Kakorakorakira Ni Buakana Te Kariri Ao Ni Kekeiaki Ribuakon Te Bwarannano
“Kam na anganaki te mwaaka ngkana e roko i aomi te taamnei ae raoiroi.”—MWAKURI 1:8.
1, 2. Tera te ibuobuoki are e beritanna Iesu nakoia taan rimwina ao bukin tera bwa a kainnanoia?
E ATAIA Iesu bwa akea aia kona taan rimwina ni kawakini bwaai ni kabane ake e a tia n tuangia bwa a riai ni karaoi, n oini korakoraia. N iangoan raababani mwiokoaia ae te uarongorongo, korakoran aia kakaaitara taani kairiribai ao mamaaran te rabwata, e a teretere iai kainnanoan te mwaaka ae riaon aia konabwai aomata. Mangaia are imwain waeraken Iesu nako karawa, e karau nanoia taan rimwina ni kangai: “Kam na anganaki te mwaaka ngkana e roko i aomi te taamnei ae raoiroi, ao kam na riki bwa taani kakoaua ibukiu i Ierutarem ao i Iutaia ni kabanea, ao i Tamaria ao nako tabon aonnaba.”—Mwakuri 1:8.
2 E moanaki kakoroan nanon te berita anne ni Bentekota 33 C.E. ngke a a kakorakoraaki n te taamnei ae raoiroi taan rimwin Iesu Kristo bwa a na kabutaa Ierutarem n aia uarongorongo. A aki kona ni katoka te mwakuri taani kakaaitara. (Mwakuri 4:20) A rangi ni kainnanoa te korakora naba are mairoun te Atua taan rimwin Iesu aika kakaonimaki ao ngaira naba “ni boongi ni kabane ni karokoa tain tokin te waaki ae ngkai i aon te aba.”—Mataio 28:20.
3. (a) Kabwarabwara kaokoron te taamnei ae raoiroi ao te mwaaka. (b) Tera ae ti kona ni karaoia n te mwaaka mairoun Iehova?
3 E berita Iesu nakoia taan rimwina bwa a ‘na anganaki te mwaaka ngkana e roko i aoia te taamnei ae raoiroi.’ A kaokoro nanon taeka aika “te mwaaka” ao “te taamnei.” E kabwarabwaraaki te korakora ae kabonganaaki ao ni kairiia aomata ke bwaai ni kakororaoa ana kantaninga te Atua bwa bon taamnein te Atua ao mwakana ae mwamwakuri. Ma e ngae n anne e kona ni kabwarabwaraaki te mwaaka bwa “te konabwai ni karaoi bwaai tabeua ke kammwakuran te bwai teuana.” E kona n aki rikirake iroun temanna ke te bwai teuana ni karokoa ae a kainnanoaki bwa e na kariki uaa. E kona ni kabotauaki te taamnei ae raoiroi ma te iti ae mwamwakuri ae kakorakoraa te baetere, ma te mwaaka bon titeboo ma te korakora ae aki noraki are e kawakinaki i nanon te baetere ae tuai ni kamanenaaki. Ti anganaki rinanon te taamnei ae raoiroi, ae te mwaaka are e angania ana toro Iehova n tatabemaniia nako te konabwai ni kakororaoa ara katabu ni Kristian, ao n rarawa nakoni bwaai n anainano aika bubuaka aika ti rotaki iai, ngkana e riai.—Wareka Mika 3:8; I-Korote 1:29.
4. Tera ae e na rinanoaki n te kaongora aei, ao bukin tera?
4 E kanga ni kaotiotaki te mwaaka ae ti anganaki rinanon te taamnei ae raoiroi? Aekakira mwakuri ke aaro ni kaaitarai baika riiriki man ana kairiri te taamnei ae raoiroi? Ngkai ti beku ma te kakaonimaki iroun te Atua, ti a kaaitara iai ma waaki n tutuki aika bati mairoun Tatan, ana waaki n te aonnaba, ke rabwatara aika aki kororaoi. E kakawaki bwa ti na tokanikai i aoni waaki n tutuki aikai bwa ti aonga ni botumwaaka, ao ni katoatai n uataboa te mwakuri ni minita ma ni kateimatoa ara iraorao ae kaan ma Iehova, ngkai Kristian ngaira. Ti na iangoa aron te taamnei ae raoiroi ni buokira ni buakana te kariri ao ni kekeiaki ribuakon te kua ao te bwarannano.
