Տարեցները մեր քրիստոնեական եղբայրության արժեքավոր մասն են

«Տիրոջ տան մէջ տնկուածները.... կ’բուսնեն [«պիտի ծաղկին», ԱԱ]։ Ծերութեան մէջ էլ պտուղ կ’բերեն» (Սաղմոս 92։13, 14)։

1. Ի՞նչ տեսակետ ունեն շատ մարդիկ տարեցների մասին։

ԵՀՈՎԱՆ սիրում է իր բոլոր, այդ թվում հավատարիմ տարեց ծառաներին։ Բայց ահա, ըստ մի հետազոտության, Միացյալ Նահանգներում ամեն տարի գրեթե կես միլիոն տարեցներ ոտնձգությունների են ենթարկվում կամ արհամարհական վերաբերմունքի արժանանում։ Աշխարհի տարբեր վայրերից ստացվող նման լուրերը վկայում են, որ տարեցների հանդեպ այդպիսի վերաբերմունքը համաշխարհային խնդիր է դարձել։ Այդ չարիքի արմատը, ինչպես մի կազմակերպություն է նշում, «բազմաթիվ մարդկանց շրջանում համընդհանուր տարածում գտած մտածելակերպն է.... թե տարեցներն իրենց դարը ապրել են, պիտանի չեն ու չափից դուրս կախում ունեն ուրիշներից»։

2. ա) Ինչպե՞ս է Եհովան դիտում իր հավատարիմ տարեց ծառաներին։ բ) Ի՞նչ սրտահույզ նկարագրություն ենք կարդում Սաղմոս 92։12–15-ում։

² Եհովա Աստված թանկ է գնահատում իր նվիրված տարեց ծառաներին։ Նա առավելաբար ուշադրություն է դարձնում մեր ‘ներսի մարդուն’՝ մեր հոգևոր վիճակին, ու ոչ թե մեր ֆիզիկական սահմանափակ հնարավորություններին (Բ Կորնթացիս 4։16)։ Նրա Խոսքում՝ Աստվածաշնչում, կարդում ենք հետևյալ սրտառուչ հավաստիացումը. «Արդարը արմաւենիի պէս կ’բուսնի. Լիբանանի մայրին պէս կ’մեծանայ։ Տիրոջ տան մէջ տնկուածները մեր Աստուծոյ սրահներումը կ’բուսնեն [«պիտի ծաղկին», ԱԱ]։ Ծերութեան մէջ էլ պտուղ կ’բերեն. պարարտ եւ դալար կ’լինին. որ պատմեն, թէ ուղիղ է Տէրը [Եհովան]» (Սաղմոս 92։12–15)։ Այս համարների շուրջ խորհրդածելը կօգնի ձեզ, տարեց եղբայրնե՛ր ու քույրե՛ր, տեսնել, թե ինչ արժեքավոր ներդրում կարող եք ունենալ քրիստոնեական եղբայրության մեջ։

«Ծերութեան մէջ էլ պտուղ կ’բերեն»

3. ա) Ինչո՞ւ են արդարները նմանեցվում արմավենիների։ բ) Ինչպե՞ս կարող են տարեցները ‘ծերության մեջ էլ պտուղ բերել’։

³ Սաղմոսերգուն արդար մարդուն արմավենու է նմանեցնում, որը տնկված է «մեր Աստուծոյ սրահներումը»։ Նա ‘ծերության մեջ էլ է պտուղ բերում’։ Սա քաջալերական միտք է, այդպես չէ՞։ Աստվածաշնչյան ժամանակներում սովորական էր տեսնել Արևելքի բնակիչների տան բակերում վեհաշուք, ուղղաձիգ արմավենիներ։ Բացի այն, որ այդ ծառերը գեղազարդային արժեք ունեին, նրանք բարձր էին գնահատվում նաև մեծ պտղատվության համար, և որոշ ծառեր կարող էին պտուղ տալ մի քանի հարյուր տարի շարունակ։a Հաստատապես ‘տնկված’ մնալով ճշմարիտ երկրպագության մեջ՝ դու նույն ձևով կարող ես «ամեն բարի գործով պտղաբեր լին[ել]» (Կողոսացիս 1։10)։

