Յայտաթերթիկները Լաւ Կերպով Գործածեցէք
1 Ժողովքի յայտաթերթիկները կ’օգնեն որ համայնքի մարդիկը գիտնան Թագաւորութեան Սրահին հասցէն ու ժողովներուն ճշգրիտ ժամանակը։ Պատշաճ է որ ձեր հանդիպած իւրաքանչիւր անհատին յայտաթերթիկ մը տաք։ Հետեւաբար, իւրաքանչիւր ժողովք բաւարար քանակով յայտաթերթիկներ պէտք է ապահովէ։ Այն ժողովքները որոնք ամէն տարի Յունուարին իրենց ժողովի ժամերը կը փոխեն, Հոկտեմբերին նոր յայտաթերթիկներ պէտք է ապսպրեն, որպէսզի ժողովի ընթացիկ ժամերը ցոյց տուող յայտաթերթիկներու քանակ մը միշտ ձեռնտու ըլլայ։ Այս նպատակին համար գործածեցէք Յայտաթերթիկներու Խնդրագիր–ի պատճեն։ Երբ յայտաթերթիկները ստանաք, ի՞նչպէս կրնաք լաւագոյն կերպով գործածել զանոնք։
2 Հրատարակիչներէն շատեր նկատած են որ անհատին յայտաթերթիկ մը տալը, իրենք զիրենք անոր ներկայացնելու ու խօսակցութիւն մը սկսելու ազդու միջոց մըն է։ Ժողովի ժամերուն կամ յայտաթերթիկի ետեւի կողմը եղող պատգամին ուշադրութիւն ուղղելը կրնայ ճամբան հարթել որ մեր գործունէութեան ու անոր նպատակներուն մասին խօսակցութիւն մը սկսի։ Ծնողներ կրնան իրենց զաւակները ծառայութեան միջամուխ ընել, անոնց սորվեցնելով յայտաթերթիկ մը ներկայացնել դռներուն առջեւ։ Նամակ գրելով վկայութիւն տուող հրատարակիչները, իրենց նամակներուն մէջ յայտաթերթիկ մը պէտք է ներփակեն ու անհատը ժողովներու հրաւիրեն։ Կարելի է յայտաթերթիկներ ձգել տունը չեղողներուն դռներուն տակ, ուշադիր ըլլալով որ յայտաթերթիկները անցորդներու տեսողութենէն հեռու են։
3 Յայտաթերթիկները պարկեշտ սիրտ ունեցողները ճշմարտութեան առաջնորդելու մէջ մեծ դեր մը խաղցած են։ Փորձառութիւն մը կը խօսի կնոջ մը մասին, որ յայտաթերթիկի մը շնորհիւ կրցաւ Աստուածաշունչը հասկնալու իր երկարատեւ փափաքը իրականացնել։ Ամբողջ գիշերը Աստուծոյ աղօթելէ ետք, առաւօտուն Վկայ զոյգ մը իր տան զանգը զարկաւ։ Դիտակէն նայելով, ան ըսաւ որ դուռը չէր կրնար բանալ։ Վկաները դրան տակէն յայտաթերթիկ մը տուին։ Անոր վրայ գրուած էր. «Ձեր Աստուածաշունչը Ճանչցէք»։ Կինը շուտով դուռը բացաւ։ Տեղւոյն վրայ ուսումնասիրութիւն մը սկսուեցաւ, ու հետագային ան մկրտուեցաւ։ Աստուծոյ հոգիին զօրութիւնը բնաւ չթերագնահատենք. թող որ յայտաթերթիկները կանոնաւորաբար գործածենք մինչ մեր ծառայութիւնը լիովին կը կատարենք։—Տես նաեւ՝ Փետրուար 1994–ի Մեր Թագաւորութեան Ծառայութիւնը, էջ 1։