Դիտարանի կրթական կեդրոնին բացումը. Եհովայի ձօնուած տօն մը

ՀԻՆՈՒՑ ի վեր, ուրախ տօնակատարութիւններ ճշմարիտ պաշտամունքին մէկ մասը եղած են։ Վաղեմի Իսրայէլի մէջ կատարուած տօնակատարութիւններէն ոմանք օրեր կը տեւէին եւ Եհովայի երկրպագուներէն հազարաւորներ ներկայ կը գտնուէին անոնց։ Սողոմոնի տաճարին բացումը եօթը օր տեւեց, որու յաջորդեց մէկ շաբաթ տեւող Տաղաւարահարաց Տօնը։ Ասիկա Իսրայելացիներուն պատեհութիւն տուաւ որ իրենց հետ Եհովայի ունեցած հոյակապ գործառնութեանց մասին մտածեն։ Անոնք տուն վերադարձան ‘զուարթ սրտով՝ այն բոլոր բարիքներուն համար, որոնք Տէրը ըրաւ’։—Գ. Թագաւորաց 8։66

Ինչ որ տեղի ունեցաւ Դիտարանի Կրթական Կեդրոնին՝ Փէթըրսընի մէջ, Նիւ Եորք (Ա.Մ.Ն.), Մայիս 17-22, 1999–ին, այցելուներուն յիշեցուց անցեալի այդ խայտալի տօնակատարութիւնները։ Ասիկա մասնաւոր գործունէութեան շաբաթ մըն էր, որու առանցքը կը կազմէր 28 անջատ կառոյցներէ բաղկացած համալիրին բացումը, որ Աստուածաշունչի երկրածաւալ դաստիարակութիւնը յառաջ մղելու համար ծրագրուած էր։ Այդ յիշատակելի շաբթուան ընթացքին, կարգադրութիւններ եղան որպէսզի Պրուքլինի, Ուոլգիլի եւ Փէթըրսընի մէջ գտնուող կեդրոնատեղիի անձնակազմին 5,400 անդամները՝ մանրակրկիտ շրջապտոյտներ կատարեն Փէթըրսընի համալիրին մէջ։ Հիւրերուն մէջ կային 500–է աւելի նախկին անձնակազմի անդամներ, որոնք կրթական կեդրոնի շինարարութեան աշխատանքին մասնակցած էին, Դիտարանի Ընկերութեան 23 մասնաճիւղերէն ներկայացուցիչներ, եւ մօտակայ ժողովքներու անդամներ. ընդամէնը առնուազն 8,100 հոգի։

Շրջապտոյտի Ընթացքին Եղած Ներկայացումները կը Դաստիարակեն

Այցելուները կրթական կեդրոնին ծանօթացնելու համար, յատուկ ցուցադրումներ, պատկերիզով դաստիարակչական ներկայացումներ եւ առանձին կատարուելիք շրջապտոյտներ կարգադրուած էին։ Գլխաւոր նախասրահին մէջ, այցելուներուն ուշադրութիւնը անմիջապէս կը գրաւէր Յիսուսի երկրային ծառայութեան ընթացքին Երուսաղէմի մէջ գոյութիւն ունեցող տաճարին պզտիկ մէկ օրինակը։ Ուրիշ ներկայացումներ կ’ընդգծէին Դիտարանի Աստուածաշունչի Գաղաադու Դպրոցին սկզբնական պատմութիւնը, պատմական համաժողովները, ժողովքային հանդիպումները, ներկայիս ամէն շաբաթ վարուող տան սուրբ գրային միլիոնաւոր ուսումնասիրութեանց արդի զարգացումը եւ այսպիսի գործունէութեան առջեւ ճամբան բաց պահելու համար Իրաւական հարցերով զբաղող Գրասենեակին տարած աշխատանքը. այս բոլորը Յիսուսի պատուէրին հնազանդելու համար։—Մատթէոս 28։19, 20

