«Ի՞նչ է սպասում ձեզ նոր հազարամյակում»

 ¹ Այս հարցը մտահոգության պատճառ է աշխարհի բոլոր մասերում ապրող մարդկանց համար։ Չնայած դարերի ընթացքում կատարած մեծ առաջխաղացումներին՝ մարդիկ հիասթափություն են ապրում, քանի որ իրենց արդեն հազարամյակներ շարունակ անհանգստացնող հիմնական խնդիրները մնում են անփոփոխ (Յոբ 14։1; Սաղ. 90։10)։ Որտե՞ղ մխիթարություն գտնել։

 ² Հոկտեմբեր և նոյեմբեր ամիսներին մենք առանձնահատուկ հնարավորություն ունենք՝ վերոհիշյալ հարցի պատասխանը մարդկանց առաջարկելու։ Ինչպե՞ս։ «Թագավորության լուրը» № 36 թերթիկի օգնությամբ։ Թերթիկի վերնագիրն է՝ «Ի՞նչ է սպասում ձեզ նոր հազարամյակում»։ Հոկտեմբերի առաջին կեսին կառաջարկենք «Դիտարան» և «Արթնացե՛ք» (ռուս.) պարբերագրերը, ապա՝ հոկտեմբերի 16–ից՝ երկուշաբթի օրից, մինչև նոյեմբերի 17–ը՝ ուրբաթ, աշխուժորեն կտարածենք թերթիկը։ Աշխատանքային օրերին կտարածենք միայն թերթիկը, իսկ հանգստյան օրերին այն կառաջարկենք ընթացիկ պարբերագրերի հետ միասին։

 ³ Լիարժեք մասնակցություն կունենա՞ս։ Երեցները, ծառայողական օգնականներն ու ռահվիրաները քարոզարշավի ընթացքում նախաձեռնությունն իրենց ձեռքը կվերցնեն, քանի որ այդ գործում գտնվում են առաջավոր գծում։ Քարոզիչներից շատերն այնպես են դասավորել իրենց գործերը, որպեսզի այդ ամիսներին կամ թերևս մեկ ամիս ենթառահվիրա ծառայեն։ Մյուսները պլանավորել են սովորականից ավել ժամանակ տրամադրել քարոզչությանը։

 ⁴ Լավ կլինի, որ ժողովի Գրքի ուսումնասիրության ղեկավարները հորդորեն իրենց խմբի յուրաքանչյուր անդամի ակտիվ մասնակցություն ունենալ «Թագավորության լուրը» № 36 թերթիկը տարածելու մեջ։ Հնարավոր է, որ քարոզիչներից ոմանք ծառայության մեջ ոչ ակտիվ դարձած լինեն։ Երեցները պետք է այցելեն այդ անհատներին՝ տեսնելու, թե ինչպես կարելի է օգնել նրանց։ Գուցե քայլեր ձեռնարկվեն, որպեսզի այդ ամիսներին նրանցից յուրաքանչյուրի հետ որևէ փորձառու քարոզիչ համագործակցի։ Թերթիկն առաջարկելու պարզ մատուցումը միայն կարող է բավական լինել ոչ ակտիվ քարոզչին ոգևորելու համար։

 ⁵ Այս քարոզարշավը ծառայությանը մասնակցելու լավ հնարավորություն է ստեղծում նաև Աստվածաշունչն ուսումնասիրողների համար. նրանց, ովքեր ուսումնասիրել են «Գիտություն» գրքի մեծ մասը և համապատասխանում են չմկրտված քարոզիչ լինելու պահանջներին։ Նույնիսկ երեխաները կարող են մասնակցել այս ոգևորող գործին։

 ⁶ Ընդամենը մի պարզ մատուցում է հարկավոր։ Օրինակ՝ կարող ես ասել.

◼ «Ես շատերի հետ միասին իմ ժամանակը տրամադրել եմ այս անչափ կարևոր լուրը [քաղաքի կամ երկրի անունը] ապրող յուրաքանչյուր ընտանիքի հաղորդելու համար։ Վերցրե՛ք, խնդրեմ, կարդացե՛ք»։ Թերթիկը տարածելիս գուցե ավելի լավ լինի ծառայության մեր պայուսակները չվերցնել։

 ⁷ Կազմակերպված քարոզչական ծառայության հանդիպումները։ Երեցները պետք է այնպես կազմակերպեն քարոզչական ծառայությունը, որ այն լինի հարմար և գործնական։ Ծառայողական վերակացուն պետք է հատկապես ուշադիր լինի, որպեսզի ժողովում բավարար քանակությամբ տարածքներ լինեն՝ տնետան և գործարար, որպեսզի բոլորը կարողանան մասնակցել։ Հնարավորության դեպքում քարոզչական ծառայության հանդիպումները պետք է կազմակերպվեն աշխատանքային և հանգստյան բոլոր օրերին, ինչպես նաև երեկոյան։ Կարելի է նաև դպրոցականների, հերթափոխով աշխատողների և ուրիշների համար նույնպես միջոցներ ձեռք առնել և կեսօրից հետո ևս հանդիպել։

 ⁸ Ի՞նչ անել, եթե տանը մարդ չկա։ Մեր նպատակը հնարավորին չափ շատ տանտերերի հետ զրուցելն է։ Տանը մարդ չլինելու դեպքում պետք է նշել բնակարանի համարը և այցելել տարբեր ժամերի։ Եթե մինչև քարոզարշավի վերջին շաբաթը չհաջողվի կապ հաստատել տանտիրոջ հետ, կարող եք թերթիկի մեկ օրինակ գցել փոստարկղը, այնպես, որ մյուսների համար այն աննկատ լինի։ Եթե ժողովին հատկացված տարածքում կան գյուղակներ կամ այնպիսի տարածքներ, որոնց շատ լինելու պատճառով հնարավոր չէ քարոզարշավի ընթացքում վերայցելել, ապա տանը մարդ չլինելու դեպքում առաջին իսկ այցելությանը կարող եք թերթիկի օրինակ թողնել։

 ⁹ Եկեք մինչև վերջ առաջ տանենք այս գործը։ Պետք է ձգտել տարածքներն այցելել մինչև քարոզարշավի ավարտը՝ նոյեմբերի 17–ը։ Եթե ժողովին հատկացված տարածքը խիստ մեծ է, այն վայրերում, որտեղ գործնական և ապահով կլինի, քարոզիչներից ոմանք կարող են միայնակ տարածել թերթիկը։ Նման մոտեցումը կթեթևացնի հնարավորին չափ շատ արժանի անհատների հետ զրուցելու գործը։ Հարկավոր է մանրամասն նշումներ անել հետաքրքրություն ցույց տված մարդկանց մասին։

 ¹⁰ Երեցները պետք է տեղյակ լինեն, թե լրացուցիչ որքան պարբերագրի կարիք կլինի, և նախօրոք պատվիրեն։ «Թագավորության լուրը» № 36 թերթիկը պատվիրելու հարկ չկա, քանի որ ժողովները այն կստանան բավարար քանակությամբ։ Հատուկ և ընդհանուր ռահվիրաներից, ինչպես նաև ենթառահվիրաներից յուրաքանչյուրը կստանա թերթիկի 200 օրինակ, իսկ քարոզիչները՝ 50–ական օրինակ։ Այսպիսով՝ դու պատրա՞ստ ես, ցանկանո՞ւմ ես մինչև վերջ առաջ տանել այս գործը։ Ի՜նչ մեծ պատիվ է մեզ համար մարդկանց հաղորդել այն, թե ինչ է Աստված խոստանում անել մոտ ապագայում։