Te Rongorongo ae Raoiroi Ibukia Aomata ni Kabane

A Kakoauaa ao n ingainga nanoia taan rimwin Iesu ni kautakina man te mate. E mwamwananga riki te abotoro Bauro nako Asia Minor ao te Meriteranian ni bairei ekaretia ma ni kakorakoraia Kristian, bwa a na tei n nene ni kaaitarai aroaro ni maiu aika aki riai ao karitei aika tiritiri. N aki ongei kangaanga akanne, a bati aika a a riki bwa Kristian.

E boni karabuutinaki Bauro imwina riki. Ma e ngae anne, e boni korei reeta ni kaungaunga ao reirei ni kairiri nakoia ekaretia ni Kristian. E boni kauringia naba te karuanikai ae korakora riki mairouia taan tannako man te koaua. E kairaki Bauro rinanon te taamnei ae raoiroi mairoun te Atua bwa e na taetae ni burabetinna bwa a na rin i buakoia “kameaanti aika tiritiri” n taekini “reirei aika kewe” ao ni “katikiia taan rimwin Iesu bwa a na rimwia.”​—Mwakuri 20:​29, 30.

E moanaki kabwaouaan te koaua anne ni kabanean te moan tienture. Tao n te tai naba anne, e a anganaki te abotoro Ioane te Kaotioti ibukin taai aika a na roko n te aro ni kaikonaki iroun Iesu are e kautaki man te mate. N aron are e koreia Ioane imwina, a na bon totokoa kakororaoan ana moani kantaninga Iehova ibukin te aonnaba ao te botannaomata taani kakaaitara ke taan angareirei ni kewe. A na bon ongoraea te rongorongo ae raoiroi ibukin te Tautaeka n Uea te “botannaomata nako ao baronga ao taian taetae ao natannaomata.” (Te Kaotioti 14:6) E na manga kaokaki te bwaretaiti n te aonnaba, ao a kona n riki bwa kaaina aomata ni kabane ake a kani karaoa nanon te Atua!

E tangiraoi anne nakoim n ai aron te “rongorongo ae raoiroi”? Ngkana ngaia anne, reiakina riki taekan ana rongorongo te Atua ae n te Baibara ibukia botannaomata ao arom ni kona ni kakabwaiaaki iai ni boong aikai ao n taai aika a na roko.

Ko kona ni wareka te Baibara n te atureti ae www.pr418.com n te Internet. Ko kona naba n rinanon te boroutia ae Te Rongorongo ae Raoiroi Mairoun te Atua! n te atureti anne n ikotaki naba ma te boki ae Tera Ana Reirei ni Koaua te Baibara? ao booki riki tabeua aika a kabwarabwaraaki iai bukini kakoauaan te Baibara n oin ara taetae ao arora ni kona n tou mwin reirei ni kairiri aika manena n ara utu ao ni maiura. Ke titirakina temanna Ana Tia Kakoaua Iehova ibukin rongorongona riki tabeua.

​—E boto aei i aoni Mwakuri, I-Ebeto, I-Biribi, I-Korote, Biremon, 1 Ioane, Te Kaotioti.