1,700 հոգինոց յարակից հանդիսասրահին մէջ, բացման տօնակատարութեանց ընթացքին այցելուները 33 վայրկեաննոց պատկերիզի ներկայացում մը վայելեցին, որուն խորագիրն էր «Զօրութեամբ Չէ՝ Հոգիո՛վս Է»։ Այս պատկերիզը ցոյց տուաւ Դիտարանի Կրթական Կեդրոնին ինչպէս իրագործուիլը։ Հարցազրոյցներ դրսեւորեցին դէպքեր, բացայայտօրէն ցոյց տալով թէ Եհովա հարցերը ուղղած եւ այս 15 տարուան ծրագիրը յաջողութեամբ պսակելու ջանքերը օրհնած էր։ Հազարաւորներ մասնակցեցան արդի շինարարութեան աշխատանքին։ 1994–ին, եղաւ ժամանակ մը երբ 526 աշխատաւորներ կային այդ վայրին մէջ. 350 լիաժամ կամաւորներ, 113 ժամանակաւոր աշխատաւորներ եւ 63 ուրիշներ որոնք ամէն օր կու գային օգնութեան ձեռք մը երկարելու, ապա իրենց տունը կը վերադառնային։ Բազմաթիւ ուրիշներ այս աշխատանքին նեցուկ կանգնեցան իրենց նուիրատուութիւններով։ Բոլորն ալ կը գիտակցին թէ ասիկա երբեք կարելի պիտի չըլլար առանց Եհովայի հոգիին։—Զաքարեայ 4։6

Շրջապտոյտ ընողները կրցան տեսնել թէ կրթական կեդրոնին մէջ տարուած աշխատանքին գլխաւոր նպատակն է աստուածային ուսուցման յառաջացումը։ Դպրոցի շէնքին առաջին յարկի վրայ գտնուող Գաղաադու Դպրոցին մուտքին եղած ցուցադրումը, աչքառու կը դարձնէր դպրոցին ճոխ հոգեւոր ժառանգութիւնը եւ պատմութիւնը։ Իր սկզբնական վայրին՝ Հարաւային Լէնսինկի մէջ (Նիւ Եորք), 1943–ի իր առաջին դասարանէն ի վեր, Գաղաադու Դպրոցը աւելի քան 7,000 աշակերտներ միսիոնարական ծառայութեան համար մարզած է։ Դպրոցի կառոյցին երկրորդ յարկին վրայ եղած ցուցադրումները Մասնաճիւղի Յանձնախումբի Անդամներու եւ Ճամբորդող Տեսուչներու Դպրոցին մասին պատկերներ կը ներկայացնէին. այս երկու դպրոցներն ալ նոյն վայրին մէջ դասընթացքներ կ’ունենան։ 1995–ի Նոյեմբերին, անոր հաստատուելէն ի վեր, մասնաճիւղի դպրոցը բարձր կրթութիւն հայթայթած է 106 երկիրներէ եկած 360 Մասնաճիւղի Յանձնախումբի անդամներուն։

Մինչ այցելուները կը շրջագայէին, անոնք շուտով նշմարեցին թէ կարգ մը վայրերու մէջ կարողացան պատկերներու ներկայացումէն աւելին տեսնել։ Անոնք կրցան ուղղակի մտնել զանազան բաժիններ, այցելել գրասենեակներ ու տարբեր աշխատանոցներ, եւ կատարուած աշխատանքը մօտէն տեսնել։ Շրջապտոյտին աչքառու կէտերէն մէկն էր Ձայն/Պատկեր Սպասարկութեանց շէնքը։ Աստուածաշունչի կրթութիւնը յառաջ տանելու համար, ի՜նչ հոյակապ գործիքներ կը գործածուին հոն։ Տեղեկատու ներկայացումներու շարքի մը եւ համառօտ պատկերիզներու միջոցաւ, այցելուները կրցան հասկնալ թէ ձայնի արձանագրութիւնները եւ պատկերիզները ի՛նչպէս կը պատրաստուին։ Անոնք բեմասարքի եւ տարազներու պատրաստութեան համար տարուած ընդարձակ հետազօտութեան մասին բան մը սորվեցան։ Տեսան թէ բեմասարքը ի՛նչպէս կը կազմուի. շատ ջնջին ծախսով բայց՝ մանրամասնութեանց արտակարգ ուշադրութիւն ընծայելով։ Անոնք ականատես եղան թէ ի՛նչպէս երաժշտութիւնը կը գործածուի մարդոց զգացնել տալու համար թէ իրենք իրապէս իրենց տեսած տեսարանին մէջ կ’ապրին։ 1990–էն ի վեր, Ընկերութիւնը 41 լեզուներով տասը պատկերիզներ արտադրած է սուրբ գրային այլազան նիւթեր աչքառու դարձնելով, Ամերիկեան Համրերու Լեզուն գործածողներու համար պատրաստուած այլ պատկերիզներու կողքին։

