ՈՒՐԻՇՆԵՐԸ ԴՐԴԵՑԷՔ ՈՒՇԻ ՈՒՇՈՎ ՅԻՍՈՒՍԻ ՆԱՅԵԼՈՒ

¹ Մեծագոյն Մարդը Որ Ապրած Է գիրքը ուշագրաւ գիրք մըն է։ Անոր 133 գլուխները կրնան ընթերցողները դրդել որ ուշի ուշով Յիսուսի նային եւ զիրենք մղել որ անոր օրինակին հետեւին։ Յարմար կերպով ըսուած է թէ բոլոր թագաւորները, միասնաբար նկատի առնելով, մարդկային կեանքին վրայ ուժգին չեն ազդած ինչպէս Յիսուս ազդած է։ Անոնք որոնք ուշի ուշով Յիսուսի կը նային վստահաբար պիտի օգտուին։

² Յիսուս իր աշակերտներուն սորվեցուց իր Հօր մասին եւ Աստուծոյ հոյակապ յատկութիւնները ապացուցանեց։ Մեր սրտերը կ’ազդուին երբ նկատի կ’առնենք Յիսուսի գերազանց կարողութիւնը որպէս ուսուցիչ մը, անոր աներկիւղ առաջնորդութիւնը, եւ անոր կարեկցութիւնը։ Երբ կը վերյիշենք անոր չարչարանքները մինչ իր կեանքը տուաւ մեզ փրկագնելու համար, երախտապարտութեամբ կը լեցուինք։ Մեծագոյն Մարդը Որ Ապրած Է գիրքը կրնայ մարդոց օգնել որ Յիսուսի նային այս կերպով։

³ Լման Կերպով Նախապատրաստուեցէք. Լաւ կերպով նախապատրաստուած եղէք Աստուածաշունչի խօսակցութիւն մը սկսելու որ ուրիշները պիտի դրդէ ուշի ուշով Յիսուսի նայելու։ Ընտանիքներ եւ անհատներ կրնան միասնաբար փորձ ընել։ Ջանք թափեցէք որ հետաքրքրութիւն գրգռէք եւ մարդիկ մղէք Մեծագոյն Մարդը գիրքը կարդալու։ Ասիկա կատարելու համար թերեւս պէտք ըլլայ անհատի մը հետ մէկէ աւելի խօսակցութիւններ ընել։ Եթէ սկզբնական հետաքրքրութիւնը սահմանափակ է, կրնանք տալ թերթիկ մը կամ թերեւս գրքոյկ մը կամ պարբերաթերթ մը։

⁴ Դեկտեմբեր ամսուան ընթացքին տունէ տուն ծառայութեան ատեն մեր խօսակցութիւնները պիտի կեդրոնանան Յիսուսի վրայ եւ մարդոց քաջալերութիւն պիտի տան որ զինք աւելի լաւ կերպով ճանչնան։ Մեծագոյն Մարդը գիրքին մէջ արտայայտուած գաղափարները ցցուն ընելով, կրնանք մարդոց օգնել որ Յիսուսի նային, ոչ թէ պարզապէս որպէս պատմական անձնաւորութիւն մը, այլ՝ որպէս Աստուծոյ Որդին եւ այն կառավարութեան իշխող Թագաւորը որ բոլոր մարդկութեան խնդիրները պիտի լուծէ։

⁵ Ինչպէս որ շեշտ դրուեցաւ Մեր Թագաւորութեան Ծառայութիւն թերթիկին վերջին թիւին մէջ, կ’ուզենք մեր գրականութիւնները իմաստութեամբ գործածել։ Ի՞նչպէս կրնանք բնորոշել թէ անհատ մը անկեղծօրէն հետաքրքրուած է կամ ոչ։ Եթէ անհատը ուշադրութեամբ մտիկ կ’ընէ, հարցումներ կ’ուղղէ, կամ մասնաւոր ուշադրութիւն կը դարձնէ Աստուածաշունչէն մեր կարդացած համարներուն, ասիկա կրնայ անկեղծ հետաքրքրութեան ապացոյց մը ըլլալ։ Երբեմն տանուտէրը գնահատանք կ’արտայայտէ մեր այցելութիւններուն համար կամ կ’ըսէ թէ ինք վայելած է մեր գրականութիւնները կարդալով։ Եթէ գիրքը իրեն ցոյց տանք եւ ինք շուտով քննէ զայն կամ հարցնէ թէ ինչպէ՛ս կրնայ օրինակ մը ստանալ, ասիկա անկեղծ հետաքրքրութիւն կ’ապացուցանէ։ Եթէ այսպիսի հետաքրքրութիւն մը բացայայտ չէ, կարելի է որ թերթիկ մը տանք, հարցում մը ուղղենք ապագայ խօսակցութեան մը համար, եւ վերայցելելու համար կարգադրութիւն ընենք։ Երբ վերադառնանք, աւելի յստակ կերպով կրնանք որոշել անոր հետաքրքրութեան աստիճանը։—Տես Մեր Թագաւորութեան Ծառայութիւն թերթիկը, Մայիս 1990, էջ 3։

⁶ Անհատ մը որ կարդալէն միշտ հաճոյք չէր առներ, գնահատեց Մեծագոյն Մարդը գիրքը, ըսելով թէ անիկա դարձուց կարդալը ուրախութեան աղբիւրի մը իր օրուան վերջաւորութեան։ Թող որ ուրիշներու օգնենք որ նոյն կերպով զգան, ամէն ջանք թափելով ուրիշները դրդելու որ ուշի ուշով Յիսուսի նային՝ անկեղծ հետաքրքրութեամբ կարդալով Մեծագոյն Մարդը Որ Ապրած Է գիրքը։