Kakorakorakira ni Buakana te Kariri
5. Ti na kanga ni kakorakoraaki n te tataro?
5 E reireinia taan rimwina Iesu bwa a na tataro ni kangai: “Tai kariaia bwakara n te kariri, ma kamaiuira mairoun teuare buakaka.” (Mataio 6:13) E na bon aki kitania ana toro aika kakaonimaki Iehova ake a bubutii aio. N te tai teuana, e taku Iesu bwa e korakora nanon “te Tama are i karawa ni kan anga te taamnei ae raoiroi nakoia akana butiia!” (Ruka 11:13) Ai karaunanora ngkai e berita Iehova bwa e na anganira te bwai n ibuobuoki ae korakora ibukini karaoan ae eti! Ni koauana e aki nanonaki n aio bwa e na aki kariaia Iehova kaririakira. (1 I-Korinto 10:13) Ma ngkana ti kaaitara ma te kariri, bon aei te tai ae ti na kakorakoraira riki iai n tataro.—Mataio 26:42.
6. E kabotoi i aon tera ana kaeka Iesu nakon ana kariri Tatan?
6 E mwanewei kiibu Iesu ni kaekai ana kariri te Riaboro. E ururingi raoi Ana Taeka te Atua ngke e kaeka ni kangai: “E koreaki ae kangai . . . E kangai naba ae koreaki . . . An naako Tatan! Bwa e koreaki ae kangai, ‘Ko riai n taromauria Iehova ae Atuam, ao ko riai n toro irouna n tii ngaia.’” E kairoroaki Iesu n tangiran Iehova ao ana Taeka bwa e na rarawa nakoni kakukurei ake e kariria iai te tia Kariri. (Mataio 4:1-10) Ngke e teimatoa n rarawa Iesu nakoni kaririana, ao e a kitanna Tatan.
7. Ti na kanga ni buokaki n te Baibara bwa ti na rarawa nakon te kariri?
7 Kioina ngkai e onimakina te Baibara Iesu ibukini buokana n rarawa nakon ana kariri te Riaboro, ai batira riki ngkanne riaira ni karaoa anne! Ni koauana, ngkana ti na rarawa nakon te Riaboro, ti riai moa ni motinnanoia bwa ti na atai ana kaetieti te Atua ao n nimti raoi. A bati aomata aika a tia ni kairaki bwa a na maiuakini kaetieti aika n te Baibara ngkai a ukeuke n reirei n te Baibara ao a moanna n ota ao n ataa kakawakin wanawanan te Atua ma ana raoiroi. Ni koauana e kakang “ana taeka te Atua” bwa e kona n atai “baike e iangoi te nano ma baike e kantaningai.” (Ebera 4:12) E kona temanna ni karekea te ‘nanowanawana n ana koaua Iehova’ ae bati riki, ngkana e kabatiaa warekan ao iaiangoan te Baibara. (Taniera 9:13, BG) Ngkana e riki anne nakoira, e raoiroi riki ngkana ti kananoi ara iango i aoni kiibu aika kaineti ma oini mamaarara tabeua.
8. Ti kona ni karekea te taamnei ae raoiroi rinanon tera?
8 Irarikin ataakin te Baibara, e kona n rarawa Iesu nakon te kariri ibukina bwa e ‘kaonaki n te taamnei ae raoiroi.’ (Ruka 4:1) Ibukini karekean te korakora anne ao te konabwai, ti riai ni kaanira riki ma Iehova, ni kamanenai raoi bwaai nako ake e katauraoi bwa ti aonga n anganaki te taamnei ae raoiroi. (Iakobo 4:7, 8) Mai buakoni baikai, bon te ukeuke n reirei n te Baibara, te tataro ao te iraorao ma raao n te onimaki. A bati aika a kakaitau ibukini kakabwaiaaia ni kateimatoaan aia babaire ibukin aia mwakuri ni Kristian, are e buokiia ni kaatuua iangoani kateimatoaan aia onimaki.