4, 5. ա) Ի՞նչ կարևոր «պտուղ» քրիստոնյաները պետք է բերեն։ բ) Բերեք օրինակներ տարեց անհատների, որոնք «շրթունքների պտուղ» են տվել։

⁴ Եհովան քրիստոնյաներից «շրթունքների պտուղ» է ակնկալում, այսինքն՝ որ նրանք խոսքով փառաբանեն իրեն ու իր նպատակները (Եբրայեցիս 13։15)։ Արդյո՞ք սա վերաբերում է նաև տարեց անհատներին։ Անշո՛ւշտ։

⁵ Աստվածաշունչը պարունակում է օրինակներ տարեց անձանց, որոնք անվախորեն վկայություն են տվել Եհովայի ու նրա նպատակների մասին։ Մովսեսն արդեն ‘յոթանասուն տարին’ անց էր, երբ Եհովան նրան հանձնարարեց լինել իր մարգարեն ու ներկայացուցիչը (Սաղմոս 90։10; Ելից 4։10–17)։ Դանիել մարգարեի տարիքը չխանգարեց նրան անվախորեն վկայություն տալ Եհովայի գերիշխանության մասին։ Դանիելը, հավանաբար, իննսունն անց էր, երբ Բաղդասարը կանչեց նրան, որ նա մեկնի պատի առեղծվածային ձեռագիրը (Դանիէլ, 5–րդ գլուխ)։ Իսկ ի՞նչ կարելի է ասել տարեց Հովհաննես առաքյալի մասին։ Իր հավատարիմ ու երկարատև ծառայության վերջում նա բանտարկվեց Պատմոս կղզում «Աստուծոյ խօսքի համար, եւ Յիսուս Քրիստոսի վկայութեան համար» (Յայտնութիւն 1։9)։ Դու ամենայն հավանականությամբ կարող ես հիշել աստվածաշնչյան շատ այլ անձանց, որոնք «շրթունքների պտուղ» են բերել ծեր հասակում (Ա Թագաւորաց 8։1, 10; 12։2; Գ Թագաւորաց 14։4, 5; Ղուկաս 1։7, 67–79; 2։22–32)։

6. Ինչպե՞ս է Եհովան օգտագործում ‘ծերերին’՝ այս վերջին օրերում մարգարեանալու համար։

⁶ Մեջբերում անելով եբրայեցի մարգարե Հովելի խոսքերից՝ Պետրոս առաքյալը ազդարարեց. «Կ’լինի յետի օրերումը, ասում է Աստուած, որ իմ Հոգուցը կ’թափեմ ամեն մարմնի վերայ [ներառյալ ‘ծերերի’].... եւ կ’մարգարէանան» (Գործք 2։17, 18; Յովէլ 2։28)։ Սրան համապատասխան՝ այս վերջին օրերում Եհովան օծյալ մնացորդի և ‘ուրիշ ոչխարների’ տարեց անդամների միջոցով հռչակում է իր նպատակները (Յովհաննէս 10։16)։ Նրանցից ոմանք տասնամյակներ շարունակ հավատարմորեն Թագավորության պտուղ են բերում։

7. Օրինակով բացատրեք, թե տարեցներն ինչպես են շարունակում Թագավորության պտուղ բերել՝ չնայած իրենց ֆիզիկական սահմանափակ հնարավորություններին։

⁷ Քննարկենք Սոնյայի օրինակը։ Նա Թագավորության լիաժամ քարոզիչ դարձավ 1941 թ.–ին։ Չնայած իր քրոնիկական հիվանդությանը՝ Սոնյան կանոնավորաբար Աստվածաշնչի ուսումնասիրություններ էր անցկացնում իր տանը։ «Բարի լուրը քարոզելը իմ կյանքի կենսական մասն է,— բացատրել է Սոնյան։— Ըստ էության, դա իմ կյանքն է։ Ես մտադիր չեմ «թոշակի անցնելու»»։ Վերջերս Սոնյան ու իր քույրը՝ Օլիվը, հիվանդանոցի սպասասրահում հանդիպեցին Ջանետ անունով մի կնոջ, որը անբուժելի հիվանդություն ուներ, ու հայտնեցին նրան, թե Աստվածաշունչն ինչ հույս է տալիս։ Ջանետի մայրը, որ նվիրված կաթոլիկ էր, այնպես էր տպավորվել իր դստեր հանդեպ ցուցաբերված հոգատարությունից, որ համաձայնվեց Աստվածաշունչ ուսումնասիրել և արդեն գերազանց արդյունքների է հասել։ Կարո՞ղ ես օգտվել նման հնարավորություններից՝ բերելու Թագավորության պտուղ։

