Itilize referans yo ba w yo

LABIB konpare kongregasyon kretyen an ak kò moun. Chak pati ladan l nesesè, men ‘yo tout pa jwe menm wòl’. Ann amoni ak pawòl sa yo, nou ta dwe byen ranpli kèlkeswa responsablite yo konfye nou. Sa mande pou nou byen konprann kèlkeswa patisipasyon yo ban nou fè e pou nou byen fè l, san nou pa bay kèk sijè mwens enpòtans pase lòt paske nou panse lòt sijè yo pi enteresan (Wom. 12:4-8). Esklav fidèl ki prevwayan an gen responsablite pou l bay manje espirityèl “nan bon moman”. (Mat. 24:45.) Lè nou sèvi ak kapasite nou genyen pou nou fè diskou yo ann amoni ak enstriksyon esklav la ban nou, nou montre nou gen rekonesans pou esklav la ki gen gwo responsablite sa a. Sa ap pèmèt kongregasyon an byen fonksyone.

Ki kote pou w pran enfòmasyon yo? Lè yo ba w yon sijè pou w prezante nan lekòl la, veye pou se sijè sa a ou devlope. Pa devlope yon lòt bagay. Byen souvan, y ap ba w referans kote pou w jwenn enfòmasyon yo. Men, si yo pa di w nan ki piblikasyon pou w pran enfòmasyon w ap itilize kòm baz pou diskou a, ou ka pran enfòmasyon yo kote w vle. Sepandan, toutpandan w ap prepare diskou a, asire w tout diskou a chita sou sijè yo ba w la. Lè w ap deside sa pou w mete nan diskou a, ou bezwen panse tou ak moun ki pral koute w yo.

Etidye enfòmasyon ki nan referans yo ba w pou w fè diskou a avèk swen, analize vèsè ki ladan l yo. Ansuit, egzamine pou w wè ki jan w ka byen sèvi ak enfòmasyon w jwenn yo pou w fè moun ki pral koute w yo byen pwofite diskou a. Chwazi de pwen oswa petèt twa pwen pou w itilize kòm pwen prensipal nan diskou a. Menm jan an tou, se nan referans yo ba w pou diskou a pou w chwazi vèsè w prevwa li e w prevwa egzamine yo.

Ki kantite enfòmasyon ou ta dwe pran pou w itilize nan diskou w la? Sèlman yon kantite ou ka byen itilize. Pa chèche bay moun yo anpil enfòmasyon nan pwen pou w diminye kalite ansèyman w ap bay la. Si gen nan enfòmasyon yo ki pa mache ak objektif diskou w la, pa itilize yo, konsantre w sèlman sou enfòmasyon k ap ede w atenn objektif sa a. Nan enfòmasyon w jwenn nan referans yo ba w pou diskou a, itilize sa k ap pi enstwi moun yo e k ap pi itil yo. Ann amoni ak teknik pou moun byen pale n ap egzamine la a, objektif ou se pa pou w wè sou ki kantite enfòmasyon ou ka pale, men se pou w byen itilize enfòmasyon ki nan referans yo ba w kòm baz diskou w la.

Sa pa vle di diskou w la dwe tou senpleman yon rezime sou enfòmasyon yo bay yo. Ou dwe prepare w pou w esplike yon seri pwen, pou w bay plis detay sou yo, pou w pran egzanp pou w ede moun yo konprann yo e petèt pou w montre yo fason pou yo aplike yo. Si w ap ajoute lòt ide, se ta dwe nan objektif pou ede w devlope pwen enpòtan ki nan referans yo ba w pou diskou a, se pa ta dwe pou ranplase pwen sa yo.

Rive yon lè, yo konn mande frè ki gen kalifikasyon nesesè antanke anseyan yo pou yo bay enstriksyon nan reyinyon sèvis la. Frè sa yo konprann li nesesè pou yo byen sèvi ak enfòmasyon ki nan referans yo ba yo pou diskou a olye yo ranplase yo ak lòt bagay. Menm jan an tou, yo bay frè k ap bay diskou piblik yo yon chema diskou pou yo suiv. Chema sa yo ba yo yon sèten libète, men tou ladan yo, yo jwenn pwen prensipal pou yo devlope yo, rezònman ki kore pwen sa yo ansanm ak vèsè ki sèvi kòm baz pou diskou a. Lè w aprann anseye sou baz enfòmasyon ki nan referans yo ba w pou diskou a se yon fòmasyon enpòtan w ap resevwa k ap prepare w pou w jwenn lòt patisipasyon pi devan.

Fòmasyon sa a ka ede w tou pou w kondui etid biblik k ap pwogrese. Ou bezwen aprann konsantre w sou enfòmasyon w ap etidye ak moun yo olye w detounen atansyon yo sou sijè a lè w mete aksan sou lòt bagay ki ka enteresan, men ki pa nesesè pou yo konprann sijè a. Sepandan, si w konprann vrè objektif leson sa a, ou pap vin tèlman kole sou enfòmasyon w ap etidye ak yon moun pou w ta neglije ba li lòt esplikasyon li ka bezwen.