Ինչպես վկայություն տալ՝ օգտագործելով գրականության ցուցատախտակ

Գրականության ցուցատախտակները ազնվասիրտ մարդկանց ճշմարտությունը հայտնելու արդյունավետ միջոց են (Հովհ. 6։44)։ Ուստի երեցներին հորդոր է տրվում հրապարակային վկայություն կազմակերպել իրենց ժողովի տարածքի մարդաշատ փողոցներում։ Քանի որ ցուցատախտակները շարժական են և չեն ամրացվում որևէ տեղ, ուստի սովորաբար կարիք չի լինում իշխանություններից թույլտվություն վերցնել դրանք որևէ տեղ դնելու համար։ Ովքե՞ր կարող են մասնակցել ծառայության այս ձևին։ Այն քարոզիչները, ովքեր ողջամտություն են ցուցաբերում, կարող են իրենց ճիշտ դրսևորել և զրույց վարելու լավ հմտություններ ունեն։ Ներքոհիշյալ հիշեցումները կօգնեն քարոզիչներին լավագույնս կատարելու այս ծառայությունը։

Ինչ անել

Եղիր ընկերական, ջերմ և պատրաստ օգնելու անցորդներին։ Շատ քարոզիչներ անկեղծորեն ժպտում են և ողջունում անցորդներին։ Երբ որևէ մեկը անցնելիս նայում է ցուցատախտակին, կարող ես ասել. «Եթե Ձեզ որևէ բան հետաքրքրեց, կարող եք վերցնել»։
Որոշեք, թե ցուցատախտակից ինչ հեռավորության վրա եք կանգնելու։ Որոշ վայրերում արդյունավետ է եղել, երբ քարոզիչները մի քանի քայլ հեռու են կանգնել ցուցատախտակից։ Սակայն մյուսները նկատել են, որ երբ մի քանի քայլ ես հեռու կանգնած, անցորդները վարանում են կանգ առնել ու գրականություն վերցնել, ուստի նրանք ավելի հեռու են կանգնում։ Երբ որևէ մեկը մոտենում է, փորձիր զրույց սկսել նրա հետ՝ հարցնելով. «Երբևէ մտածե՞լ եք այս հարցի մասին»։
Հնարավորինս հաճախ օգտագործիր Աստվածաշունչը։
Եթե որևէ մեկը վերցնում է Աստվածաշնչի ուսումնասիրության ձեռնարկ, օրինակ՝ «Աստվածաշունչը սովորեցնում է» գիրքը, ապա բացատրիր, թե ինչպես է անցկացվում Աստվածաշնչի ուսումնասիրությունը։ Առաջարկիր դիտել «Ինչո՞ւ արժե ուսումնասիրել Աստվածաշունչը» տեսանյութը։
Եթե հարմար է, հետաքրքրվող անհատից վերցրու նրա կոնտակտային տվյալները։ Եթե նա ձեր տարածքում չի ապրում, ապա լրացրու «Խնդրում ենք, այցելիր» (S-43) բլանկը և անմիջապես փոխանցիր քարտուղարին։

Ինչ չանել

Մի՛ եղիր ագրեսիվ, համառ և արձանի պես մի՛ կանգնիր ցուցատախտակի կողքին։
Ծառայության այս ձևը մի՛ համարիր պարզապես գրականություն բաժանելու միջոց։ Մեր նպատակն է Աստվածաշնչի ուսումնասիրություն սկսել, ուստի պետք է փորձենք զրույց սկսել մարդկանց հետ։
Մի՛ փակիր ցուցատախտակի առջևի մասը։ Համագործակցիդ հետ զրույցով մի՛ տարվիր։ Եթե անհրաժեշտություն է առաջացել հեռախոսազանգի պատասխանել, ապա լավ կլինի ցուցատախտակից փոքր-ինչ հեռանալ։
Մի՛ վիճիր նրանց հետ, ովքեր վիճաբանություն են հրահրում։ Եթե անհատը անդադար վիրավորում է կամ խիստ հակառակվում, լավ կլինի ցուցատախտակը տեղափոխել ուրիշ վայր։