Օրհնութիւններ Որոնք Յառաջ Կու Գան Ուրիշներու Հետ Աշխատելով
1 Կը խորհի՞ք որ վայելելիք օրհնութիւններ կան աշխատելով ուրիշներու հետ ծառայութեան մէջ։ Յիսուս այդպէս մտածեց։ Թէեւ հունձքը շատ էր եւ մշակները՝ քիչ, ան 70 աշակերտներ «երկու երկու» ղրկեց դէպի դաշտ։ Բոլորն ալ ի՜նչ վարձահատոյց ժամանակ մը ունեցան քարոզելով «բոլոր քաղաքները ու տեղերը ուր ինք պիտի երթար»։—Ղուկ. 10։1, 17, ՆԱ. Մատթ. 9։37
2 Ուրիշներու հետ աշխատիլը ոգեւորիչ է։ Մեզմէ ոմանք երկչոտ են եւ դժուարութիւն կը գտնեն օտարներու մօտենալու։ Ուրիշ մը մեր կողմը ունենալը կրնայ մեզի ինքնավստահութիւն տալ որպէսզի Աստուծոյ Խօսքը համարձակութեամբ խօսինք։ Երբ ուրիշ մը մեր հետ է, աւելի դիւրին կ’ըլլայ մեզի որ գործը կատարենք այն կերպով որ մարզուեցանք։ (Առ. 27։17) Իմաստուն անհատը ըսաւ. «Երկուքը մէկէն աղէկ է»։—Ժող. 4։9
3 Լաւ կ’ըլլայ աշխատիլ զանազան հրատարակիչներու եւ ռահվիրաներու հետ։ Պօղոսի ծառայութեան ընկերները պարփակեցին Բառնաբաս, Շիղա, Տիմոթէոս եւ Յովհաննէս Մարկոս, եւ անոնք շատ մը օրհնութիւններ վայելեցին մինչ միասնաբար քարոզեցին։ Նոյնը կրնայ ճշմարիտ ըլլալ այսօր։ Աշխատա՞ծ էք անհատի մը հետ որ երկար ժամանակէ ի վեր ճշմարտութեան մէջ է։ Վկայելու մէջ անոր հմտութիւնը նկատելէ ետք, հաւանաբար լաւ գաղափարներ քաղեցիք որոնք ձեզի օգնեցին որ բարելաւուիք։ Յարաբերաբար նոր եղող հրատարակիչներու հետ ծառայութեան ելա՞ծ էք։ Այն ատեն թերեւս բաժնեցիք ինչ որ սորված էք եւ այսպիսով անոնց օգնեցիք որ աւելի ազդեցիկ ըլլան եւ աւելի մեծ ուրախութիւն գտնեն իրենց ծառայութեան մէջ։
4 Աստուածաշունչի ուսումնասիրութիւն մը ներկայիս կը վարէ՞ք։ Եթէ այո, ինչո՞ւ չհրաւիրէք երէցներէն մէկը կամ շրջանային տեսուչը որ դասին ներկայ գտնուի։ Մեր Աստուածաշունչի աշակերտները կ’օգտուին քաջածանօթ ըլլալով տեսուչներուն հետ։ Եթէ կը վարանիք ուսումնասիրութիւնը վարելու երէցի մը ներկայութեան, հաւանաբար ան յօժար պիտի ըլլայ զայն վարելու եւ թոյլ տալու որ իր կերպը նկատէք։ Անկէ վերջ, ազատ զգացէք իրմէ թելադրութիւններ խնդրելու թէ ինչպէ՛ս կրնաք աշակերտին օգնել որ աւելի արագօրէն յառաջդիմէ։
5 Քաջալերող ընկերակից մը եղէք երբ ուրիշներու հետ կ’աշխատիք։ Դրական եղէք ձեր մեկնաբանութիւններուն մէջ թաղամասին նկատմամբ։ Երբեք մի բամբասէք ուրիշներու մասին կամ գանգատիք ժողովքային կարգադրութիւններուն մասին։ Ձեր միտքը կեդրոնացուցէք ծառայութեան եւ Եհովայի օրհնութիւններուն վրայ։ Եթէ այդպէս ընէք, թէ՛ դուք եւ թէ ձեր ընկերակիցները հոգեւորապէս կազդուրուած տուն պիտի վերադառնաք։
6 Ձեր պարագաները թերեւս դժուար կը դարձնեն որ կանոնաւորաբար աշխատիք ուրիշ եղբայրներու եւ քոյրերու հետ։ Սակայն, եթէ կարելի է, ինչո՞ւ չկարգադրէք որ որոշ ժամանակ մը ունենաք աշխատելու համար ուրիշ հրատարակիչի մը հետ։ Երկուքդ ալ պիտի օրհնուիք։—Հռովմ. 1։11, 12