Օգնենք նրանց, ովքեր դեռ պատրաստ չեն «Աստվածաշունչը սովորեցնում է» գրքով ուսումնասիրելու
1. «Աստվածաշունչը սովորեցնում է» գիրքը անմիջապես հետաքրքրո՞ւմ է ամեն մարդու։ Բացատրի՛ր։
1 Որպեսզի մարդ դառնա Եհովայի երկրպագու, նա պետք է իմանա, թե ինչ է սովորեցնում Աստվածաշունչը։ Բայց կան մարդիկ, ովքեր ոչ քրիստոնեական կրոնի են պատկանում և Աստվածաշունչը չեն համարում Աստծու Խոսք։ Մյուսներն էլ ընդհանրապես չեն հավատում Աստծուն և չեն հարգում Աստվածաշունչը։ Ի՞նչը կարող է օգնել այն մարդկանց, ովքեր դեռ պատրաստ չեն ուսումնասիրելու «Աստվածաշունչը սովորեցնում է» գրքով։ Ներքոհիշյալ առաջարկները հիմնված են 20 երկրների քարոզիչների դիտարկումների վրա։
2. Եթե մարդն ասում է, որ չի հավատում Աստծուն, ի՞նչ պետք է ձգտենք իմանալ և ինչո՞ւ։
2 Ովքեր չեն հավատում Աստծուն։ Եթե մարդն ասում է, որ չի հավատում Աստծուն, լավ կլինի իմանալ, թե ինչու։ Արդյոք պատճառն այն է, որ նա հավատում է էվոլյուցիայի՞ն։ Հավատը կորցրել է անարդարության և հոգևորականների կեղծավորության պատճառո՞վ։ Մի այնպիսի երկրի՞ց է, որտեղ Աստծուն հավատալը դատապարտվում է։ Գուցե նա կտրականապես չի հերքում Աստծու գոյությունը, բայցև երբեք կարիք չի զգացել հավատալու նրան։ Շատ քարոզիչներ ասում են, որ երբ նման մարդկանց հարցնում ես՝ «մի՞շտ եք այդպես մտածել», նրանք սկսում են բացատրել, թե ինչու չեն հավատում Աստծուն։ Լսիր և մի՛ ընդհատիր։ Երբ հասկանանք, թե ինչու մարդը չի հավատում Աստծուն, այդ ժամանակ կիմանանք, թե ինչպես պատասխանենք և ինչ գրականություն առաջարկենք (Առակ. 18։13)։
3. Ինչպե՞ս կարող ենք հարգել մարդուն և նրա համոզմունքները։
3 Պատասխանելիս զգույշ եղիր, որ այնպիսի տպավորություն չստեղծես, թե քննադատում ես մարդու տեսակետը։ Հետևյալ առաջարկը ստացվել է Միացյալ Նահանգներից. «Շատ կարևոր է ընդունել, որ մարդ իրավունք ունի ընտրելու, թե ինչին հավատա, և հարկավոր է հարգել նրա տեսակետը։ Մեր նպատակը զրույցում հաղթելը չէ։ Ավելի լավ կլինի հարցեր տալ, որոնք կմղեն մտածելու և ինքնուրույն եզրահանգումներ անելու»։ Մի շրջագայող վերակացու, լսելով բնակչի տեսակետը, հաճախ առաջին հերթին հարցնում է. «Երբևէ մտածե՞լ եք, որ կարող է այդպես լինել»։
4. Ինչպե՞ս կարող ենք օգնել բուդդայականներին։
