Մարդկանց ուշադրությունը հրավիրենք ‘աշխարհի լույսի’ վրա

¹ Եհովան Եսայիա մարգարեի միջոցով նախապես հայտնել էր. «Խաւարումը գնացող ժողովուրդը մեծ լոյս տեսաւ. մահուան ստուերի երկրումը բնակողների վերայ լոյս ծագեց» (Ես. 9։2)։ Այդ «մեծ լոյս[ը]» երևաց Աստծու հարազատ Որդու՝ Հիսուս Քրիստոսի գործերում։ Երկրի վրա եղած ժամանակ Հիսուսի կատարած գործը և նրա զոհաբերության օգուտները թարմություն պարգևեցին նրանց, ովքեր հոգևոր խավարի մեջ էին գտնվում։ Այս դժվարին ժամանակներում մարդիկ հենց այդ լույսի կարիքն ունեն։ Տիրոջ ընթրիքը յուրահատուկ հնարավորություն է բաց անում մեր առջև մարդկանց ուշադրությունը «աշխարհքի լոյս[ի]» վրա հրավիրելու (Յովհ. 8։12)։ Անցած տարի միլիոնավորներ դրսևորեցին իրենց հավատը՝ մեզ հետ միասին հնազանդվելով Հիսուսի հետևյալ պատվերին. «Այս արէք իմ յիշատակի համար» (Ղուկ. 22։19)։ Մինչ մոտենում է այս տարվա Հիշատակի երեկոն, ինչպե՞ս կարող ենք մարդկանց ուշադրությունը հրավիրել այն մեծ լույսի վրա, որ փայլեցնում է Եհովան (Փիլիպ. 2։15)։

² Երախտագիտության անկեղծ զգացմունք զարգացնենք։ Հիշատակի երեկոյին նախորդող և հաջորդող շրջանը շատ հարմար ժամանակ է խորհրդածելու այն մեծ սիրո շուրջ, որ ցուցաբերել են Եհովան և Հիսուսը՝ հօգուտ մարդկության քավիչ զոհաբերությունը տալով (Յովհ. 3։16; Բ Կորնթ. 5։14, 15)։ Նման խորհրդածությունը անշուշտ կխորացնի մեր երախտագիտությունը այս սուրբ իրադարձության համար։ Անշուշտ, Աստծու բոլոր ծառաները կցանկանան ժամանակ հատկացնել կարդալու Աստվածաշնչի այն հատվածները, որոնք ծրագրված են Հիշատակի երեկոյի համար, ինչպես նաև խորհրդածել այդ հատվածների շուրջ։ Դրանք տրված են «Գրությունները քննենք ամեն օր» գրքույկում։ Խորհելով Եհովայի վսեմ հատկությունների շուրջ, որոնք հրաշալիորեն դրսևորվում են փրկանքը տալու մեջ՝ մենք հպարտանում ենք, որ այդպիսի Աստված ունենք։ Երբ խորհրդածում ենք այն բանի շուրջ, թե ինչ նշանակություն ունի անձամբ մեզ համար փրկանքը, աճում է Աստծու և նրա Որդու հանդեպ մեր սերը, և մենք մղվում ենք մեր ձեռքից եկած ամեն բան անելու Աստծու կամքը կատարելու համար (Գաղ. 2։20)։

³ Եթե խորացնենք Եհովայի հանդեպ մեր գնահատանքը այն բանի համար, որ նա միջոցներ է ձեռնարկել հանուն մեր փրկության, ապա Երեկոյի հանդեպ մեր խանդավառությունը դրականորեն կանդրադառնա այն անհատների վրա, որոնց հետ ուսումնասիրում ենք Աստվածաշունչը, նրանց վրա, ում վերայցելում ենք, նաև մեր բարեկամների, հարևանների, համադասարանցիների, աշխատակիցների և մյուս անհատների վրա, որոնց հրավիրում ենք այս հատուկ իրադարձությանը (Ղուկ. 6։45)։ Ուստի ջանքեր գործադրիր, որ հրավիրես այդ անհատներին, ինչը կարող ես անել՝ նրանց Հիշատակի երեկոյի հրավիրատոմսեր տալով։ Շատերը նկատել են, որ ոչ ոքի չմոռանալու համար իրենց օգնում է մի ցուցակ ունենալը, որում նրանք նշում են այն անհատների անունները, որոնց ամեն տարի հրավիրում են Երեկոյին, և այդ ցուցակում ավելացնում են նորերի անունները։ Կազմակերպված լինելով, ինչպես նաև ամեն ջանք գործադրելով հետաքրքրություն ցույց տվող անհատներին հրավիրելու համար՝ մենք ցույց կտանք մեր գնահատանքը Եհովա Աստծու հանդեպ «նորա անպատմելի պարգեւի համար» (Բ Կորնթ. 9։15)։