8. Ինչպե՞ս արդեն տարիքն առած Քաղեբը ցույց տվեց, որ վստահում է Եհովային, և ինչպե՞ս կարող են տարեց քրիստոնյաները ընդօրինակել նրան։

⁸ Տարեց քրիստոնյաները, չնայած տարիքի բերած դժվարություններին, շարունակում են հետևողականորեն ու քաջաբար մասնակցել Թագավորության քարոզչության գործին և դրանով հետևում են հավատարիմ իսրայելացի Քաղեբի օրինակին, որն անապատում չորս տասնամյակ շարունակ ընկերակցում էր Մովսեսին։ Քաղեբը 79 տարեկան էր, երբ անցավ Հորդանան գետը ու մտավ Ավետյաց երկիր։ Իսրայելի հաղթական բանակի շարքերում վեց տարի կռվելուց հետո նա կարող էր հանգստանալ դափնիների վրա։ Բայց նա այդպես չվարվեց։ Նա խիզախորեն խնդրեց, որ իրեն դժվար հանձնարարություն տան՝ գրավել այն ‘մեծ պարսպավոր քաղաքները’, որ գտնվում են Հուդայի լեռնային շրջաններում և որտեղ անսովոր մեծ չափեր ունեցող ենակիմներն էին բնակվում։ Եհովայի օգնությամբ Քաղեբն իսկապես նրանց «վռնտե[ց], ինչպէս Տէրը ըսաւ» (ԱԱ) (Յեսու 14։9–14; 15։13, 14)։ Վստահ եղիր, որ Եհովան, ինչպես որ Քաղեբի հետ էր, այնպես էլ քեզ հետ է, մինչ դու շարունակում ես Թագավորության պտուղ բերել տարեց հասակում։ Եվ եթե հավատարիմ մնաս, նա քեզ տեղ կտա իր խոստացած նոր աշխարհում (Եսայիա 40։29–31; Բ Պետրոս 3։13)։

«Պարարտ եւ դալար կ’լինին»

9, 10. Ինչպե՞ս են տարեց քրիստոնյաները շարունակում հավատի մեջ առողջ լինել ու պահպանել իրենց հոգևոր կենսունակությունը (տե՛ս 13–րդ էջի շրջանակը)։

⁹ Իր ուշադրությունը դարձնելով Եհովայի տարեց ծառաների բեղմնավոր գործունեության վրա՝ սաղմոսերգուն երգեց. «Արդարը արմաւենիի պէս կ’բուսնի. Լիբանանի մայրին պէս կ’մեծանայ։ Ծերութեան մէջ էլ պտուղ կ’բերեն. պարարտ եւ դալար կ’լինին» (Սաղմոս 92։12, 14)։

¹⁰ Ինչպե՞ս կարող ես շարունակել հոգևորապես կայտառ մնալ՝ չնայած ավելացող տարիներին։ Արմավենու չխամրող գեղեցկության գաղտնիքն այն է, որ նա միշտ առատորեն ջուր է ստանում։ Նման ձևով, դու կարող ես «խմել» աստվածաշնչային ճշմարտության ջրերից՝ ուսումնասիրելով Աստծո Խոսքը և համագործակցելով նրա կազմակերպության հետ (Սաղմոս 1։1–3; Երեմիա 17։7, 8)։ Հոգևորապես կենսունակ լինելով՝ դու թանկագին ես դառնում քո հավատակիցների աչքում։ Ուշադրություն դարձրու, թե այս խոսքերի ճշմարտացիությունն ինչպես է փաստվել ծեր քահանայապետ Հովիադայի դեպքում։

