Նահանգային Համաժողովին Բոլորը Հրճուեցան Նոր Գրքին Հրատարակութեամբ
Նոր Գիրքը Աստուծոյ Գիտութիւնը Ցցուն կ’Ընէ
1 Անցեալ ամառ մեր նահանգային համաժողովին, որքա՜ն ուրախ էինք ամբողջ յայտագրով։ Շաբաթ կէսօրէ ետք, մեր ուրախութիւնը յորդեցաւ երբ լսեցինք ծանուցումը նոր գրքին՝ Գիտութիւնը Որ Յաւիտենական Կեանքի կ’Առաջնորդէ՝ նկատմամբ եւ յաջորդող յարակից տեղեկութիւնները։ Երկրի վրայ ապրող միլիառաւոր մարդիկ կարիքը ունին այն գիտութեան զոր միայն Աստուած կրնայ տալ—Աստուծոյ եւ իր Որդւոյն՝ Յիսուս Քրիստոսի՝ գիտութիւնը։—Առ. 2։1–6. Յովհ. 17։3
2 Դասախօսը որքա՜ն վառ կերպով նկարագրեց գրքին մասերը։ Գրաւիչ խորագիրները, գործնական լուսաբանութիւնները, ճշմարտութեան դրական ներկայացումը, պարզ հարցումները եւ իւրաքանչիւր գլուխի վերջաւորութեան «Ձեր Գիտութիւնը Քննեցէք» խորագրով շրջագիծը, այն երեսակներէն են որոնք կոչ պիտի ընեն բոլոր զայն կարդացողներուն։ Բայց մեր Աստուածաշունչի աշակերտները յատկապէս պիտի օգտուին մինչ արագօրէն ձեռք կը ձգեն Աստուածաշունչի հիմնական ուսուցումները։
3 Շաբաթ եւ Կիրակի օրերուն փակման դասախօսութիւններուն ընթացքին, մեզի քաջալերութիւն տրուեցաւ որ ընտանեկան ուսումնասիրութիւն մը ունենանք այս նոր գիրքը գործածելով։ Հիմա հաւանաբար քաջածանօթ եղած ենք անոր բովանդակութեան հետ։ Անկասկած, նաեւ նկատի առած էք կէտեր զորս պիտի գործածէք երբ այս նոր գիրքը կը ներկայացնէք դաշտին մէջ։
4 Վերաքաղ Ընելիք Կէտեր. Թերեւս կը յիշէք որ երբ դասախօսը կը ներկայացնէր «Մարդկութիւնը Ի՛նչու Աստուծոյ Գիտութեան Կարիքը Ունի» նիւթը, ան կարգ մը կէտեր շեշտեց, մէջը ըլլալով հետեւեալները. (1) Երբ այս գիրքը կը գործածէք ուսումնասիրութիւններ վարելու համար, իմաստութիւն չէ յաւելեալ տեղեկութիւններ մէջբերել, ինչ որ կրնայ գլխաւոր կէտերը մթագնել. միայն կեդրոնացէք իւրաքանչիւր գլուխի մէջ գրքին փաստածը հաղորդելու վրայ։ (2) Գլուխները չափաւոր երկարութիւն ունին այնպէս որ սովորաբար պիտի կարենաք գլուխ մը ծածկել իւրաքանչիւր ուսումնասիրութեան ընթացքին։ (3) Իւրաքանչիւր գլուխի վերջաւորութեան, «Ձեր Գիտութիւնը Քննեցէք» խորագրով շրջագծին հարցումները համառօտ վերաքաղ մը պիտի հայթայթեն։
5 Գործածել Աստուածաշունչի Ուսումնասիրութիւններու Համար. Շատ մը հրատարակիչներ հարց տուին թէ յարմա՞ր է որ իրենց Աստուածաշունչի ուսումնասիրութեան գրականութիւնը փոխարինեն այս նոր գրքով։ Եթէ ներկայիս գործածուած գրքէն բաւական սերտած էք, գործնական պիտի ըլլայ որ ամբողջացնէք այդ գրքին ուսումնասիրութիւնը։ Այլապէս, կը յանձնարարուի որ սկսիք Գիտութիւն գիրքը ուսումնասիրել։ Եթէ գրքոյկ մը կամ թերթիկ մը գործածած էիք Աստուածաշունչի ուսումնասիրութիւն մը սկսելու համար, յարմար ժամանակին նոր գիրքը ներկայացուցէք ու զայն գործածեցէք ուսումնասիրութեան համար։ Գիտութիւն գիրքը գործածելու նկատմամբ աւելի տեղեկութիւններ պիտի հայթայթուին գալիք ամիսներուն Մեր Թագաւորութեան Ծառայութիւնը թերթիկին մէջ։
6 Եհովա այս նոր գիրքը հայթայթած է մեզի օգնելու որ ուրիշներու սորվեցնենք այն գիտութեան մասին որ յաւիտենական կեանքի կ’առաջնորդէ։ Հիմա պէտք է լաւ նախապատրաստուինք եւ լման բաժին մը բերենք այն գործին մէջ որ տակաւին պիտի կատարուի։