Կարո՞ղ ես փոփոխություններ կատարել քո գրաֆիկում
1. Ինչո՞ւ պետք է փոփոխություններ կատարենք մեր գրաֆիկում՝ քարոզչությանը մասնակցելու համար։
1 Որպես ճշմարիտ քրիստոնյաներ՝ մենք ընդունել ենք «մարդկանց որսորդ» դառնալու հրավերը (Մատթ. 4։19)։ Որսորդի նման՝ մենք ավելի լավ արդյունքների կհասնենք, եթե պլանավորենք քարոզել այն ժամերին, երբ մարդիկ տանն են։ Շատ երկրներում գալիք ամիսներին օրերն ավելի կերկարեն։ Կեսօրից հետո և երեկոյան ավելի շատ մարդիկ են տանը լինում։ Այդ ժամանակ հաճախ նրանք ավելի հանգիստ մտավիճակում են և հակված են հյուրեր ընդունելու։ Կարո՞ղ ես փոփոխություններ կատարել քո գրաֆիկում՝ այդ ժամերին քարոզելու համար (Ա Կորնթ. 9։23)։
2. Ինչպե՞ս կարող ենք բարի լուրը ավելի շատ մարդկանց հայտնել։
2 Վկայություն տալ երեկոյան ժամերին։ Եթե ծրագրենք քարոզել երեկոյան ժամերին, կկարողանանք ավելի շատ մարդկանց հայտնել բարի լուրը (Առակ. 21։5)։ Երեխաները կարող են քարոզել դասերից հետո, մյուսները՝ աշխատանքից հետո։ Գրքի ուսումնասիրության որոշ խմբեր կարող են պլանավորել մեկ ժամ միասին քարոզել նախքան ուսումնասիրությունը սկսելը։
3. Ծառայության ի՞նչ ձևերի կարելի է մասնակցել կեսօրից հետո և երեկոյան ժամերին քո տարածքում։
3 Կեսօրից հետո և երեկոյան ժամերին տնետուն ծառայելով՝ գուցե հանդիպենք նրանց, ովքեր սովորաբար տանը չեն լինում։ Շատ տարածքներում փողոցի վկայությանը և ծառայության այլ ձևերին կարելի է մասնակցել երեկոյան ժամերի։ Շատերը կարծում են, որ վերայցելություններ կատարելու և Աստվածաշնչի ուսումնասիրություններ սկսելու համար ամենահարմար ժամանակը երեկոյան ժամերն են։
4. Ինչո՞ւ է կարևոր խորաթափանցություն դրսևորել և նրբանկատ լինել երեկոյան ժամերին վկայություն տալիս։
4 Անհրաժեշտ է լինել խորաթափանց։ Երեկոյան ժամերին վկայություն տալիս հարկավոր է լինել խոհեմ։ Սովորաբար ավելի լավ կլինի քարոզել երեկոյան ոչ ուշ ժամերի, քան այն ժամանակ, երբ մարդիկ պատրաստվում են քնել (Փիլիպ. 4։5, ՆԱ)։ Երբ թակում ես դուռը, կանգնիր այնտեղ, որտեղից տանտերը կտեսնի քեզ, և ասա, թե ով ես։ Անմիջապես հայտնիր քո այցելության նպատակը։ Եթե անհարմար ժամի ես այցելել, օրինակ՝ երբ ընտանիքը ընթրում է, առաջարկիր մեկ ուրիշ անգամ գալ։ Միշտ եղիր նրբանկատ (Մատթ. 7։12)։
5. Ինչպե՞ս կարող ենք քարոզչության ժամանակ խուսափել վտանգներից։
5 Մենք նաև պետք է մտածենք վտանգների մասին։ Եթե վկայություն ես տալիս մութն ընկնելուց հետո, խելամիտ կլինի գնալ մեկի կամ մի քանիսի ընկերակցությամբ։ Քայլիր լավ լուսավորված փողոցներով, որտեղ մարդիկ կան։ Վկայություն տուր միայն այն վայրերում, որտեղ քեզ ապահով ես զգում։ Խուսափիր այն վայրերից, որտեղ մութն ընկնելուց հետո վտանգավոր է (Առակ. 22։3)։
6. Ուրիշ ի՞նչ օգուտներ կարելի է ստանալ կեսօրից հետո և երեկոյան ժամերին քարոզելու արդյունքում։
6 Կեսօրից հետո և երեկոյան ժամերին քարոզելով՝ կարող ենք համագործակցել ենթառահվիրաների ու ռահվիրաների հետ (Հռովմ. 1։12)։ Կարո՞ղ ես փոփոխություններ կատարել քո գրաֆիկում՝ ծառայությանը այս ժամերին մասնակցելու համար։