11, 12. ա) Ի՞նչ կենսական դեր խաղաց Հովիադան Հուդայի թագավորության պատմության մեջ։ բ) Ինչպե՞ս Հովիադան օգտագործեց իր ազդեցությունը, որպեսզի առաջ տանի ճշմարիտ երկրպագությունը։

¹¹ Հովիադան, հավանաբար, հարյուրն անց էր, երբ փառամոլ թագուհի Գոթողիան, սպանելով իր թոռներին, Հուդայում իշխանությունը վերցրեց իր ձեռքը։ Ի՞նչ կարող էր ծեր Հովիադան անել։ Վեց տարի շարունակ նա ու իր կինը միակ կենդանի մնացած արքայազնին՝ Հովասին, գաղտնի պահում էին տաճարում։ Հետո Հովիադան վճռական քայլերի դիմեց. յոթ տարեկան Հովասին թագավոր հռչակեց, իսկ Գոթողիային սպանել տվեց (Բ Մնացորդաց 22։10–12; 23։1–3, 15, 21)։

¹² Որպես թագավորի խնամատար՝ Հովիադան իր ազդեցությունն օգտագործեց ճշմարիտ երկրպագության առաջխաղացման համար։ Նա «ուխտ դրաւ իր մէջ եւ բոլոր ժողովրդի մէջ եւ թագաւորի մէջ, որ Տիրոջ ժողովուրդը լինին»։ Հովիադայի կարգադրությամբ ժողովուրդը քանդեց Բահաղ չաստծո տունը ու փշրեց նրա զոհասեղանները, կուռքերը և սպանեց նրա քահանային։ Նաև Հովիադայի գլխավորությամբ Հովասը վերականգնեց տաճարային ծառայությունները ու վերանորոգեց տաճարը, ինչի կարիքը խիստ զգացվում էր։ «Յովասն ուղղութիւն արաւ Տիրոջ աչքի առաջին իր բոլոր օրերումը, քանի որ Յովիադա քահանան նրան սովորեցնում էր» (Բ Մնացորդաց 23։11, 16–19; 24։11–14; Դ Թագաւորաց 12։2)։ Երբ Հովիադան մահացավ 130 տարեկանում, նրան բացառիկ պատիվ տվեցին՝ թաղելով թագավորների հետ, քանի որ «Իսրայէլում բարութիւն արաւ Աստուծոյ եւ նորա տան համար» (Բ Մնացորդաց 24։15, 16)։

13. Ինչպե՞ս կարող է տարեց քրիստոնյան բարիք գործել «Աստուծոյ եւ նորա տան համար»։

¹³ Թերևս վատ առողջությունը կամ այլ հանգամանքներ սահմանափակում են քո հնարավորությունները ներդրում ունենալու ճշմարիտ երկրպագության առաջխաղացման մեջ։ Սակայն նույնիսկ այդ դեպքում դու կարող ես բարիք գործել «Աստուծոյ եւ նորա տան համար»։ Եհովայի հոգևոր տան հանդեպ քո եռանդը կարող ես դրսևորել՝ հաճախելով ու մասնակցելով ժողովի հանդիպումներին, ինչպես նաև, երբ հնարավոր է, մասնակցելով քարոզչական ծառայությանը։ Պատրաստակամորեն ընդունելով Աստվածաշնչի խորհուրդը և նվիրվածորեն թիկունք կանգնելով ‘հավատարիմ և իմաստուն ծառային’ ու ժողովին՝ դու կզորացնես քրիստոնյա եղբայրներին ու քույրերին (Մատթէոս 24։45–47)։ Նաև կարող ես քո հավատակիցներին մղել ‘դեպի սիրո և բարի գործերի’ (Եբրայեցիս 10։24, 25; Փիլիմոն 8, 9)։ Դու օրհնություն կլինես մյուսների համար, եթե գործես համաձայն Պողոս առաքյալի խորհրդի. «Ծերերը զգաստ լինեն, ծանրաբարոյ, խոհեմ, ողջամիտ [«կայտառ», An American Translation]՝ հաւատքով, սիրով, համբերութեամբ. նոյնպէս էլ պառաւները սրբավայել վարմունքով լինեն, ոչ բանսարկու, ոչ գինեմոլ, այլ բարի խրատ տուող» (Տիտոս 2։2–4)։

