Ցո՞ւյց ես տվել առաջին իսկ այցելության ժամանակ, թե ինչպես ենք ուսումնասիրություն անցկացնում
Որոշ բնակիչներ, երբ Աստվածաշունչ ուսումնասիրելու առաջարկ են ստանում, ասում են, որ դա իրենց չի հետաքրքրում կամ որ նրանք իրենց եկեղեցում արդեն ուսումնասիրում են Աստվածաշունչը։ Քանի որ նրանք Աստվածաշունչ ուսումնասիրելու գաղափարը կարող են համեմատել միայն իրենց նախկին փորձառության հետ, նրանք չեն էլ պատկերացնում, թե իրականում որքան բովանդակալից ու հաճելի կարող է լինել Աստվածաշնչի ուսումնասիրությունը։ Ուստի, առաջին իսկ այցելության ժամանակ պարզապես ուսումնասիրություն առաջարկելու փոխարեն՝ ցույց տուր բնակչին, թե ինչպես է դա կատարվում։ Մտածիր՝ ո՞րն է ավելի լավ. մարդուն ասել, որ դու հմուտ խոհարար ես և մյուս անգամ քեզ հետ համեղ ուտեստեղեն կբերես, թե՞ հենց առաջին իսկ հանդիպման ժամանակ նրան հնարավորություն տալ փորձելու քո համեղ ճաշատեսակներից։ Ստորև բերվում է մի օրինակ, թե ինչպես ընդամենը մի քանի րոպեում կարելի է ցույց տալ Աստվածաշնչի ուսումնասիրության անցկացման ձևը (առաջարկը հիմնված է 2006թ. հունվար ամսվա «Մեր թագավորական ծառայությունը» թերթիկի վրա (էջ 6))։
«Ձեր կարծիքով՝ կգա՞ այնպիսի օր, երբ կկատարվեն այս խոսքերը։ [Կարդա՛ Եսայիա 33։24–ը և թույլ տուր պատասխանել։] Թույլ տվեք սրա վերաբերյալ մի հետաքրքիր բան ցույց տալ ձեզ»։ Տուր բնակչին «Աստվածաշունչը սովորեցնում է» գիրքը, խնդրիր բացել 36–րդ էջը և ուշադրություն դարձնել 22–րդ պարբերությանը։ Նախ կարդա պարբերության հարցը և խնդրիր մարդուն, որ փնտրի պատասխանը, մինչ դու կընթերցես պարբերությունը։ Հետո դարձյալ տուր հարցը և լսիր պատասխանը։ Այնուհետև կարդա մեկ ուրիշ սուրբգրային համար։ Մի հարց նշիր, որի պատասխանը կտաս հաջորդ այցի ժամանակ, և կոնկրետ քայլեր ձեռնարկիր, որ անպայման վերայցելես։ Դե ինչ, Աստվածաշնչի ուսումնասիրությունը սկսվա՛ծ է։