Թագաւորութեան Ծառայութեան Ձեր Գանձը Ընդլայնեցէք

¹ Յիսուս նմանցուց Թագաւորութեան յոյսը անգին գանձի մը։ (Մատթ. 13։44-46) Արդեօք մենք Յիսուսի առակներուն մէջ յիշուած անհատներուն նմա՞ն ենք, որոնք իրենց բոլոր ունեցածը ծախեցին որպէսզի աւելի արժէքաւոր բան մը գնեն։ Եթէ պարագան այդպէս է, նախապատուութիւնը Աստուծոյ Թագաւորութեան պիտի տանք, թէեւ ան կրնայ անպատեհութիւն եւ անձնուրացութիւն պարփակել։—Մատթ. 6։19-22

² Քանի որ մեր Թագաւորութեան ծառայութիւնը գանձ մըն է, պէտք է մեր փափաքը ըլլայ զայն ընդլայնել։ Մեր անձնական կենցաղը ի՞նչ ցոյց կու տայ։ Մեր Թագաւորութեան գործունէութիւնը կ’ընդլայնե՞նք։ Այդպէս կրնանք ընել մասնակցելով ծառայութեան այլազան երեսակներուն, ի ներառեալ տունէ–տուն ծառայելը, վերայցելութիւններ ընելը, Աստուածաշունչի ուսումնասիրութիւններ վարելը եւ անպաշտօն կերպով վկայելը։

³ ‘Մասնակցութիւնս Ինչպէ՞ս Կրնամ Ընդլայնել’. Նոր ծառայութեան տարին սկսելով, լաւ կ’ըլլայ որ ամէն անհատ վերաքաղ ընէ իր անձնական գործունէութիւնը տեսնելու համար թէ ինչ կրնայ ընել դաշտի ծառայութեան տրամադրած ժամանակը աւելցնելու եւ հարց տայ. ‘Գործերս կրնա՞մ կարգի դնել որպէսզի օժանդակ ռավիրայութեան մասնակցիմ ժամանակ առ ժամանակ կամ նոյնիսկ շարունակաբար։ Մի քանի բարեփոխութիւններով, կրնա՞մ կանոնաւոր ռահվիրայական ծառայութեան մասնակցիլ’։ Նոր ռահվիրաները որոնք Սեպտեմբեր 1–ին կը սկսին իրենց ծառայութիւնը, որակելի կ’ըլլան որ յաջորդ տարի Ռահվիրաներու Ծառայութեան Դպրոցը յաճախեն։

⁴ Հրատարակիչներէն ոմանք անձնական նպատակակէտ մը դրած են աւելի անպաշտօն վկայութիւն ընելու։ Այս գործունէութիւնը յաճախ յառաջ կը բերէ հոյակապ արդիւնքներ։ Ուրիշներ թերեւս կարիքը տեսնեն բարելաւուելու ազդեցիկ վերայցելութիւններ ընելու կամ նոր Աստուածաշունչի ուսումնասիրութիւններ վարելու մէջ։

⁵ Եթէ եզրակացնենք որ մեր ծառայութիւնը կերպով մը սահմանափակ է, ի՞նչ կրնանք ընել զայն ընդլայնելու։ Անոնք որոնք յաջողած են բարձր նպատակակէտերու հասնիլ, կը յանձնարարեն որ նախ վճռենք Թագաւորութեան շահերը առաջին տեղը դնել ամէն գնով։ (Մատթ. 6։33) Հաւատքը եւ լման ապաւինումը Եհովայի վրայ անհրաժեշտ են։ (Բ. Կորն. 4։7) Անկեղծօրէն ու յարատեւաբար աղօթելով Անոր օգնութիւնը փնտռեցէք։ (Ղուկ. 11։8, 9) Կրնանք վստահ ըլլալ որ Եհովա պիտի օրհնէ մեր հարազատ ջանքերը իր ծառայութեան մեր մասնակցութիւնը աւելցնելու։—Ա. Յովհ. 5։14

⁶ Ուրիշ եղբայրներու եւ քոյրերու հետ խօսեցէք որոնք յաջողաբար իրենց ծառայութիւնը ընդլայնցուցած են։ Անոնց հարցուցէք թէ ինչպէ՛ս կրցան խոչընդոտներ յաղթահարել առանց յուսալքուելու։ Անոնց անձնական փորձառութիւնները կրնան ձեզ համոզել որ ընդլայնուած ծառայութիւնը անհասանելի չէ։

⁷ Երբ Դիտարանին եւ Մեր Թագաւորութեան Ծառայութիւն թերթիկին մէջ դաշտի ծառայութեան առնչութեամբ յօդուածներ կը կարդաք, աղօթքով նկատի առէք թէ ինչպէ՛ս կրնաք թելադրութիւնները կիրարկել ձեր ծառայութեան մէջ։ Նոյն բանը ըրէք երբ ներկայ կը գտնուիք ժողովքի ժողովներուն կամ համաժողովներուն։ Այս յօդուածին մէջ ներկայացուած թելադրութիւնները հիմնուած են քննարկութեան մը վրայ որ անցեալ տարուան շրջանային համաժողովին յայտագրին մէկ մասն էր։ Ան առաջինն է յօդուածաշարքի մը որ ծրագրուած է մեզի օգնելու որ գործադրենք ու կիրարկենք այդ յայտագրին հայթայթած յորդորանքը։

⁸ Յիսուս իր ծառայութիւնը լուրջի առաւ, զայն դարձնելով գլխաւոր հետաքրքրութիւն մը։ Ան յայտարարեց. «Իմ կերակուրս այն է, որ ես զիս ղրկողին կամքը ընեմ»։ (Յովհ. 4։34) Նոյն կերպով կը զգա՞նք։ Եթէ այո, վստահաբար կերպեր պիտի գտնենք մեր գործունէութիւնը ընդլայնելու եւ ուրիշներու հետ մեր գանձէն «բարի բաներ» բաժնելու։—Մատթ. 12։35. Ղուկ. 6։45