Շրջապտոյտ կատարողներէն շատեր այցելեցին Պատկերի Տարրալուծարանը, Արուեստի Բաժինը, Տեղեկատուական Սպասարկութիւնները՝ ուր համակարգիչի մարզում եւ աջակցութիւն կը հայթայթուի. Ծառայութեան Բաժինը, որ 11,242 ժողովքներու եւ 572 ճամբորդող տեսուչներու գործունէութեան կը վերահսկէ. նաեւ Գրական Թղթակցութիւնը, ուր տարեկան շուրջ 14,000 հարցումներու կը պատասխանուին։ Անոնք տպաւորուեցան ղրկուած նամակներուն համար եղած հետազօտութենէն եւ լուրջ խնդիրներու հետ գլուխ ելլել փորձողներուն հանդէպ ցուցաբերուած անկեղծ հետաքրքրութենէն։

Այցելուներու երկար շարան մը այցելեց Թարգմանութեան Սպասարկութիւնները։ Անոնք անակնկալի եկան գիտնալով թէ անցեալ հինգ տարիներու ընթացքին, աւելի քան 102 ուրիշ լեզուներ աւելցած էին Ընկերութեան հայթայթած սուրբ գրային գրականութիւններուն վրայ։ Համայն աշխարհի մէջ, Եհովայի Վկաներուն շուրջ 80 տոկոսը Ընկերութեան գրականութիւնները կը կարդայ ոչ Անգլերէն լեզուներով։ Անոնց կարիքները գոհացնելու համար, աւելի քան 1,700 կամաւորներ թարգմանութեամբ կը զբաղին 100 երկիրներու մէջ։ Ցուցադրումները Դիտարան–ը ներկայացուցին՝ ամերիկեան, եւրոպական, ասիական եւ ափրիկեան լեզուներով։ Այցելուները Աստուածաշունչի Նոր Աշխարհի Թարգմանութիւնը կրցան տեսնել լոյս տեսած 31 լեզուներով։ Անոնք սորվեցան որ Դիտարանի հրատարակութիւնները այժմ մատչելի են 332 լեզուներով եւ թէ՝ Աստուած Ի՛նչ կը Պահանջէ Մեզմէ գրքոյկը հրատարակուած է 219 լեզուներով։

Իրաւական Գրասենեակի այցելուներուն ցոյց տրուեցաւ համայն աշխարհի մէջ իրաւական ուշադրութիւն պահանջող գործունէութեան զանազան մարզերը։ Պատկերիզով մը, անոնք տեսան դատական իրական նիստ մը, ուր Վկայ փաստաբան մը արեան ներարկում պարփակող հարցի մը շուրջ կ’առարկէր։ Նաեւ տեղեկացան թէ բարի լուրը հանրապէս քարոզելու պատեհութեան դուռը բաց պահելու համար ի՛նչ կ’իրագործուի։ (Փիլիպպեցիս 1։7) Անոնց ուշադրութեան յանձնուեցաւ այս տարուան Մարտին պետական նահանգային դատարանի մը տուած որոշումը, որ Նիւ Ճըրսիի, Օրատէլ աւանէն (Ա.Մ.Ն.) կը պահանջէր օրէնքներու փոփոխութիւն, որպէսզի այլեւս արտօնագիրներ եւ լանջանշաններ չպահանջուին այդ համայնքին մէջ տունէ տուն հանրային ծառայութեան մասնակցիլ փափաքող Եհովայի Վկաներէն։

