Կարո՞ղ ես տրամադրել քո տունը
1 Առաջին դարի քրիստոնյաներից շատերը տրամադրում էին իրենց տները, որպեսզի այնտեղ ժողովի հանդիպումներ անցակցվեին (Ա Կորնթ. 16։19; Կող. 4։15; Փիլիմ. 1, 2)։ Այսօր շատ ժողովներ չունեն բավարար քանակությամբ տեղեր ժողովի Գրքի ուսումնասիրության և քարոզչական ծառայության հանդիպումների համար։ Այդ պատճառով որոշ խմբերում ներկաների թիվը կարող է հասնել 30–ի կամ նույնիսկ անցնել, մինչդեռ նախընտրելի է, որ ներկաների թիվը լինի մոտ 15։
2 Մեծ պատիվ։ Երբևիցե մտածե՞լ ես քո տունը տրամադրել Գրքի ուսումնասիրության հանդիպումներն անցկացնելուն։ Բավականաչափ մեծ սենյակը, որը մաքուր է, լավ լուսավորված, և որտեղ օդափոխության հնարավորություն կա, հրաշալի է այս նպատակով գործածվելու համար։ Քանի որ Գրքի ուսումնասիրությունը ժողովի հանդիպումներից է, և մեկն է այն միջոցառումներից, որ Եհովան ձեռնարկել է, որպեսզի ուսուցանի իր ժողովրդին, մեծ առանձնաշնորհում է, որ ձեր տանը այդպիսի հանդիպում անցկացվի։ Շատերն ասում են, որ իրենց տները այդ նպատակով տրամադրելով՝ հոգևոր օրհնություններ են ստանում։
3 Եթե կարծում ես, որ ձեր տունը հարմար է նման հանդիպումների համար, խնդրում ենք, որ այդ մասին տեղյակ պահես երեցներին։ Հնարավոր է, որ նրանք լրացուցիչ տեղեր են փնտրում։ Իսկ եթե չես կարող տունդ տրամադրել Գրքի ուսումնասիրության հանդիպումն անցկացնելու նպատակով, գուցե քարոզչական ծառայության հանդիպումնե՞րը հնարավոր լինի այնտեղ անցկացնել։ Եթե անգամ հիմա այդպիսի կարիք չկա, երեցները երախտապարտ կլինեն՝ իմանալով, որ ձեր տանը կարելի է հանդիպում անցկացնել։ Գուցե ապագայում նման առանձնաշնորհում ունենաս։
4 Լավ վարք ունենանք։ Եթե հանդիպումն անցկացվում է ինչ–որ մեկի տանը, ակնկալվում է, որ բոլոր ներկաները հարգանք ցուցաբերեն տանտիրոջ սեփականության հանդեպ։ Ծնողները պետք է ուշադիր լինեն, որ իրենց երեխաները մնան ուսումնասիրության համար տրամադրված սենյակում և չմտնեն տան մյուս անկյունները։ Նաև հարկավոր է հարգանք ցույց տալ հարևանների նկատմամբ, պետք է ուշադիր լինել և անհարկի անհանգստություն չպատճառել նրանց (Բ Կորնթ. 6։3, 4; Ա Պետ. 2։12)։
5 Եբրայեցիս 13։16–ը հորդորում է, որ չմոռանանք «բարերարութիւնը եւ հաղորդակցիլը.... որ այնպիսի պատարագներին հաւանում է Աստուած»։ Մեր տունը ժողովի հանդիպումներին տրամադրելով՝ մենք ուրիշների համար բարիք ենք գործում և այդպիսով ‘պատիվ ենք բերում Տիրոջը մեր ստացվածքով’ (Առակ. 3։9)։