Ուրիշներու Օգնենք Որ Ճշմարտութիւնը Սորվին

¹ Յիսուս երկիր եկաւ ճշմարտութեան վկայելու։ Որպէսզի ճշմարտութիւնը ուրիշներու քարոզուի, ան իր աշակերտները մարզեց որ ուսուցիչներ ըլլան։ Ան զանոնք «դպիր»ներ կոչեց քանի որ վստահ էր որ յաջողութեամբ ուրիշները պիտի սորվեցնէին։ (Մատթ. 13։52) Ան իւրաքանչիւր անհատ նմանցուց ուսեալ մարդու մը որ իսկական գանձ մը ունի որմէ բաներ դուրս կը հանէ։ Յիսուսի աշակերտները այսօր գրականութիւններ կը գործածեն Թագաւորութիւնը քարոզելու գործը արագացնելու համար։ Զոր օրինակ, շատ մը ժողովքներ զանազան գրքոյկներ ունին որպէսզի գործածեն ուրիշներու օգնելու որ աշակերտներ ըլլան։ Այս արժէքաւոր գործիքները ինչպէ՞ս կարելի է գործածել։

² Խօսակցութիւն մը սկսելու համար որ կ’առաջնորդէ «Մարդկային Մեծ Բազմութեան մը Ազատումը Արմագեդոնի մէջէն» գրքոյկը առաջարկելու վերայցելութեան մը ընթացքին, կրնաք ըսել.

◼ «Մօտ անցեալին մարդիկ կը վախնային հիւլէական պատերազմէ մը որ կրնայ կեանքը բնաջնջել այս երկրագունդէն։ Ոմանք զայն Արմագեդոն կոչեցին։ Այդ անունը լսա՞ծ էք։ [Թոյլ տուէք որ պատասխանէ։] Անիկա Աստուածաշունչին մէջ յիշուած պատերազմ մըն է, եւ ձեզի կ’ազդէ։ [Կարդացէք Յայտնութիւն 16։14, 16։] Կը խորհի՞ք որ բոլորն ալ պիտի մեռնին այդ պատերազմին մէջ։ [Թոյլ տուէք որ պատասխանէ։] Նկատեցէք ինչ որ Աստուածաշունչը կ’ըսէ ասոր մասին Մատթէոս 24։37, 40, 41–ին մէջ»։ Եթէ տանտէրը հետաքրքրուի, կրնաք խոստանալ որ ձեր յաջորդ այցելութեան իրեն բերէք Մարդկային Մեծ Բազմութեան մը Ազատումը Արմագեդոնի մէջէն գրքոյկը։

³ Ահաւասիկ կերպ մը որով կրնաք «Աստուծոյ Ճամբան Սէր Է» գրքոյկը գործածել ձեր վերայցելութեան ատեն.

◼ «Կը խորհի՞ք որ Աստուած մեզ ստեղծած է որպէսզի մի քանի տարի ապրինք, ծերանանք ու մեռնինք։ [Թոյլ տուէք որ պատասխանէ։] Աստուածաշունչը կ’ըսէ որ ‘Աստուած սէր է’։ (Ա. Յովհ. 4։16) Կը խորհի՞ք որ սիրալիր հայր մը հաճոյք կ’առնէ տեսնելով իր զաւակներուն տառապանքն ու մահը։ [Թոյլ տուէք որ պատասխանէ։] Աստուածաշունչը մեզ կը վստահեցնէ որ Աստուծոյ սէրը փաստ մըն է թէ ան կ’ուզէ որ մենք ապրինք, ոչ թէ մեռնինք»։ Կարդացէք Յովհաննու 3։16։ Տանտիրոջ ընդառաջումէն կախեալ ըլլալով, կրնաք հարցնել. «Եթէ ‘Աստուած սէր է’, ինչո՞ւ բան մը չ’ըներ մարդոց տառապանքին նկատմամբ»։ Ապա կրնաք խոստանալ որ ձեր յաջորդ այցելութեան իրեն բերէք Աստուծոյ Ճամբան Սէր Է գրքոյկը, եւ զայն նկատի առնել իր հետ։

⁴ Երբ կ’որոշէք ներկայացնել «Թագաւորութեան Այս Բարի Լուրը» գրքոյկը ձեր վերայցելութեան ատեն, կրնաք ըսել.

◼ «Շատ մը Քրիստոնեաներ կ’աղօթեն. ‘Քու թագաւորութիւնդ գայ. քու կամքդ ըլլայ ինչպէս երկինքը՝ նոյնպէս երկրի վրայ’։ (Մատթ. 6։10) Արդեօք մտածա՞ծ էք թէ ի՛նչ է այս թագաւորութիւնը որու գալը կ’ուզենք։ [Թոյլ տուէք որ պատասխանէ։] Անիկա Աստուծոյ կողմէ հաստատուած թագաւորութիւն մըն է. անիկա կառավարութիւն մըն է որ Աստուծոյ կամքը պիտի կատարէ հոս երկրի վրայ»։ Կարդացէք Դանիէլ 2։44։ Եթէ յարմար է, կրնաք հարցնել. «Այս թագաւորութիւնը ի՞նչ պիտի ընէ մեզի եւ մեր երկրագունդին»։ Ապա կրնաք խոստանալ որ ձեր յաջորդ այցելութեան իրեն բերէք «Թագաւորութեան Այս Բարի Լուրը» գրքոյկը, եւ այս նիւթին մասին աւելի խօսակցիք։

⁵ Ի մտի ունենալով «Երկրի Վրայ Կեանքը Յաւիտեան Վայելեցէ՛ք» գրքոյկը (Արաբ.) գործածել վերայցելութեան ատեն, պատանի հրատարակիչ մը կրնայ հարցնել.

◼ «Կը փափաքի՞ք ապրիլ դրախտային երկրի մը մէջ։ Ծնողքս ու ես կը յուսանք հոն ապրիլ քանի որ Աստուածաշունչը հետեւեալը կ’ըսէ Յովհաննու 17։3–ին մէջ»։ Եթէ հետաքրքրութիւն յայտնաբերուի համարը կարդալէ ետք, խոստացէք գրքոյկը բերել ձեր յաջորդ այցելութեան որպէսզի անհատը զայն կարդայ։

⁶ Եթէ ուրիշ գրքոյկներ կը գործածէք ձեր ծառայութեան մէջ այս ամիս, կրնաք ձեր բացումները վերոյիշեալ առաջարկներուն համաձայն ընել։ Յիշեցէք որ ձեր խօսակցութիւնը պէտք է կարճ պահէք եւ դրական մեկնաբանութիւններ ընէք որպէսզի տանտէրներուն հետաքրքրութիւնը շարժէք։

⁷ Եհովա մեզի ճշմարտութիւնը տուած է։ Պէտք է օգտագործենք ամէն պատեհութիւն որ կը հանդիսանայ որպէսզի ուրիշներու հետ զայն բաժնենք, թէ՛ գրականութիւններու միջոցաւ եւ թէ խօսակցութեամբ մեր հանդիպած մարդոց հետ։ Այս կերպով կը փաստենք դպիրներ ըլլալ ուրիշներու մնայուն օգտին համար։—Մատթ. 28։19, 20