Weitajeerü maatsoʼulüjee 17
1. ¿Kaseerü waapiraka achiki maatsoʼulüjee 17?
1 Sükajee tü outkajawaakat eere sotuin waaʼin ouktüin Jesuu, waküja achikit juyawai ouktüin nia (1 Cor. 11:26, NM). Makalaka keeʼireein waaʼin chainjanain wamaa wainma wayuu sünain tia süpüla naapajüin süchiki tü naakajirakat aka waya Maleiwa (Juan 3:16). Soʼu juyakat tüü, waapireerü wayuu maatsoʼulüjee 17 süpüla sotuin waaʼin ouktüin Jesuu. Yapaja waya süpüla kooʼomüinjatüin maʼin waʼyataain soʼu tia.
2. ¿Jamüinjatü wanüiki weitajapa tü ounejaayakat?
2 Müinjatü wanüiki. Shia anaka aluʼu motsoʼole wamaʼa. Eeshii süpüla wamüin: «Jamayaa. Tasülajeein pümüin karalouktakat tüü, süpüla puʼunüin sümaa püpüshi sünain wanee outkajawaa anaka maʼin eejeetka sainküinpünaa mmaka awüriiroʼu 5. Aküjüneerü kasain eein sutuma ouktüin Jesuu otta tü kasa naainjakat maaʼulu. Machuntujusat nneerü sünain, aküjünüsü yaʼayaa jalainjatüin jee jalapüshinjatüin shia». Eitajüneerü rimiinkoʼu jee saawanoʼu tü rewiisütakalüirua müleka anashiire shia.
3. ¿Kasa waaʼinrajatka süpüla waapiruin wainma wayuu?
3 Waapira wayuu süpüshuaʼa. Tü keeʼireekat waaʼin shia wainmain wayuu wamaa. Waapirüinjanajeseʼe na wayuu wouyantakana amaʼanamüin, na wekirajüinkana, na wapüshikana, na kepiakana waʼütpünaa, na aʼyataajiraakana wamaa, na koleejiakana wamaa jee na weʼraajakana. Naküjeerü na laülaashiikana jamüinjatüin shiitajia tü karalouktakat sainküinpünaa eere waküjüin pütchi. Anasü maʼin sukuwaʼipa tia soʼu juyakat tiainka süka niʼrüin sünain süntüin wanee wayuu chi wawala jülüjakai aaʼin na antakana, nüküjaka sümüin nüchajaajeechin chi ounejaakai shia. Akatsaʼa nnojotsü jaralin shiʼraajüin. Soʼuleʼeya kaʼikat tia eeshi chi aapakai sümüin tia karalouktakat shipialuʼupünaa.
4. ¿Jamüshii weitajüinjanaka maʼin tü ounejaayakat?
4 Eeshijaʼa süpüla nüntüin sünain tia outkajawaakat wanee wayuu püpütakai apüla tü ounejaayakat. Piʼyataale maʼin sünain tia atüjaaneerü aaʼu tü püküjakat achiki, jaʼitairü mantüin wayuu. Sükajee tü karaloukta piitajakat atüjaaneechi aaʼu Jesuu sünain niain maaʼulu wanee aluwataai pülashi maʼin. Shiʼreerü wayuu süpüshuaʼa, na püküjakana amüin pütchi, na puwalayuukana jee müshia Jeowa kojutüin pümüin paakajinnüin (Col. 3:15).