Աստուածաշունչը կը սորվեցնէ գիրքը՝ Աստուածաշունչի ուսումնասիրութեան գլխաւոր գիրքն է
1 «Աստուծոյ հնազանդիլ» բնաբանով նահանգային համաժողովին, Աստուածաշունչը իրապէս ի՞նչ կը սորվեցնէ գիրքին լոյս տեսնելը որքա՜ն ոգեւորիչ էր։ Պատուիրակները ուրախութեամբ գիրքը ստացան՝ Շաբաթ օրուան յայտագրին աւարտին։ Ուսուցանելու գործունէութեան մէջ այս նոր գործիքը ի՞նչպէս պիտի գործածուի։ Անիկա Աստուածաշունչի ուսումնասիրութեան օժանդակող մեր գլխաւոր գիրքը պիտի ըլլայ։ Թէեւ անիկա առաջին անգամ Մա՛րտ ամսուան ընթացքին դաշտին մէջ պիտի ներկայացուի, սակայն հրատարակիչները կը քաջալերենք որ անմիջապէս սկսին զայն գործածել՝ Աստուածաշունչի ուսումնասիրութիւններ սկսելու եւ վարելու համար։
2 Աստուածաշունչի ընթացիկ ուսումնասիրութիւնները. Գիտութիւն գիրքով կամ Ի՛նչ կը պահանջէ գրքոյկով Աստուածաշունչի ուսումնասիրութիւններ վարող հրատարակիչները, լաւ դատողութիւն պէտք է գործածեն որոշելու համար թէ ի՛նչպէս եւ ե՛րբ սկսին այս նոր գիրքը գործածել։ Եթէ ուսումնասիրութիւն մը վերջերս հաստատած ես, կրնաս նոր գիրքին անցնիլ ու առաջին գլուխէն սկսիլ։ Եթէ Գիտութիւն գիրքէն մի քանի գլուխ ծածկած ես, կրնաս ուսումնասիրութիւնը շարունակել Աստուածաշունչը կը սորվեցնէ գիրքին համապատասխանող գլուխէն սկսեալ։ Իսկ եթէ Գիտութիւն գիրքին վերջաւորութեան հասած ես, կրնաս որոշել զայն ամբողջացնել։
3 Անկասկած բոլորս կը ճանչնանք անհատներ, որոնք Աստուածաշունչը կը սորվեցնէ գիրքը ուսումնասիրելով պիտի օգտուին։ Ինչո՞ւ իւրաքանչիւր անհատի չառաջարկենք նոր գիրքով Աստուածաշունչը սերտել։ Օրինակ, Ի՛նչ կը պահանջէ գրքոյկը կամ Գիտութիւն գիրքը ուսումնասիրած բայց նուիրումի ու մկրտութեան հանգրուանին չհասած անհատները, թերեւս փափաքին իրենց ուսումնասիրութիւնը վերսկսիլ, նոր գիրքը գործածելով։ Ծնողները կրնան այս գիրքին միջոցով իրենց զաւակներուն հաղորդել ճշգրիտ գիտութիւն Աստուծոյ կամքին մասին։—Կող. 1։9, 10
4 Երկրորդ գիրք մը ուսումնասիրել. Աստուածաշունչի աշակերտը Աստուածաշունչը իրապէս ի՞նչ կը սորվեցնէ գիրքը ամբողջացնելէ ետք, կրնա՞յ երկրորդ գիրք մը ուսումնասիրել։ Այո՛։ Եթէ բացայայտ է թէ աշակերտը կը յառաջդիմէ, թէեւ դանդաղօրէն, եւ իր սորվածը կը գնահատէ, ուսումնասիրութիւնը կրնայ շարունակուիլ, Միակ ճշմարիտ Աստուածը պաշտեցէք գիրքը գործածելով։ Վստահ ենք որ Աստուածաշունչը կը սորվեցնէ գիրքը զօրաւոր միջոց մը պիտի ըլլայ, մեր աշակերտելու յանձնարարութիւնը կատարելու համար։—Մատթ. 28։19, 20