Լիարժեքորեն օգտվիր «Դիտարանի» ընդհանուր թողարկումից
1 «Անհամբերությամբ սպասում եմ, թե երբ եմ այն առաջարկելու»,— «Դիտարանի» 2008 թ. հունվարի 1–ի համարն ընթերցելուց հետո ասաց մի քույր։ Իսկ դու արդեն ծանոթացե՞լ ես «Դիտարանի» ընդհանուր թողարկման խորագրերին։ Մտածե՞լ ես, թե ինչպես կարող ես դրանք արդյունավետորեն օգտագործել քարոզչական ծառայության ժամանակ։ Քննարկենք այդ հոդվածաշարերը առանձին–առանձին։
2 «Ինչ ենք սովորում Հիսուսից»։ Այս խորագրի տակ լույս տեսնող հոդվածների օգնությամբ շատ հեշտ է Աստվածաշնչի ուսումնասիրություն սկսել։ Ինչո՞ւ չփորձես այդպես էլ անել։ Դու կարող ես զրուցակցիդ համար ընթերցել հոդվածի վերնագիրը և ապա ներկայացնել, թե տվյալ հարցի վերաբերյալ ինչ է ասել Հիսուսը։ Այս մասին սովորաբար գրվում է առաջին պարբերության մեջ։ Եթե զրուցակիցդ հետաքրքրություն ցույց տա, շարունակիր քննարկումը ենթավերնագրերի օգնությամբ։ Հաճախ դրանք հետաքրքրաշարժ հարցեր են։ Քաջալերիր զրուցակցիդ տալու իր պատասխանը։ Համառոտակի մեկնաբանիր այն մտքերը, որոնք առնչվում են նկարների հետ։ Ապա անցիր հաջորդ պարբերությանը։ Միգուցե հնարավոր լինի առաջին այցելության ժամանակ քննարկել հոդվածի կեսը, իսկ կրկնակի այցելության ժամանակ՝ մնացած մասը։ Պատրաստ եղիր շարունակելու ուսումնասիրությունը «Աստվածաշունչը սովորեցնում է» գրքով։
3 «Ընտանեկան երջանկության բանալին»։ Երեք ամիսը մեկ տպագրվող այս հոդվածաշարի նպատակն է օգնել ընտանիքի բոլոր անդամներին իրենց խնդիրները լուծել սուրբգրային սկզբունքներով։ Այս հոդվածների շնորհիվ զրուցակիցդ կհամոզվի, որ Աստվածաշնչում անզուգական իմաստություն է պարփակված (2 Տիմոթ. 3։16, 17)։
4 Երիտասարդներին ուղղված հոդվածներ։ «Մեր պատանի ընթերցողների համար» շարքը հետաքրքիր ձևավորում ունի և արժեքավոր միջոց է աստվածաշնչյան առանձին դրվագների խոր ուսումնասիրության համար։ Այն կարող է օգնել երիտասարդներին հասկանալու Աստծու Խոսքի ուսումնասիրության արժեքը (Սաղ. 119։9, 105)։ Իսկ «Սովորեցրեք ձեր երեխաներին» հոդվածաշարը, որ լույս է տեսնում երկու ամիսը մեկ, ամենայն հավանականությամբ կհետաքրքրի ծնողներին։ Այս հոդվածները կարող են օգնել նաև երեխաներին կարևոր դասեր սովորելու հավատարիմ մարդկանց օրինակներից։ Իսկ քո երեխաների հետ ընթերցո՞ւմ ես դրանք։
5 Մյուս խորագրերը։ Ամեն ամիս տպագրվում է «Մեր ընթերցողները հարցնում են» հոդվածների շարքը։ Այնտեղ քննարկվում են այնպիսի հարցեր, որոնք հաճախ են տալիս Աստվածաշնչին անտեղյակ մարդիկ։ Դու կարող ես ուշադրություն հրավիրել այս հոդվածների վրա տնետուն ծառայության ժամանակ։ Շատ հետաքրքիր է նաև «Նամակ...–ից» շարքը, որում միսիոներները և մյուս քարոզիչները պատմում են իրենց դժվարությունների մասին։ Ընթերցելով այս հոդվածները՝ հետաքրքրվող անհատները կհամոզվեն, որ բարի լուրը քարոզվում է ամբողջ աշխարհում, ինչով և կատարվում է Հիսուսի ներկայության նշանը (Մատթ. 24։3, 14)։
6 «Մոտեցեք Աստծուն» ամենամսյա հոդվածաշարը տպվում է Աստվածապետական ծառայության դպրոցի՝ Աստվածաշնչի ընթերցանության հիման վրա։ Այն կարող է մղել անկեղծ անհատներին ավելի շատ գիտելիքներ ձեռք բերելու Եհովայի մասին։ Տարվա մեջ չորս անգամ տպագրվում է «Ընդօրինակեք նրանց հավատը» հոդվածների շարքը։ Դրանց նպատակն է օգնել մարդկանց կենդանի պատկերացնելու սուրբգրային դեպքերը և Աստվածաշնչում նկարագրված անհատներին, հասկանալու նրանց որոշումները, դժվարությունները, ցուցաբերած հավատը։
7 Ամեն ամիս մենք «Դիտարանի» մի այնպիսի օրինակ ենք ստանում, որն ամբողջությամբ նախատեսված է ծառայության համար։ Սա շատ ուրախալի է։ Ուստի եկեք լավ ծանոթանանք պարբերագրի բովանդակությանը և լիարժեքորեն օգտագործենք ծառայության մեջ։