⁴ Ավելի շատ մասնակցենք ծառայությանը։ Կարո՞ղ ես մարտ և ապրիլ ամիսներին ավելի շատ մասնակցել ծառայությանը։ Եթե մենք ջանք թափենք, որպեսզի մարդկանց պատմենք «Քրիստոսի փառաւոր աւետարանի»՝ բարի լուրի մասին, ապա Աստված անկասկած կօրհնի մեզ։ Եհովան, լինելով հոգևոր լույսի մեծագույն Աղբյուրը, պատվիրում է. «[Թող] խաւարիցը լոյս ծագէ» (Բ Կորնթ. 4։4–6)։ Անհրաժեշտության դեպքում երեցները միջոցներ կձեռնարկեն, որպեսզի լրացուցիչ ժամերի և ավելի շատ վայրերում քարոզչական ծառայության հանդիպումներ անցկացվեն, ինչը մեծ օգնություն կլինի նրանց համար, ովքեր կցանկանան ավելի երկար ծառայել։ Դա իր մեջ կարող է ընդգրկել առավոտյան ժամերին փողոցում քարոզելը, ճաշից հետո կամ երեկոյան ժամերին գործարար տարածքներում կամ հեռախոսով վկայություն տալը։ Որպեսզի կարողանաս ավելի շատ ժամանակ տրամադրել ծառայությանը, հասանելի նպատակ դիր քո առջև, որ ծառայես որոշակի քանակության ժամ, և ձգտիր հասնել այդ նպատակին։ Շատերը, ցանկանալով լավագույնն անել Եհովայի համար, ծառայում են որպես ենթառահվիրա (Կող. 3։23, 24)։

⁵ Կարո՞ղ ես ծառայել որպես ենթառահվիրա։ Արդեն ավելի քան յոթ տարի է, ինչ նվազեցվել է ենթառահվիրաներից պահանջվող ժամերի քանակը։ Այս փոփոխությունը հնարավորության դուռ է բացել շատերի առջև վայելելու այն օրհնությունները, որ բերում է ենթառահվիրայական ծառայությունը։ Փորձե՞լ ես ծառայել որպես ենթառահվիրա։ Ոմանք որպես կանոն ամեն տարի մասնակցում են ծառայության այդ ձևին։ Շատ ժողովներում բազմաթիվ քարոզիչներ միաժամանակ են սկսում ենթառահվիրայությունը, և այդ ժամանակահատվածը շատ օգտավետ է լինում ժողովի համար ողջ տարվա ընթացքում։ Կարո՞ղ ես այնպես ծրագրել գործերդ, որ Հիշատակի երեկոյին նախորդող և հաջորդող շրջանում ինչ–​որ մի ամիս ծառայես որպես ենթառահվիրա։ Ոմանց համար գուցե ապրիլ ամիսը ծառայությունն ընդարձակելու լավ ժամանակ լինի, քանի որ այն ունի հինգ շաբաթ–​կիրակի օր։

⁶ Մարտ կամ ապրիլ ամսին ձեր ժողով այցելելո՞ւ է շրջանային վերակացուն։ Եթե այո, ապա քո առջև հատուկ հնարավորություն է բացված։ Ինչպես հայտարարվել էր նախապես, բոլոր նրանք, ովքեր 2006 թ. ծառայողական տարվա ընթացքում կծառայեն որպես ենթառահվիրա այն ամսին, երբ ժողով է այցելում շրջանային վերակացուն, հնարավորություն կունենան ներկա լինելու ռահվիրաների հետ հանդիպման առաջին մասին, որն անցկացվում է վերակացուի այցելության շաբաթվա ընթացքում։ Անշուշտ այս հանդիպման ժամանակ ասված հոգևորապես թարմացուցիչ մտքերը կմղեն շատերին ընդհանուր ռահվիրայություն սկսելու։ Բացի այդ, մարտ ամսին հատուկ ջանքեր ենք գործադրելու, որպեսզի օգնենք մարդկանց հոգևոր լույս ստանալ՝ գործածելով «Ի՞նչ է սովորեցնում Աստվածաշունչը իրականում» նոր գիրքը։ Չարժե՞ արդյոք նպատակ դնել այս նոր ձեռնարկով Աստվածաշնչի ուսումնասիրություններ սկսել։