4 «Աստված» հասկացությունը անծանոթ է շատ բուդդայականների։ Մեծ Բրիտանիայում որոշ քարոզիչներ բուդդայականներին սիրում են վկայություն տալ «Հարատև խաղաղություն և երջանկություն. ինչպես գտնել» գրքույկով։ Առաջաբանը քննարկելուց հետո նրանք քննարկում են «Գոյություն ունի՞ Բարձրյալ Ստեղծիչ» վերնագրի նյութը, որից հետո՝ «Օգտակար ուղեցույց՝ ողջ մարդկության համար» վերնագրի նյութը։ Դրանից հետո նրանք գուցե կարողանան ներկայացնել «Աստվածաշունչը սովորեցնում է» գիրքը և բնակչին ասել. «Նույնիսկ եթե չեք հավատում Աստծուն, Աստվածաշունչ ուսումնասիրելը կարող է օգտակար լինել, որովհետև նրանում շատ գործնական խորհուրդներ կան»։ Մի ռահվիրա (ԱՄՆ), որը ծառայում է չինախոս դաշտում, ասաց. «Մեր տարածքում շատերն են սիրում կարդալ։ Հաճախ է լինում, որ բնակիչը ամբողջովին կարդում է մեր տված գրականությունը, նախքան մենք կվերայցելենք նրան։ Բայց նրանք գուցե չհասկանան, թե ինչու կարիք կա Աստվածաշունչ ուսումնասիրելու։ Ուստի ես սիրում եմ առաջին այցելության ժամանակ առաջարկել «Բարի լուր բոլոր ազգերի համար» գրքույկը, քանի որ այն գրված է այնպես, որ քննարկում տեղի ունենա բնակչի հետ»։ Չինախոս տարածքում ծառայող մի շրջանային վերակացու (ԱՄՆ) ասում է, որ առաջին այցելության ժամանակ հնարավոր է ներկայացնել «Աստվածաշունչը սովորեցնում է» գիրքը, բայց լավ կլինի քննարկումը սկսել 2-րդ գլխից, որտեղ խոսվում է Աստվածաշնչի մասին, և ոչ թե 1-ին գլխից, որը խոսում է Աստծու մասին։
5. Ինչո՞ւ է կարևոր համբերատար լինել։
5 Մարդուն ժամանակ է պետք Աստծու հանդեպ հավատ զարգացնելու համար, ուստի շատ կարևոր է համբերատար լինել։ Առաջին մի քանի զրույցներից հետո նա գուցե այդպես էլ չհամաձայնվի, որ գոյություն ունի Արարիչ։ Բայց ժամանակի ընթացքում գուցե ընդունի, որ դա հնարավոր է։ Կամ գուցե ասի, որ հասկանում է, թե ինչու ինչ-որ մեկը կարող է այդպիսի եզրակացության գալ։
6. Ինչո՞ւ ոմանք չեն հետաքրքրվում Աստվածաշնչով։
6 Ովքեր չեն հետաքրքրվում Աստվածաշնչով կամ չեն վստահում նրան։ Հաճախ է լինում, որ Աստծու գոյությունն ընդունող մարդուն Աստվածաշունչը չի հետաքրքրում, որովհետև նա չի հավատում, որ դա Աստծու Խոսքն է։ Հնարավոր է՝ նա ապրում է ոչ «քրիստոնեական» երկրում և Աստվածաշունչը կապում է քրիստոնյա աշխարհի հետ։ Կամ էլ ապրում է «քրիստոնեական» երկրում, որտեղ հասարակությունը խիստ աշխարհիկացված է, և չի կարծում, որ Աստվածաշունչը կարող է իրեն որևէ օգուտ տալ։ Ինչպե՞ս կարող ենք օգնել այդ մարդկանց հետաքրքրվելու Աստվածաշնչով և, ի վերջո, ուսումնասիրություն սկսելու «Աստվածաշունչը սովորեցնում է» գրքով։
7. Հաճախ ինչպե՞ս կարելի է մարդու մեջ հետաքրքրություն առաջացնել Աստվածաշնչի հանդեպ։