9, 10. (a) Baikara kariri aika riiriki n am tabo? (b) E na kanga ni kakorakorako kananoan am iango ao te tataro ni buakana te kariri ngkana ko namakina naba te kua?
9 Baikara kariri ake ko na rarawa nako iai? Ko a tia ni kaririaki bwa ko na kaitaataan ma ae tiaki buum ni mare? E a tia ni kairiko nanom ni kani karekenano ma ae tiaki kaain te onimaki ngkai ko tuai ni mare? Ngkana a mataku Kristian n te terewitin ke ni kabongana te Internet, a kona ni karina ni kaririaki bwa a na matakuakina te bwai ae aki itiaki. Ngkana e a tia n riki anne nakoim, tera are ko karaoia? Ko wanawana ngkana ko kananoa am iango i aon te kairua teuana ae kona ni kairiri nakon teuana riki ao imwina nakon te bure ae rangi ni kakaiaki. (Iakobo 1:14, 15) Iangoia te mwakuri ae bure are e kona ni kammaraka nanon Iehova, te ekaretia ao am utu. N te itera teuana, ti karekei mataniwin nanora aika itiaki ngkana ti kateimatoa kakaonimakira ni koaua nakoni booto n reirei mairoun te Atua. (Wareka Taian Areru 119:37; Taeka N Rabakau 22:3.) Ngkana ko kaaitara ma aeka ni kataaki aikai, ko riai ni motinnanoia bwa ko na tataro ni bubutii kakorakoraakim n rarawa nakoni kataakim.
10 Iai riki te bwai ae riai n ururingaki mani kaririakin Iesu. E kawaraki Iesu iroun Tatan imwini kabanean 40 te bong n aki mamatam n te rereua. Akea te nanououa bwa e iangoia te Riaboro bwa aio “te tai ae angaraoi” ibukini kataakin etin raoi kakaonimakin Iesu. (Ruka 4:13) E kataia naba Tatan ni kakaaei taai aika angaraoi ibukini kataakini kakaonimakira ma te nano ae eti. Ai ngaia are e rangi ni kakawaki kateimatoaani korakoran ara onimaki. N angiin te tai, ngkana e noria Tatan bwa e mamaara te aomata are e matanna bwa e na kabwakaa, ao e na boni karaoia naba ngkekei. Mangaia are ti riai riki ni motinnanoia bwa ti na bubutiia Iehova ana kamanomano ao te taamnei ae raoiroi ngkana ti namakina te kua ke te bwarannano.—2 I-Korinto 12:8-10.
Kakorakorakira ni Kekeiaki Ribuakon te Kua ao te Bwarannano
11, 12. (a) E aera ngkai a a bati aika a namakina te bwarannano ni boong aikai? (b) Tera ae e kona ni kakorakoraira bwa ti na rarawa nakon te bwarannano?
11 Ti namakina te bwarannano n te tai teuana ma teuana ibukin aki kororaoira. E kona ni koaua anne ni boong aikai ibukina bwa ti a maeka i nanon taai aika rangi ni karawawata riki. Ti a mena i nanon taai aika rangi ni karuanikai ake a tuai n rinanona aomata nako. (2 Timoteo 3:1-5) E a rikirake te kangaanga ni kaineti ma te kataumwane, te namakin, ao karawawata riki tabeua ngkai e a uakaan rokon Aremaketon. E bon aki kakubanako rokona ngkai a kunea tabeman bwa e rikirake ni matoatoa kakororaoan tabeia n tararuaaia ao karekeani baika kainnanoaki ibukin te utu. A namakina te kua, te rawawatannano, te bwarannano ae korakora ao a namakina naba kekerikaakin aia konabwai ni karaoi tabeia. Ngkana ngaia aei ae riki nakoim, ko na kanga ni kekeiaki ribuakoni kangaanga aikai?
12 Uringnga, bwa e karau nanoia taan rimwina Iesu bwa e na bon angania te tia ibuobuoki ae te taamnei ae raoiroi mairoun te Atua. (Wareka Ioane 14:16, 17.) Bon aei te mwaaka ae te kabanea ni korakora n te iuniweeti. E kona Iehova ni karaoa “ae rangi ni bati riki” ni katauraoan te korakora ae ti kainnanoia ibukin nanomwaakara ni kaaitarai kataaki nako. (I-Ebeto 3:20) E taku te abotoro Bauro bwa n onimakinan te mwaaka anne ti a karekea “te korakora ae riaoni korakoraia aomata,” e ngae ngke ti “taotaonaki n rawawata nako.” (2 I-Korinto 4:7, 8) E aki beritanna Iehova bwa e na katoka te rawawata, ma e karaui nanora bwa e na anganira te korakora bwa ti na tokanikai rinanon taamneina.—I-Biribi 4:13.