⁷ Երբ քննես այն հարցը, թե ինչպես կարող ես լրացնել ենթառահվիրայության համար պահանջվող ժամերի քանակը, որը կազմում է 50 ժամ, մտածիր, թե ծառայության ինչպիսի գրաֆիկը թույլ կտա քեզ, շաբաթական մոտ 12 ժամ ծառայելով, ճշմարտության լույսը փայլեցնել մարդկանց առջև։ Զրուցիր նրանց հետ, ում հաջողվել է ծառայել որպես ենթառահվիրա, նաև զրուցիր ուրիշների հետ։ Գուցե դա մղի վերջիններիս միանալ քեզ։ Լավ պլանավորման շնորհիվ թե երիտասարդ և թե տարեց մկրտված քարոզիչները համոզվել են, որ չափազանց դժվար չէ այդ նպատակին հասնելը։ Աղոթիր այդ մասին և եթե ունես այդպիսի հնարավորություն, պլանավորիր մասնակցել ծառայության այդ ձևին և ուրախություն ստացիր դրանից (Մաղ. 3։10)։

⁸ Շատ ընտանիքներ համոզվել են, որ երբ աջակցություն են ցույց տալիս ընտանիքի բոլոր անդամները, նրանցից գոնե մեկը կարողանում է ծառայել որպես ենթառահվիրա։ Մի ընտանիք որոշեց, որ ընտանիքի անդամներից հինգը, որոնք մկրտված են, ծառայեն որպես ենթառահվիրա։ Երեխաներից երկուսը, որոնք դեռ մկրտված չէին, հատուկ ջանքեր գործադրեցին, որ իրենք նույնպես ավելի շատ բան անեն։ Ի՞նչ օգուտներ բերեցին ընտանիքին գործադրված ջանքերը։ Նրանք գրում են. «Դա շատ հաճելի ամիս էր, և մենք զգացինք, որ մեր ընտանեկան կապերը ամրացան։ Մենք շնորհակալ ենք Եհովային այդ հրաշալի օրհնության համար»։

⁹ Մարտ և ապրիլ ամիսներին մեր ջանքերը կնպաստե՞ն արդյոք այն բանին, որ մենք ավելի մոտենանք մեր երկնային Հորը։ Շատ բան կախված է մեր անձնական ջանքերից, որ կգործադրենք Աստծու և նրա Որդու հանդեպ մեր սերը խորացնելու, ինչպես նաև մեր ծառայությունն ընդարձակելու համար։ Թող որ մենք նույն վճռականությունն ունենանք, ինչ որ սաղմոսերգուն ուներ, որ երգեց. «Ես շատ գոհանամ Տէրիցն իմ բերանովը. եւ շատերի մէջ օրհնեմ նորան» (Սաղ. 109։30)։ Եհովան կօրհնի Հիշատակի երեկոյին նախորդող և հաջորդող շրջանում մեր եռանդուն ջանքերը։ Ուստի եկեք հոգևոր մեծ լույսը փայլեցնենք մարդկանց առջև, որպեսզի ավելի շատ մարդիկ դուրս գան խավարից և «կեանքի լոյսը կ’ընդուն[են]» (Յովհ. 8։12)։

[Հարցեր ուսումնասիրության համար]

1. Ինչպիսի՞ հոգևոր լույսի մասին է նախապես ասվել Աստծու Խոսքում, և ո՞ր իրադարձության շնորհիվ է հատուկ ուշադրություն դարձվում այդ լույսին։

2. Ինչպե՞ս կարող ենք խորացնել մեր գնահատանքը քավիչ զոհաբերության համար, և ի՞նչ կլինի արդյունքը։

3. Ինչպե՞ս կարող ենք մեր գնահատանքը ցույց տալ Հիշատակի երեկոյի համար։

4. Ի՞նչը կօգնի մեզ ընդարձակել մեր ծառայությունը մարտ և ապրիլ ամիսներին։

5. Ի՞նչ օգուտներ է բերել շատերին ենթառահվիրայական ծառայության համար պահանջվող ժամերի քանակը նվազեցնելը։

6. Ի՞նչ հրաշալի միջոցներ են ձեռնարկվել։

7, 8. ա) Ի՞նչը կօգնի մեզ այնպես պլանավորել մեր գործերը, որ կարողանանք ծառայել որպես ենթառահվիրա։ բ) Ինչպիսի՞ աջակցություն կարող են ցույց տալ ընտանիքի անդամները, և ի՞նչ օգուտներ կբերի դա ողջ ընտանիքին։

9. Ի՞նչ կարող ենք անել, որ մեր լույսը փայլի այս տարի Հիշատակի երեկոյին նախորդող և հաջորդող շրջանում։