7 Հունաստանի մասնաճյուղը գրեց. «Աստվածաշնչով չհետաքրքրվող մարդկանց օգնելու լավագույն ձևն այն է, որ պարզապես բացես Աստվածաշունչը և ցույց տաս, թե ինչ է այնտեղ գրված։ Շատ քարոզիչներ նկատել են, որ Աստվածաշնչում գրված խոսքերը ավելի ազդու են, քան մեր սեփական խոսքերը (Եբր. 4։12)։ Բազմաթիվ մարդիկ, տեսնելով Աստծու անունը Աստվածաշնչում, ցանկացել են մոտիկից ծանոթանալ Աստվածաշնչին»։ Հնդկաստանի մասնաճյուղը գրեց. «Կյանքի և մահվան վերաբերյալ ճշմարտությունը իսկապես գրավում է բազմաթիվ հնդուականների։ Նրանց գրավում է նաև աստվածաշնչյան այն խոստումը, որ լինելու է կաստայական բաժանումից զերծ աշխարհ»։ Տեղի խնդիրներին անդրադառնալը հնարավորություն է տալիս քարոզիչներին, որ մարդկանց բացատրեն, թե ըստ Աստվածաշնչի՝ ինչ է Աստծու Թագավորությունն անելու, որպեսզի լուծի այդ խնդիրները։
8. Ի՞նչ կարող ենք ասել այն մարդուն, ով քրիստոնյա աշխարհի պատճառով բացասական տեսակետ ունի Աստվածաշնչի վերաբերյալ։
8 Եթե մարդը քրիստոնյա աշխարհի պատճառով բացասական տեսակետ ունի Աստվածաշնչի մասին, նրան բացատրիր, որ քրիստոնյա աշխարհը սխալ է ներկայացնում Աստվածաշունչը և նրա ուսմունքները։ Հնդկաստանի մասնաճյուղը գրեց. «Երբեմն կարիք է լինում օգնելու մարդկանց հասկանալու, որ եկեղեցիները Աստվածաշնչի պաշտպանները չեն»։ Հնդուականներին հաճախ տպավորում է «Ո՞րն է կյանքի իմաստը. ինչպե՞ս գտնել այն» գրքույկի 4-րդ գլուխը, որտեղ խոսվում է այն մասին, թե եկեղեցիները ինչպես են փորձել աղավաղել և ոչնչացնել Աստծու Խոսքը։ Մի ռահվիրա (Բրազիլիա) ասում է. «Գուցե ցանկանաք ավելին իմանալ Աստվածաշնչի բովանդակության մասին։ Շատերն այդպես են անում և իրենց պարտավորված չեն զգում հարելու որևէ կրոնի։ Դուք գուցե զարմանաք՝ իմանալով, թե ինչ է գրված Աստվածաշնչում»։
9. Ինչո՞ւ չպետք է վհատվենք, եթե մարդը առաջին այցերի ժամանակ չի հետաքրքրվում Աստվածաշնչով։
9 Եհովան տեսնում է յուրաքանչյուր մարդու սիրտը (1 Սամ. 16։7; Առակ. 21։2)։ Նա սրտի ճիշտ տրամադրվածություն ունեցողներին ձգում է դեպի ճշմարիտ երկրպագությունը (Հովհ. 6։44)։ Նրանցից շատերը երբեք չեն իմացել Աստծու մասին և շատ քիչ են առնչվել Աստվածաշնչին։ Մեր ծառայությունը նրանց հնարավորություն է տալիս «ճշմարտության մասին ճշգրիտ գիտելիքներ ստանալու և փրկվելու» (1 Տիմոթ. 2։4)։ Ուստի եթե ոմանք առաջին այցերի ժամանակ չեն հետաքրքրվում Աստվածաշնչով, մի՛ վհատվիր։ Ձեռքիդ տակ եղած միջոցներով խթանիր նրանց հետաքրքրությունը։ Ի վերջո, գուցե քեզ հաջողվի քննարկումներ անցկացնել ուսումնասիրության մեր հիմնական ձեռնարկի՝ «Ի՞նչ է սովորեցնում Աստվածաշունչը իրականում» գրքի միջոցով։
[շրջանակ 4-րդ էջի վրա]
Եթե բնակիչն ասում է, որ չի հավատում Աստծուն, փորձիր հետևյալը.