13. (a) E kanga ni kakorakoraaki te roro n rikirake temanna bwa e na kekeiaki ribuakon aaro aika kangaanga? (b) Iai katoto tabeua n aron aei aika ko atai?
13 Iangoa ana katoto Stephanie ae 19 ana ririki ae te regular bwaiania. E ituaki n te boo ngke 12 ana ririki ao e kuneaki bwa e kaentia kaburorona. Ni moa man te tai anne, e rinanon te korokoro uoua te tai ao e a reke bwainnaorakiana n te radiation, e a manga boo riki uoua te tai, ike e a aki bati iai ni kakammwakuri ana itera are te maing ao n aki bati naba n noraaba. E riai ni kawakina korakorana neiei ibukini baike e iangoi bwa a kakawaki riki, n aroni bobotaki ni Kristian ao te mwakuri ni minita. Ma e ngae n anne e karekea ana ibuobuoki Iehova ibukini korakorana bwa e aonga n nanomwaaka n aanga aika bati. E a tia ni kakorakoraaki mani booki aika boto man te Baibara n rongorongoia raao n te onimaki, ngkana e namakina te bwarannano. E boutokaaki irouia taari rinanon kanakoan aia reta nakoina ke n taetae ni kaungaa imwain ao imwini bobotaki. A kaotiota naba nanoia ni kakaitau aomata ake a kan ongora ni kawaran Stephanie ni mwengana, ibukin reiakinan ana kaetieti te Baibara. E rangi ni karabwarabwa Stephanie nakon Iehova ibukini baikai ni kabane. E mamate nanona n te kibu ae Taian Areru 41:3, are e kakoaua iai bwa e a tia ni kakoroaki nanona n te baere e riki nakoina.
14. Tera ae ti riai n rarawa nako iai ngkana a bwara nanora ao bukin tera?
14 Ngkana ti kua ke ni karawawataaki, ti riai n aki iangoia bwa ti na kauarerekea ara mwakuri ni Kristian ibukini kaitaraan rawawata aikai. Anne bon te aro ae te kabanea ni buakaka ae ti kona ni karaoia. Bukin tera? Ibukina bwa mwakuri aikai n aron te ukeuke n reirei i bon iroum, te reirei n utu n te Baibara, te mwakuri ni minita ao kaakaeani bobotaki, bon aanga ibukini karekean ana ibuobuoki te taamnei ae raoiroi ni kakorakoraira. A kabebetenano n taai nako mwakuri ni Kristian. (Wareka Mataio 11:28, 29.) Mwaitira aia tai taari n roroko ma namakinan te mamaara n taai ni bobotaki ma ngkana a okiri mwengaia ao e taraa n ae a a manga reke kakorakoraaia!
15. (a) E koaua bwa e berita Iehova bwa e na kabebetea aroni maiun te Kristian? Kabwarabwaraa man te Baibara. (b) Tera ae e beritanna te Atua ibukira, ao tera te titiraki ae e wai mai iai?
15 Ni koauana, ti aki riai n taekinna bwa e aki rawawata uotaia taan rimwini Kristo. E kainnanoaki te kakorakora ngkana ko na riki bwa te Kristian ae kakaonimaki. (Mataio 16:24-26; Ruka 13:24) Ma e ngae n anne, e kona ni kakorakoraia akana kua Iehova rinanon te taamnei ae raoiroi. E korea ae kangai te burabeti ae Itaia: “E na manga reke te korakora irouia akana kaantaninga Iehova; a na mwemwe rake ni baiia ni kiba n ai aroia ikare; a na biribiri, ao a na aki kua; a na nakonako, ao a na aki nimamate.” (Itaia 40:29-31, BG) Ngkana ngaia anne, ti karaoa ae riai ngkana ti titiraki ni kangai: Tera bukin namakinan te kua n ara mwakuri ni Kristian?