14. Երկար տարիներ որպես քրիստոնյա երեց ծառայած եղբայրները ի՞նչ կարող են անել հանուն ճշմարիտ երկրպագության։

¹⁴ Արդեն երկա՞ր տարիներ է, որ ծառայում ես ժողովում որպես երեց։ Այդպիսի մի երեց հետևյալ խորհուրդն է տալիս. «Առատաձեռնորեն օգտագործիր քո իմաստությունը, որ գալիս է տարիների հետ։ Պատասխանատվություններ, ինչպես նաև փորձդ փոխանցիր պատրաստակամ ոգի ունեցողներին.... Նկատիր ուրիշների պոտենցիալ հնարավորությունները։ Զարգացրու և սնուցիր դրանք։ Հիմք դիր ապագայի համար» (Բ Օրինաց 3։27, 28)։ Քո անկեղծ հետաքրքրությունը, որ ցուցաբերում ես Թագավորության՝ անընդհատ ընդարձակվող գործի հանդեպ, շատ օրհնություններ կբերի մեր քրիստոնեական եղբայրությանը։

«Պատմեն, թէ ուղիղ է Տէրը»

15. Ինչպե՞ս են տարեց քրիստոնյաները ‘պատմում, թե ուղիղ է Տերը’։

¹⁵ Աստծո տարեց ծառաները ուրախությամբ են իրագործում իրենց պատասխանատվությունը՝ ‘պատմել, թե ուղիղ է Տերը’՝ Եհովան։ Եթե տարեց քրիստոնյա ես, ապա խոսքով ու գործով կարող ես ցույց տալ մյուսներին, որ Եհովան ‘քո վեմն է, և անիրավություն չկա նրանում’ (Սաղմոս 92։15)։ Արմավենին լուռ վկայություն է տալիս իր Արարչի անզուգական հատկությունների մասին։ Սակայն Եհովան քեզ առանձնաշնորհում է տվել վկայել իր մասին այն մարդկանց, ովքեր այժմ ընդունում են ճշմարիտ երկրպագությունը (Բ Օրինաց 32։7; Սաղմոս 71։17, 18; Յովէլ 1։2, 3)։ Ինչո՞ւ է դա կարևոր։

16. Աստվածաշնչային ո՞ր օրինակն է լուսաբանում կարևորությունը ‘պատմելու, թե ուղիղ է Տերը’։

¹⁶ Երբ իսրայելացիների առաջնորդ Հեսուն արդեն «ծերացել էր եւ օրերն անց կացրել», նա «կանչեց բոլոր Իսրայէլին՝ այսինքն նորա ծերերին, իշխաններին, դատաւորներին եւ ոստիկաններին», որպեսզի հիշեցնի Աստծո ուղիղ գործերը։ Նա ասաց. «Ձեր Տէր Աստուածը ձեզ համար որչափ բարի խօսքեր որ ասել էր, նորանցից մի բան չ’պակասեց, ամենն էլ ձեզ վերայ կատարուեցաւ. նորանցից ոչ մէկ խօսք գետինը չ’ընկաւ» (Յեսու 23։1, 2, 14)։ Մի որոշ ժամանակ նրանք, այս խոսքերով զորացած, հավատարիմ մնացին Եհովային։ Սակայն Հեսուի մահվանից հետո «մեկ ուրիշ ազգ վեր կացաւ, որ չէր ճանաչում ոչ Տիրոջը եւ ոչ այն գործերը, որ նա արել էր Իսրայէլի համար։ Եւ Իսրայէլի որդիքը Տիրոջ առաջին չարութիւն արին եւ Բահաղիմը պաշտեցին» (Դատաւորաց 2։8–11)։

