Անձնական հետաքրքրություն ցույց տանք՝ դիտունակ լինելով

¹ Եհովա Աստված և Հիսուս Քրիստոսը շատ լավ են հասկանում մարդկանց բոլոր կարիքները և օգնություն են առաջարկում նրանց (Բ Մնաց. 16։9; Մարկ. 6։34)։ Երբ մենք հասկանանք, թե ինչն է հետաքրքրում կամ մտահոգում այն անհատներին, ում հանդիպում ենք ծառայության ժամանակ, գուցե կարողանանք համապատասխան փոփոխություններ անել բարի լուրի մեր մատուցման մեջ։

² Ուշադրություն դարձրու մանրամասնություններին։ Հիսուսը դիտունակ էր (Մարկ. 12։41–43; Ղուկ. 19։1–6)։ Երբ տանտիրոջ դռանը մոտենալով՝ մենք նկատենք կրոնական զարդարանքներ, ավտոմեքենայի վրա փակցված լոզունգներ կամ տան բակում տեսնենք խաղալիքներ, գուցե կարողանանք բարի լուրի մասին արդյունավետ վկայություն տալու առիթներ ստեղծել։

³ Գուցե անհատի դեմքի արտահայտությունը և շարժուձևը ինչ–​որ բան հայտնեն նրա զգացումների մասին (Առակ. 15։13)։ Հնարավոր է, որ հարազատի կորստի կամ ուրիշ դժվար հանգամանքների պատճառով նա մխիթարության կարիք ունենա։ Համապատասխան որոշ սուրբգրային համարներ կարդալը թերևս շատ արժեքավոր լինի նրա համար (Առակ. 16։24)։ Արդյոք տանտերը շտապո՞ւմ է, կամ նրա գրկում լաց լինող երեխա՞ կա։ Եթե այո, ապա լավ կլինի, որ մեկ ուրիշ անգամ այցելես։ Նրբանկատ և «կարեկից» լինելով՝ մենք գուցե մղենք անհատին լսելու մեզ, երբ կրկին այցելենք նրան (Ա Պետ. 3։8)։

⁴ Խոսքերդ հարմարեցրու իրավիճակին։ Պողոս առաքյալը նկատեց, որ Աթենքում կար մի սեղան՝ նվիրված «անծանօթ Աստուծուն»։ Դա անդրադարձավ այն բանի վրա, թե ինչպես նա ներկայացրեց բարի լուրը. «Այն որ դուք առանց ճանաչելու պաշտում էք. ես նորան եմ պատմում ձեզ»։ Պողոսի նրբանկատ մոտեցումը մղեց ներկաներից ոմանց, որ ընդունեն Թագավորության պատգամը և հավատացյալ դառնան (Գործք 17։23, 34)։

⁵ Նմանապես, դիտունակ լինելով՝ մենք կհասկանանք անհատի հետաքրքրությունները և այդպիսով կկարողանանք համապատասխան փոփոխություններ անել մեր մոտեցման մեջ։ Գործածիր հարցեր, որոնք կմղեն տանտիրոջը արտահայտվելու։ Մտածիր այն սուրբգրային համարների մասին, որոնք կարող ես գործածել նրա հետաքրքրությունը զարգացնելու նպատակով (Առակ. 20։5)։ Դիտունակ լինելով և մարդկանց հանդեպ անկեղծ հետաքրքրություն ցույց տալով՝ մենք կկարողանանք հմտորեն քարոզել բարի լուրը։