KESYON JÈN YO KONN POZE
Ki sa m ka fè pou paran m fè m konfyans?
Sa w ta dwe konnen
Plis moun ka konte sou ou se plis y ap fè w konfyans. Lè w obeyi règ paran w ba ou, se tankou ou peye yon dèt. Ou dwe paran w obeyisans e plis ou serye nan peye ‘dèt’ sa a se plis ou gen chans pou yo fè w ‘kredi’ (oswa ba w libète). Yon lòt bò, si w paran w wè yo pa ka konte sou ou, pa sezi si w wè yo fè w mwens ‘kredi’.
Sa ap pran tan pou paran w fè w konfyans. Anvan paran w ba w plis libète, ou bezwen montre nan fason w aji, ou se yon moun ki responsab.
TEMWAYAJ: “Lè m te adolesan, mwen te konnen sa paran m te vle m fè, donk, mwen te konn fè kòmsi mwen t ap fè yo. Men, mwen te konn fè sa m vle an kachèt. Sa te fè l difisil pou paran m fè m konfyans. Apre yon ti tan, mwen te vin konprann pa gen wout pa bwa: ou pa ka twonpe yon moun pou l ba w plis libète. Fòk ou se yon moun yo ka konte sou li pou yo fè w konfyans.” — Craig.
Sa w ka fè
Toujou di laverite menmsi sa fè w mal. Tout moun fè erè, men lè w bay manti pou w kache sa w fè (oswa ou pa bay tout detay yon fason pou w kache laverite) sa ka kraze konfyans paran w te gen nan ou a. Yon lòt bò, lè w toujou montre w onèt, paran w ap wè lè w fè yon erè ou gen ase matirite pou w pran responsablite w. E se moun konsa yo ka fè konfyans.
“Se pa paske w fè erè ki oblije fè w pèdi konfyans lòt moun, men w ap pèdi konfyans lòt moun kanmenm si w kache erè w fè yo.” — Anna.
Men sa Bib la di: “Nou vle konpòte nou yon fason ki dwat nan tout bagay.” — Ebre 13:18.
Fè yon ti reflechi: Lè paran w mande w kote w prale oswa sa w pral fè, èske w ba yo tout laverite? Oswa lè paran w mande w kote w te ye oswa sa w te fè, èske w ba yo tout detay sou sa yo vle konnen an?
Pran responsablite w. Obeyi tout règ paran w bay. Fè tout travay ou gen pou w fè nan kay la san pèdi tan. Aprann respekte lè. Pran responsablite pou w etidye oswa fè devwa w. Respekte lè yo ba ou pou rantre.
“Si paran w kite w soti ak zanmi w men, yo di w pou w rantre a 9 è nan aswè pou pi ta, pa rantre lakay ou a 10 è edmi epi pou w atann y ap kite w soti ak zanmi w yo ankò!” — Ryan.
Men sa Bib la di: “Chak moun ap pote pwòp responsablite l.” — Galat 6:5, nòt.
Fè yon ti reflechi: Ki repitasyon ou genyen anrapò ak rive alè, fè travay nan kay la, ak obeyi règ paran w yo, menm règ ou pa renmen yo?
Aprann gen pasyans. Si w kraze konfyans paran w fè w, l ap pran tan pou yo refè w konfyans ankò. Se pou w aprann gen pasyans.
“Mwen te santi m fache lè paran m pa t vle ban m plis responsablite lè m te kòmanse gen plis laj. Mwen pa t konprann lefètke yon moun ap grandi sa pa vle di l gen matirite pou sa. Mwen te mande paran m pou yo ban m posiblite pou m montre yo yo ka fè m konfyans. Sa te pran tan, men alafen sa te mache. E mwen te aprann, se pa laj yon moun genyen ki fè y ap fè l konfyans, men se aksyon l fè.” — Rachel.
Men sa Bib la di: “Montre w fidèl nan tout sa w ap fè.” — 3 Jan 5.
Fè yon ti reflechi: Pou w gen konfyans paran w (oswa pou yo fè w konfyans ankò), ki kèk bagay ou ka fè pou w ‘montre w fidèl’?
MEN YON IDE: Fikse yon objektif swa pou w rive alè, pou fin fè tout travay ou gen pou w fè, respekte lè yo ba ou pou w rantre, oswa nenpòt lòt bagay. Fè paran w konnen detèminasyon w pran epi mande yo sa w ka fè pou yo ka fè w konfyans. Apre sa, travay pou w suiv konsèy ki nan Bib la: “Voye ansyen pèsonalite a jete, pèsonalite ki ann akò ak konduit nou te genyen anvan an.” (Efezyen 4:22). Rive yon lè, paran w ap wè pwogrè w fè!