17. Ի՞նչ է Եհովան արել իր ժողովրդի համար մեր օրերում։

¹⁷ Ճիշտ է, ժամանակակից քրիստոնեական ժողովի անարատությունը կախված չէ Աստծո տարեց ծառաների բանավոր վկայությունից։ Բայցևայնպես, Եհովայի ու նրա խոստումների հանդեպ մեր հավատն է՛լ ավելի է ամրանում, երբ անձամբ ականատեսներն են պատմում մեզ, թե ինչպես է նա ‘մեծ գործեր’ արել իր ժողովրդի համար այս վերջին օրերում (Դատաւորաց 2։7; Բ Պետրոս 1։16–19)։ Եթե վաղուց ես Եհովայի կազմակերպության մեջ, ապա գուցե հիշում ես այն ժամանակները, երբ քո բնակության վայրում կամ ձեր երկրում Թագավորության շատ քիչ քարոզիչներ կային, կամ երբ քարոզչության գործը մեծ հակառակության էր հանդիպում։ Ժամանակի ընթացքում ականատես ես եղել, թե ինչպես է Եհովան վերացրել որոշ խոչընդոտներ ու արագացրել Թագավորության քարոզիչների թվի աճը (Եսայիա 54։17; 60։22)։ Դու տեսել ես, թե ինչպես են հստակեցվել աստվածաշնչյան ճշմարտությունները ու թե ինչպես է աստիճանաբար հղկվել Աստծո կազմակերպության տեսանելի մասը (Առակաց 4։18; Եսայիա 60։17)։ Ջանո՞ւմ ես կերտել ուրիշների հավատը՝ նրանց պատմելով, թե անձամբ ինչպես ես զգացել, որ Եհովան «ուղիղ» է։ Որքա՜ն դա կոգևորի ու կզորացնի մեր քույր–​եղբայրներին։

18. ա) Օրինակով ցույց տվեք, թե ինչ երկարատև ազդեցություն է ունենում ուրիշներին ‘պատմելը, թե ուղիղ է Տերը’։ բ) Անձամբ դու ինչպե՞ս ես զգացել, որ Եհովան «ուղիղ» է։

¹⁸ Իսկ ի՞նչ կարելի է ասել այն դեպքերի մասին, երբ զգացել ես Եհովայի սիրառատ հոգատարությունն ու առաջնորդությունը քո անձնական կյանքում (Սաղմոս 37։25; Մատթէոս 6։33; Ա Պետրոս 5։7)։ Մարթա անունով մի տարեց քույր միշտ մյուսներին քաջալերում էր՝ ասելով. «Ինչ էլ որ պատահի, մի հեռացիր Եհովայից։ Նա քեզ կպահի»։ Այս խորհուրդը մեծ ազդեցություն էր թողել Թոլմինայի վրա, որը մկրտվել է 1960–ականների սկզբին և մեկն է այն անձանցից, որոնց հետ Մարթան Աստվածաշնչի ուսումնասիրություն է անցկացրել։ Նա հիշում է. «Երբ ամուսինս մահացավ, ես ծայրաստիճան վհատվեցի, բայց այդ խոսքերը լցրեցին ինձ վճռականությամբ բաց չթողնելու և ոչ մի հանդիպում։ Եվ իսկապես, Եհովան ինձ զորացրեց, որ շարունակեմ առաջ ընթանալ»։ Թոլմինան արդեն երկար տարիներ է, ինչ նույն խորհուրդն է տալիս իր՝ Աստվածաշնչի բազմաթիվ ուսումնասիրողներին։ Այո՛, քաջալերելով հավատակիցներիդ ու նրանց պատմելով Եհովայի ուղիղ գործերի մասին՝ դու կարող ես շատ բան անել՝ կերտելու նրանց հավատը։

Եհովան թանկ է գնահատում իր հավատարիմ տարեց ծառաներին

19, 20. ա) Ինչպե՞ս է Եհովան դիտում իր տարեց ծառաների գործերը։ բ) Ի՞նչ է քննարկվելու հաջորդ հոդվածում։

¹⁹ Այսօրվա աշխարհը, որին բնորոշ չէ երախտագիտությունը, քիչ է ուշադրություն դարձնում տարեցներին (Բ Տիմոթէոս 3։1, 2)։ Եթե նրանց հիշում են, ապա հիշում են հաճախ նրանց անցյալ հաջողությունների համար, թե այն ժամանակ ովքեր էին նրանք և ոչ թե ովքեր են ներկայումս։ Ի հակադրություն սրա՝ Աստվածաշունչն ասում է. «Աստուած անիրաւ չէ որ մոռանայ ձեր գործքը եւ այն սէրի աշխատանքը, որ նորա անունի համար ցոյց տուիք, որ ծառայում էիք սուրբերին եւ ծառայում էք» (Եբրայեցիս 6։10)։ Անտարակույս, Եհովա Աստված հիշում է քո այն գործերը, որ հավատարմորեն անում էիր հանուն իրեն։ Բայց նա արժևորում է նաև այն, թե ինչ ես դու շարունակում անել սուրբ ծառայության մեջ այժմ։ Այո՛, նա իր տարեց ծառաներին համարում է պտղաբեր, հոգևորապես առողջ ու կայտառ քրիստոնյաներ, որոնք իր զորության կենդանի վկայությունն են հանդիսանում (Փիլիպպեցիս 4։13, ԱԱ)։