• Հարցրու՝ «մի՞շտ եք այդպես մտածել», որպեսզի իմանաս պատճառը։
• Եթե նա բուդդայական է, օգտագործիր «Հարատև խաղաղություն և երջանկություն. ինչպես գտնել» գրքույկի 9–12-րդ էջերը (անգլ., ռուս.)։
• Եթե նա հավատում է էվոլյուցիային, կարող են օգտակար լինել հետևյալ աղբյուրները.
«Արթնացե՛ք»-ի «Արդյոք պատահականությո՞ւն է» խորագրի հոդվածները։
«Արարչագործության հրաշքները արտացոլում են Աստծու փառքը» ֆիլմը (ռուս.)։
«Ինչպես կյանքից բավականություն ստանալ» գրքույկի 4-րդ մասը (անգլ., ռուս.), «Ինչպե՞ս է կյանքն առաջացել» և «Կյանքի ծագումը. հինգ հարց, որ արժե քննել» գրքույկները։
• Եթե Աստծու հանդեպ հավատը կորցրել է անարդարության և տառապանքի պատճառով, օգտակար կարող են լինել հետևյալ աղբյուրները.
«Գոյություն ունի՞ արդյոք հոգատար Ստեղծիչ» գրքի 10-րդ գլուխը։
«Աստված հոգ տանո՞ւմ է մեր մասին» գրքույկի 6-րդ մասը և «Ո՞րն է կյանքի իմաստը. ինչպե՞ս գտնել այն» գրքույկի 6-րդ մասը։
• Եթե բնակիչը կարծում է, որ Աստված հնարավոր է՝ գոյություն ունենա, անցիր «Աստվածաշունչը սովորեցնում է» գրքին։ Գուցե լավ լինի սկսել 2-րդ գլխից կամ մեկ այլ գլխից, որը համապատասխանում է նրան։
[շրջանակ 5-րդ էջի վրա]
Եթե բնակիչը չի հավատում Աստվածաշնչին, փորձիր հետևյալը.
• Քննարկիր «Ինչպե՞ս է առաջացել կյանքը. էվոլյուցիայի՞, թե՞ արարչագործության միջոցով» գրքի 17-րդ և 18-րդ գլուխները (անգլ., ռուս.)։
• Հնդուականների համար օգտագործիր «Ինչո՞ւ է հարկավոր Աստծուն երկրպագել սիրով և ճշմարտությամբ» գրքույկը (անգլ.)։
• Հրեաների համար օգտագործիր «Երբևիցե կլինի՞ աշխարհ առանց պատերազմի» գրքույկի 3–11-րդ էջերը (անգլ., ռուս.)։
• Քննարկիր աստվածաշնչյան սկզբունքներին հետևելու օգուտները։ Աստվածաշնչի գործնական արժեքը ցույց տուր հետևյալ հրատարակությունների միջոցով.
«Արթնացե՛ք»-ի «Աջակցություն ընտանիքին» խորագրի հոդվածները։
«Աստվածաշունչ. նրա ազդեցությունը ձեր կյանքում» ֆիլմը։
«Բարի լուր Աստծուց» գրքույկի 9-րդ և 11-րդ դասերը, «Գիրք բոլորի համար» գրքույկի 22–26-րդ էջերը, «Ինչպես կյանքից բավականություն ստանալ» գրքույկի 2-րդ մասը (անգլ., ռուս.)։
Բուդդայականների համար օգտագործիր «Ճանապարհ, որ տանում է խաղաղության և երջանկության» գրքույկի 3–7-րդ էջերը (անգլ., ռուս.)։
Մահմեդականների համար օգտագործիր «Իսկական հավատը քո կյանքը երջանիկ կդարձնի» գրքույկի 3-րդ մասը (անգլ., ռուս.)։
Եթե քարոզում ես այնպիսի տարածքում, որտեղ մարդիկ կանխակալ կարծիք ունեն Աստվածաշնչի մասին, լավ կլինի՝ չխոսես այն մասին, թե որտեղից են այն իմաստուն խոսքերը, որ ասում ես իրեն, մինչև որ մի քանի այց չանես։
• Բացատրիր, թե ինչպես են աստվածաշնչյան մարգարեությունները կատարվում։ Դրա համար կարող ես օգտագործել հետևյալ հրատարակությունները.
