Iesu ma kunean te kawai ae eti ao te motinnano bwa ko na nakonako iai. Bon aei te kawai ae kairiri nakon te maiu ae aki toki. E taku Iesu: “Rin n te mataroa are wariki: ba e warebwe te mataroa, ao e rababa te kawai are nako n te mate, ao a uanao akana rin iai. Ba e wariki te mataroa, ao e irariki te kawai are nako n te maiu, ao a karako akana kunea.” (Mataio 7:13, 14) Bon tii teuana te botaki ni Kristian ni koaua, ike a a katiteuanaki iai kaaina n nakonako ma te Atua n te taromauri ae koaua. Ngaia are e kakawaki te Aro ae ko rineia. Ngkana e a reke iroum te kawai anne ao ko motinnanoia bwa ko na nakonako iai, e a reke iroum te aroaro ni maiu ae te kabanea n tamaroa bwa bon anne kawain te tangira.​—I-Ebeto 4:1-4.

Iangoia bwa aekara kukureim ngkana e a reke iroum taromaurian raoi te Atua! Titeboo ma ko a nakonako ma te Atua iai. Ko kona n reiakina te wanawana mairoun te Atua ao te tangira, n te aro are ko a kona iai n iraorao ma aomata nako. Ko kona naba n reiakina te kaantaninga ibukin te maiu mairouna, ao n ota n ana berita nako te Atua ao ni karekea ataakin te kaantaninga ae raoiroi ibukin taai aika a na roko. Ko na bon aki uringaaba ngkai ko a ukoukora taromaurian raoi te Atua.

[Taamnei n iteraniba 5]

Bon tii te Baibara ae taekina ana tangira te Atua mai buakon koroboki rimoa man Aaro,

[Taamnei n iteraniba 7]

A kai kinaaki Kristian ni koaua n aroia ni kaotiota te tangira