Աստուածաշունչը՝ Սփոփանքի Եւ Յոյսի Աղբիւր Տագնապալից Աշխարհի Մը Մէջ
1 Այս աշխարհը մարդկութիւնը կը պահէ հսկայ ճնշումի ներքեւ եւ սփոփանքի ու յոյսի կարիքով։ Աստուածաշունչը հարազատ սփոփանքի միակ աղբիւրն է։ Ան կը ներկայացնէ արդարութեան նոր աշխարհի մը յոյսը։ (Հռովմ. 15։4. Բ. Պետ. 3։13) Խորաթափանց Ակնարկ գիրքը, Հատոր Ա., էջ 311, կը նշէ. «Առանց Աստուածաշունչին Եհովան պիտի չճանչնայինք, Քրիստոսի փրկանքի զոհագործութենէն յառաջ եկած հոյակապ օգուտները պիտի չգիտնայինք եւ այն պահանջները պիտի չհասկնայինք, որոնց պէտք է գոհացում տրուի յաւիտենական կեանք ստանալու համար Աստուծոյ արդար Թագաւորութեան մէջ կամ անոր ներքեւ»։
2 Նոյեմբեր ամսուան ընթացքին մասնաւոր ուշադրութիւն պիտի դարձնենք այն դերին զոր Աստուծոյ Խօսքը՝ Աստուածաշունչը՝ կը խաղայ մարդոց օգնելու որ գլուխ ելլեն աշխարհէն եկած ճնշումներուն հետ։ Պիտի ներկայացնենք Աստուածաշունչը Աստուծո՞յ Խօսքն Է, թէ՝ Մարդոց գիրքը։ Ի՞նչ կրնանք ըսել որ արդարամիտ անհատներուն պիտի օգնէ որ Աստուածաշունչին արժէքը գնահատեն։
3 Դուք ձեզ ծանօթացնելէ ետք, կրնաք ասոր նման բան մը ըսել.
◼ «Հաւանաբար կը համաձայնիք թէ շրջապատուած ենք խնդիրներով որոնք կրնան մեզմէ խլել մեր մտքի խաղաղութիւնը։ Ո՞ւր կրնանք գործնական խրատ գտնել որ մեզի ցոյց կու տայ ինչպէ՛ս գլուխ ելլել այս խնդիրներուն հետ։ [Թոյլ տուէք որ պատասխանէ։] Նկատած եմ որ Աստուածաշունչը սրտապնդիչ է, որովհետեւ մեզի կը սորվեցնէ ինչպէ՛ս ուրախ ըլլանք։ [Կարդացէք Ղուկաս 11։28։] Մեր գործին նպատակն է մարդիկ քաջալերել որ Աստուածաշունչը կարդան ու անոր հրահանգէն օգտուին։ Քանի որ ան կը խօսի աշխարհի խնդիրներուն մեծամասնութեան պատճառին մասին, կը խոստանամ յաջորդ այցելութեան ձեզի բերել Աստուածաշունչը ուսումնասիրելու օժանդակ մը, որու խորագիրն է՝ Աստուածաշունչը Աստուծո՞յ Խօսքն Է, թէ՝ Մարդոց։ Այն ատեն ուրախ պիտի ըլլամ այդ օրինակը ձեր հետ ձգելով»։
4 Թերեւս կ’ընտրէք ասոր նման պարզ մօտեցում մը գործածել.
◼ «Մենք հետաքրքրուած ենք աւելի մեծ յարգանք քաջալերելով Աստուծոյ Խօսքին՝ Աստուածաշունչին՝ հանդէպ։ Արդարեւ, Աստուածաշունչի մարգարէութիւնները ներկայիս կը կատարուին։ Իսկ ի՞նչ ըսել հետագային կատարուելիք խոստումներուն մասին, ինչպէս՝ Սաղմոս 37։29–ի խոստումը։ [Հաճեցէք կարդալ զայն։] Կրնա՞մ գիտնալ թէ ձեր կարծիքը ի՛նչ է Աստուածաշունչին ներկայացուցած յոյսին մասին։ [Առիթ տուէք որ պատասխանէ։] Այս գեղեցիկ խոստումը ցցուն ընելու համար, ուրախ պիտի ըլլամ ձեզի ներկայացնելով, մօտ օրէն յաջորդ այցելութեան ատեն, թերթիկ մը որու խորագիրն է՝ Ի՛նչու Կրնաք Աստուածաշունչին Վստահիլ։ Այն ատեն կրնաք դուք ձեզի գիտնալ թէ ի՛նչ բաներ տեղի պիտի ունենան մօտ ապագային»։
5 Կարգ մը հրատարակիչներ թերեւս կ’ուզեն այս ուղղակի մօտեցումը գործածել, Աստուածաշունչի ուսումնասիրութիւն մը սկսելու համար.
◼ «Ձեզի կ’այցելեմ առաջարկելու համար տան մէջ Աստուածաշունչի ձրի ուսումնասիրութիւն մը։ Աստուածաշունչը կը նկատէ՞ք որպէս Աստուծմէ ներշնչուած գիրք մը։ [Թոյլ տուէք որ պատասխանէ։] Թոյլ տուէք որ ցոյց տամ թէ ինչպէ՛ս անոր հրահանգը կրնայ մեզի օգնել իրերը շտկելու։ [Կարդացէք Բ. Տիմոթէոս 3։16, 17։] Աստուածաշունչը Աստուծոյ կողմէ ուրուագծուած է ուսումնասիրութեան համար։ Թոյլ տուէք որ հակիրճօրէն ապացուցանեմ թէ ինչպէ՛ս կրնաք զայն գործածել։ [Բացէք Յայտնութիւն 21։2-4, եւ ուշադրութեան յանձնեցէք ինչ որ Աստուծոյ Թագաւորութիւնը պիտի իրագործէ մարդկութեան համար։ Ըստ յայտնաբերուած հետաքրքրութեան, կարդացէք մէկ կամ երկու համարներ, ինչպէս՝ Դանիէլ 2։44 եւ Սաղմոս 72։8, եւ յիշուած կէտին մասին խօսակցեցէք։ Բացատրեցէք թէ ինչպէ՛ս մէջբերուած համարները բանալը պիտի յայտնէ ինչ որ Աստուած ծրագրած է իրագործել իր Թագաւորութեան միջոցաւ։] Ուրախ պիտի ըլլամ վերադառնալով ու այս Թագաւորութեան յոյսը աւելի նկատի առնելով»։
6 Աստուածաշունչը սփոփանքի ու յոյսի աղբիւրն է, ինչպէս նաեւ ճշմարտութեան՝ որ կրնայ մեզ առաջնորդել յաւիտենական կեանքի։ (Յովհ. 17։3, 17) Ուրիշներու հետ Աստուածաշունչի գիտութիւնը բաժնելը Եհովան կը հաճեցնէ, որ «կ’ուզէ որ բոլոր մարդիկ փրկուին»։—Ա. Տիմ. 2։4