16. Tera ae ti kona ni karaoia ibukini katokani baika a karika te kua ke te bwarannano?
16 E kaumakira Ana Taeka Iehova bwa ti na “koaua raoi bwa baikara bwaai aika kakawaki riki.” (I-Biribi 1:10) Ni kairan te abotoro Bauro rinanon te taamnei, e kabotaua aron te maiu ni Kristian ma te kabobirimwaaka ae rangi n abwabwaki ao e reireinira ni kangai: “Ti na kaaki rawawatara nako, . . . ao ti na kananomwaakaira ni biri n te kabobirimwaaka are e kamenaaki imwaira.” (I-Ebera 12:1) E kaotaki n ana iango bwa ti riai n rarawa nakoni baika ti aki rangi ni kainnanoi ao baika karawawataira aika kakuaira. E kona n ae a kataia tabeman i buakora ni karaoi baika bati ni maiuia e ngae ngke a a kaman tabetabe. Mangaia are ngkana ko namakina te kua ao te karawawataaki n angiin te tai, tao ko na kakabwaiaaki ngkana ko a manga iangoia bwa mwaitira korakoram ae ko kabanea ibukin am mwakuri ni kareketianti, mwaitin am tai ni mwamwananga ibukini kakukureiam, ao korakoran nanom ibukin uaiakinan te takaakaro ao aaro ni kaakibotu riki tabeua. Ti riai ni bane ni kairaki man iangoraoira ao nimamanneira bwa ti na atai mamaarara ao ni kauarerekei karaoani mwakuri aika akea uaaia.
17. E aera ngkai a namakina te bwarannano tabeman, ma tera te karaunano ae katauraoia Iehova ni kaineti ma aei?
17 A kona naba tabeman mai buakora n namakina te bwarannano ibukina bwa e aki waekoa n roko n tokina te waaki ae ngkai i aon te aba aei n aron ae ti kantaningaia. (Taeka N Rabakau 13:12) Mangaia are ane e namakina aei, e kona ni karekea kakorakoraana man taeka ake n Abakuka 2:3, (BG) ae kangai: “E boni ngae te Mi-ni-burabeti n tataninga te tai are e na motikaki bukina, ao e boni kekeiaki nakoni kakoroana, ao e na aki matebuaka: e boni ngae ni waeremwe, ao tataningaia naba, ba e na bon tai roko, ao e na aki baenikai.” A karauaki nanora iroun Iehova bwa e na bon roko raoi n tokina te waaki ae ngkai n taina are e baireaki!
18. (a) Baikara berita aika a na kakorakorako? (b) Ti na kanga ni buokaki n te kaongora ae imwina?
18 Ni koauana, a bane ni kariariaa te bong are e nang akea iai te kua ao te bwarannano ana toro Iehova aika kakaonimaki ike a nang bane n okiri iai aia “bong n ataei.” (Iobi 33:25, BG) Ti kona naba ngkai ni kakorakoraaki i nanora n ana mwakuri te taamnei ae raoiroi ngkai ti uataboa ara mwakuri ni Kristian aika kakorakoraira. (2 I-Korinto 4:16; I-Ebeto 3:16) Tai kariaia bwa ko na katibanakoi kakabwaia ngkana ko kua. A nang toki kataaki nako aika a riki man te kariri, te kua ke te bwarannano ma ngkana e aki waekoa n toki aei, a na bon toki n ana waaki ae boou te Atua i aon te aba. N te kaongora ae imwina, ti na rinanon iai aron te taamnei ae raoiroi ni kakorakoraia Kristian ni kaitaraa te bwainikirinaki, n rarawa nakon aia kariri tabonroroia aika karuanikai ao n nanomwaaka i aani karawawata riki tabeua.
Ko na Kanga ni Kaeka?
• Ti na kanga ni kakorakoraaki rinanon te wareware n te Baibara?
• Ti na kanga ni kakorakoraaki n te tataro ao ni kananoan ara iango?
• Ko na kanga ni katoki aaro aika a karika te bwarannano?
[Taamnei n iteraniba 26]
Ti kona ni kakorakoraaki n ara beku ibukin te Atua mani bobotaki ni Kristian