PREGUNTAS DA XUVENTUDE
Como me pode axudar a Biblia? | Parte 3. Aproveita ó máximo a túa lectura da Biblia
Cando abres a Biblia, seguramente ves que hai moito que ler. Pero non te asustes! Pensa que a Biblia é coma un bufete dun restaurante cun montón de comida. Non vas poder comer todo o que ves. Pero o que si podes facer é coller o suficiente para quedar satisfeito.
Para que esa “comida”, é dicir, a lectura da Biblia, che aproveite ó máximo necesitas concentración. Este artigo vaiche axudar a conseguilo.
A continuación imos ver:
Por que debería concentrarme cando leo a Biblia?
Canto máis te concentres na lectura da Biblia, máis te beneficiarás dela. Pensa neste exemplo: se remollas unha bolsiña de té en auga quente, seguro que a auga colle algo de sabor. Pero se a deixas repousar un anaco conseguirás moito máis sabor.
Pois coa lectura da Biblia pasa algo parecido. En vez de lela ás présas, por que non dedicas un tempiño a meditar no que estás lendo? Isto é o que fixo o escritor do Salmo 119. Fíxate no que dixo sobre a Palabra de Deus: “Medito nela o día enteiro” (Salmo 119:97).
Claro, isto non significa que teñas que dedicar literalmente o día enteiro a ler e pensar no que pon a Biblia. O que quere destacar este versículo é que o salmista dedicaba tempo a pensar no que lía na Palabra de Deus. Facer isto axudáballe a tomar boas decisións (Salmo 119:98-100).
“Miña nai díxome unha vez: ‘A semana ten sete días, e verdade que sacas tempo para as túas cousas? Por que non lle dedicas tamén un tempo a Xehová? El meréceo’” (Melanie).
Cando meditas nos principios bíblicos, tomas mellores decisións. Por exemplo, axúdanche a escoller bos amigos ou a non ceder cando tes a tentación de facer algo malo.
Como lle podo sacar o máximo partido á miña lectura da Biblia?
Fai un plan. “Márcate unha rutina para ler a Biblia”, aconsella unha adolescente chamada Julia. E engade: “Decide de antemán o que vas ler, cando o farás e onde o lerás”.
Crea o ambiente adecuado. “Busca un lugar tranquilo”, suxire unha rapaza chamada Gianna. E segue dicindo: “Cóntalle á túa familia en que momentos tes pensado ler a Biblia para que non te interrompan”.
Se vas usar un dispositivo electrónico, silencia as notificacións. Tamén podes intentar ler a Biblia en papel. De feito, está comprobado que ler en papel facilita a comprensión. En cambio, é máis difícil concentrarse cando les nunha pantalla.
“Deime conta de que ler nunha pantalla me distrae. Chéganme notificacións seguido, e ás veces quedo sen batería ou fállame o Internet. Cando leo en papel, do único que me teño que preocupar é de ter luz suficiente” (Elena).
Ora antes de empezar. Pídelle a Xehová que che axude a comprender, a recordar e beneficiarte da porción da Biblia que vaias a ler (Santiago 1:5).
Para actuar de acordo co que pediches en oración, afonda no relato que estás lendo. Como o podes facer? Se estás usando a aplicación JW Library ou lendo a Biblia en liña, só tes que premer nun versículo para encontrar máis información sobre o que estás lendo.
Faite preguntas. Por exemplo: “Que me ensina este relato sobre Xehová? Destaca algunha calidade súa que poida imitar?” (Efesios 5:1). “Que leccións do relato podo aplicar na miña vida?” (Salmo 119:105). “Como podería usar o que acabo de ler para axudarlles a outros?” (Romanos 1:11).
Tamén te podes preguntar: “Como se relaciona o que acabo de ler co tema principal da Biblia?”. Esta pregunta é moi importante. Por que? Porque na Biblia, dende a Xénese ata a Apocalipse, todo está relacionado dalgunha maneira co tema principal: a santificación do nome de Xehová mediante o seu Reino celestial, e a demostración de que só el ten o dereito a gobernar e de que a súa forma de facelo é a mellor.