²⁰ Մեր քրիստոնեական եղբայրության տարեց անդամներին դիտո՞ւմ ես այնպես, ինչպես Եհովան։ Եթե այո, ապա սիրտդ կմղի քեզ սեր ցույց տալ նրանց հանդեպ (Ա Յովհաննէս 3։18)։ Հաջորդ հոդվածում կքննարկվեն որոշ գործնական միջոցներ, թե ինչպես սիրալիր ձևով բավարարել նրանց կարիքները։

[ծանոթագրություններ]

Ո՞րն է քո պատասխանը

• Ինչպե՞ս են տարեցները ‘պտուղ բերում’։

• Ինչո՞ւ է հոգևորապես կենսունակ լինելը տարեցներին թանկագին դարձնում։

• Ինչպե՞ս կարող են տարեցները ‘պատմել, թե ուղիղ է Տերը’։

• Ինչո՞ւ է Եհովան թանկ գնահատում իր այն ծառաներին, որոնք վաղուց են իրեն ծառայում։

[շրջանակ 13–րդ էջի վրա]

Ինչպե՞ս են նրանք առողջ մնացել հավատի մեջ

Ի՞նչն է օգնել երկար տարիներ ծառայած քրիստոնյաներին հավատի մեջ առողջ ու հոգևորապես կայտառ մնալ։ Ահա թե ինչ են ասում նրանցից ոմանք.

«Շատ կարևոր է կարդալ այն սուրբգրային համարները, որոնք վերաբերում են Եհովայի հետ ունեցած մեր հարաբերություններին։ Գրեթե ամեն երեկո մտովի հիշում եմ 23–րդ ու 91–րդ սաղմոսները» (Օլիվ, մկրտվել է 1930 թ.–ին)։

«Ես նպատակ եմ դրել ներկա լինել մկրտության ամեն մի ելույթի և ուշադիր լսել, այնպես, կարծես թե դա իմ մկրտության ելույթն է։ Նվիրումը մտքում թարմ պահելը կարևոր է Աստծուն հավատարիմ մնալու համար» (Հարրի, մկրտվել է 1946 թ.–ին)։

«Անչափ կարևոր է ամեն օր աղոթել՝ միշտ խնդրել Եհովային օգնության, պաշտպանության ու օրհնության համար՝ հաշվի առնելով նրան մեր բոլոր ճանապարհներում» (Առակաց 3։5, 6 ՆԱ) (Անտոնիու, մկրտվել է 1951 թ.–ին)։

«Եհովային հավատարմորեն երկար տարիներ ծառայած քույր–​եղբայրների պատմածը լսելով՝ ես է՛լ ավելի վճռական եմ դառնում մնալու նրան նվիրված ու հավատարիմ» (Ջոան, մկրտվել է 1954 թ.–ին)։

«Կարևոր է շատ չմտածել սեփական անձի մասին։ Այն, ինչ որ ունենք, Աստծո մեծ բարության շնորհիվ է։ Այս ձևով մտածելն օգնում է շարունակ ճիշտ ուղղությամբ նայել, թե որտեղից կարող ենք հոգևոր սնուցում ակնկալել, որն անհրաժեշտ է մինչև վերջ տոկալու համար (Առլին, մկրտվել է 1954 թ.–ին)։

[նկար 11–րդ էջի վրա]

Տարեցները Թագավորության արժեքավոր պտուղ են բերում

[նկար 14–րդ էջի վրա]

Հոգևորապես կենսունակ լինելը թանկագին է դարձնում տարեց եղբայրներին ու քույրերին