Այցելուները ասկէ աւելին տեսան։ Անոնք Նախակաղապարներու Աշխատանոցին մէջ ներկայացուած շինարարական ցուցադրումները աչքէ անցուցին եւ այցելեցին Աղտոտ Ջուրի Մշակման Գործարանը, Ելեկտրակայանը, Ջուրը Կակուղցնելու Զտարանը, եւ շատ մը ուրիշ աշխատանոցներ։ Ասիկա անզուգական պատեհութիւն մըն էր։

Բացումի Յայտագիրը Աստուածային Կրթութեան Վրայ Շեշտ կը Դնէ

Բացումի բուն յայտագիրը սկսաւ Չորեքշաբթի, 19 Մայիս կէսօրէն ետք ժամը 4–ին։ 6,929 անհատներէ բաղկացող ուրախ բազմութեան մէջ կային կեդրոնատեղիի անձնակազմը, Ընկերութեան հիւրերը, եւ Գանատայի մասնաճիւղին մէջ հաւաքուած 372 անհատները, որոնք ելեկտրական հաղորդակցութեամբ յայտագիրը կը վայելէին։

Ներկաները, Դիտարանի Ընկերութեան նախագահին՝ Միլդըն Կ. Հէնշըլի բարի գալուստի սիրտ տոգորող խօսքերը լսելով արդարեւ ուրախացան։ Անկէ ետք Թէոտոր Ճարագզ, Կառավարիչ Մարմինի անդամ մը եւ այդ օրուան ատենապետը, ներկայացուց Ուիլիըմ Մալընֆանթը։ «Շինարարական Յայտագրին Աչքառու Կէտերը» ներկայացնելու ընթացքին, ան զեկոյց մը ունեցաւ երեք եղբայրներու հետ որոնք Դիտարանի Կրթական Կեդրոնին զարգացման, ծրագրման ու կառուցման մէջ կարեւոր դերեր ունեցած էին։ Զեկուցման ընթացքին, ըսուեցաւ թէ կառոյցը ընթացքի մէջ եղած տարիներուն, աւելի քան 8,700 ժամանակաւոր աշխատաւորներ իրենց հաշւոյն եկած էին այս ծրագրին մէջ իրենց մասնակցութիւնը բերելու համար։ Աստուածային ուսուցումով կարելի դարձած միութեան եւ առատաձեռնութեան ի՜նչ հոյակապ վկայութիւն մը։

Ասոր յաջորդեց յօդուածաշարք մը, որու խորագիրն էր՝ «Աստուածային Կրթութիւն՝ Երկրածաւալ Տարողութեամբ»։ Կառավարիչ Մարմինի չորս անդամներ ներկայացուցին զայն։ Ճոն Է. Պառ ընդգծեց թէ աստուածային կրթութիւնը Աստուծոյ Խօսքին՝ Աստուածաշունչին՝ վրայ հիմնուած է եւ կը քաջալերէ Քրիստոնեաները որ ‘բարի գործերով պտղաբեր ըլլան ու աճին՝ Աստուծոյ գիտութիւնովը’։ (Կողոսացիս 1։10) Տանիէլ Սիտլիք խօսեցաւ թէ աստուածային կրթութիւնը աստուածպետականօրէն կազմակերպուած է, սկսելով Յիսուս Քրիստոսէն՝ քրիստոնէական ժողովքին գլուխէն՝ հասնելով մինչեւ համաշխարհային եղբայրակցութեան իւրաքանչիւր անդամին։ (Ա. Կորնթացիս 12։12-27) Կէրրիթ Լօշի եւ Գէրի Պարպըրի կողմէ ներկայացուած յօդուածաշարքին վերջին երկու դասախօսութիւնները ցոյց տուին թէ՝ աստուածային կրթութիւնը ի՛նչպէս ամէնուրեք մարդոց հասնելու եւ անոնց սորվեցնելու համար քարոզիչները որակելի կը դարձնէ, որպէսզի անոնք ալ կարենան Աստուծոյ ճամբուն մէջ քալել։—Եսայեայ 2։1-4. Բ. Կորնթացիս 3։5