«Աստվածաշունչ. ճշգրիտ պատմություն, վստահելի մարգարեություններ» ֆիլմը։
«Գիրք բոլորի համար» գրքույկի 27–29-րդ էջերը։
• Երբ մարդը սկսում է հետաքրքրվել, թե ինչ է Աստվածաշունչն ասում տարբեր թեմաների վերաբերյալ, անցիր «Աստվածաշունչը սովորեցնում է» գրքին։
[շրջանակ 6-րդ էջի վրա]
Եթե բնակիչն ասում է՝ «ես չեմ հավատում Աստծուն», կարող ես ասել.
• «Թույլ տվեք կարճ ասելու, թե ինչն է ինձ համոզել հավատալու, որ կա Արարիչ»։ Հետո «Տրամաբանել» գրքի 84–86-րդ էջերից (անգլ., [էջ 357–359, ռուս.]) մի քանի միտք ասա կամ պայմանավորվիր, որ նրա համար կբերես քո սիրած հրատարակությունը։
• «Իսկ եթե գոյություն ունենար Աստված, ինչպիսի՞ն կուզենայիք՝ նա լիներ»։ Շատ մարդիկ ասում են, որ կուզեին՝ այդ Աստվածը լիներ սիրող, արդար, գթառատ, անկողմնակալ։ Աստվածաշնչից ցույց տուր, որ Աստված ունի այդպիսի հատկություններ։ Գուցե նույնիսկ հնարավոր լինի քննարկում անցկացնել «Աստվածաշունչը սովորեցնում է» գրքի 1-ին գլխի 6-րդ պարբերությունից սկսած։
Եթե բնակիչն ասում է՝ «ես չեմ հավատում Աստվածաշնչին», կարող ես ասել.
• «Շատ մարդիկ են ասում, որ չեն հավատում Աստվածաշնչին։ Ոմանք մտածում են, որ Աստվածաշունչը հակասում է գիտությանը, և որ աստվածաշնչյան չափանիշները գործնական չեն։ Իսկ դուք երբևէ կարդացե՞լ եք Աստվածաշունչը։ [Թույլ տուր պատասխանել։ Հետո ցույց տուր նրան «Գիրք բոլորի համար» գրքույկի 3-րդ էջի նախաբանը և առաջարկիր գրքույկը։] Շատերը չեն ընդունում Աստվածաշունչը, որովհետև կրոնը սխալ է ներկայացրել նրա ուսմունքները։ Մեկ ուրիշ անգամ, եթե դեմ չեք, կարող ենք խոսել 4-րդ և 5-րդ էջերում գրված օրինակի շուրջ»։
• «Շատ մարդիկ են այդպես ասում։ Թույլ տվեք Աստվածաշնչից ձեզ համար կարդալ մի խոսք, որը տպավորել է ինձ։ [Կարդա՛ Հոբ 26։7 կամ Եսայիա 40։22 համարը, որը ցույց է տալիս, որ Աստվածաշունչը գիտական տեսանկյունից ճշգրիտ է։] Աստվածաշունչը նաև պարունակում է իմաստուն խորհուրդներ ընտանիքների համար։ Մեկ ուրիշ անգամ կխոսենք այդ խորհուրդներից մեկի մասին»։
• «Շնորհակալություն ձեր տեսակետն արտահայտելու համար։ Ի՞նչ եք կարծում, եթե Աստված մարդկության համար մի գիրք գրեր, ինչի՞ մասին այն կլիներ»։ Հետո Աստվածաշնչից մի համար կարդա, որը համապատասխանում է նրա պատասխանին։