Ներկաները այս կրթական կեդրոնին մէջ գործող զանազան դպրոցներուն ծանօթացնելու համար, հոն պաշտօնավարող ուսուցիչներուն եւ խնդրոյ առարկայ ուրիշ անհատներու հետ տեսակցութիւններ եւ զրոյցներ տեղի ունեցան։ Ցոյց տրուեցաւ աստուածային կրթութեան երկրածաւալ յայտագիրը կատարելու մէջ իւրաքանչիւր դպրոցին խաղցած դերը։ Նշուեցաւ թէ Գաղաադու Դպրոցը կը կեդրոնանայ Աստուածաշունչի իւրաքանչիւր գրքին ուսումնասիրութեան, Եհովայի ժողովուրդին արդի պատմութեան, եւ միսիոնարական ծառայութեան պատրաստութեան վրայ։ Մասնաճիւղի դպրոցը սքանչելիօրէն ընդլայնուած ուսումնասիրութիւն մըն է, գործունէութեան այն բազմաթիւ մարզերուն մասին, որոնց Մասնաճիւղի Յանձնախումբի անդամները հոգ կը տանին։ Ճամբորդող Տեսուչներուն Դպրոցը ծրագրուած է ոչ միայն ճամբորդող եղբայրներուն կարիքները լեցնելու՝ այլ նաեւ զանոնք զինելու համար, որպէսզի յատկապէս ժողովքներուն նպաստող հոգեւոր օգնութիւնը հայթայթեն։

Այս հոյակապ յայտագիրը եզրափակելու համար, Կառավարիչ Մարմինի անդամ Լոյտ Պէրի բացումի դասախօսութիւնը ներկայացուց, «Մեր Մեծ Ստեղծիչին Հետ Կառուցանենք» խորագրին ներքեւ։ Ան նշեց թէ Ստեղծիչը՝ Եհովա, իր բոլոր ստեղծագործութենէն հաճոյք կ’առնէ եւ մեզ կը հրաւիրէ որ իր հետ ուրախանանք։ (Եսայեայ 65։18) Քանի որ ‘բոլոր բաները շինողը Աստուած է’, այս կառոյցին համար բոլոր վարկը Եհովա Աստուծոյ կ’երթայ։ (Եբրայեցիս 3։4) Այսպիսի գաղափարներ արտայայտելէ ետք, դասախօսը սրտաբուխ աղօթք մը մատուցանեց, Դիտարանի Կրթական Կեդրոնը Եհովայի՝ մեր Մեծ Ստեղծիչին, նուիրելով։a

Անկասկած, հոն ներկայ գտնուողները երկար ատեն պիտի յիշեն ամբողջ շաբաթ մը տեւող այս տօնակատարութիւնները։ Ինչո՞ւ դուք ալ Դիտարանի Կրթական Կեդրոնը այցելելու կարգադրութիւն մը չընէք։ Վստահ ենք որ մեր սիրալիր Արարիչին մասին աւելի սորվելու եւ անոր արդար չափանիշներուն համաձայն ապրելու ձեր թափած ջանքերուն համար զայն այցելելը ու անոր մէջ շրջապտոյտ մը ընելը քաջալերական պիտի ըլլայ ձեզի։

[Ստորանիշ]

[Նկարներ՝ էջ 10]

Բերնէ բերան լեցուն հանդիսասրահ մը եւ խուռներամ ունկնդիրներ ճաշասրահին մէջ

[Նկար՝ էջ 10]

Շրջապտոյտները մասնայատուկ ուրախութեան աղբիւր եղան