«Քրիստոսի հետեւեցէք» բնաբանով նահանգային համաժողովը համայն աշխարհի մէջ ծանուցանել
Հրատարակիչները դարձեալ մասնայատուկ յայտաթերթիկ պիտի բաշխեն
1 Անցեալ տարի, «Ազատումը մօտ է» բնաբանով նահանգային համաժողովը ծանուցանելու համաշխարհային արշաւը, հետաքրքրուած անհատներուն վրայ զօրաւոր ազդեցութիւն ձգեց։ Անոնք որ մասնայատուկ հրաւէրը ընդունեցին եւ եկան, առաջին անգամ ըլլալով Եհովայի Վկաներուն հետ հոգեւոր ճոխ կոչունք վայելեցին, ինչպէս նաեւ՝ մեր ջերմ ու միացեալ քրիստոնէական եղբայրութեան ընկերակցութիւնը։ (Եսա. 65։13. Սաղմ. 133։1) Որպէսզի կարենանք կարելի եղածին չափ շատ անհատներու օգնել որ «Քրիստոսի հետեւեցէք» բնաբանով նահանգային համաժողովին ներկայ գտնուին, անգամ մը եւս համայն աշխարհի մէջ մասնայատուկ յայտաթերթիկ մը պիտի բաշխենք։
2 Անցեալ տարուան արդիւնքները. Աշխարհի չորս ծագերէն եկած տեղեկագրութիւնները նշեցին թէ «Ազատումը մօտ է» բնաբանով նահանգային համաժողովը ծանուցանելը հոյակապ արդիւնքներ յառաջ բերաւ։ Շատ մը շրջաններու մէջ նպաստաւոր կերպով խօսեցան մեր մասին։ Օրինակ, քաղաքի մը մէկ լրագիրը արշաւին մասին վեց–սիւնակնոց յօդուած մը հրատարակեց, ըսելով. «Համաժողովէն առաջ բոլորը տեղեկացնելու համար, շրջանին մէջ Վկաները յաւելեալ ջանքեր կը թափեն,– աւելի երկար ժամեր քարոզելով, երկար հեռաւորութիւններ կտրելով եւ աւելի արագ խօսելով»։ Ուրիշ քաղաքի մը մէջ, յայտաթերթիկին բաշխումը տեղական լրատուամիջոցներու հետաքրքրութիւնը արթնցուց եւ մղեց որ մանրամասն տեղեկութիւններ հաղորդեն։ Առնուազն երեք լրագիրներ համաժողովէն առաջ մեր գործունէութեան մասին նպաստաւոր տեղեկագրութիւններ հրատարակեցին։ Թղթակից մը մի քանի յօդուածներ գրեց, որոնք իր լրագրին Կիրակի օրուան թիւին մէջ աւելի քան երկու էջ գրաւեցին, մանրամասն տեղեկութիւններ տալով մեր հաւատալիքներուն, մեր եղբայրութեան, յայտաթերթիկի բաշխումին եւ համաժողովին մասին։ Երբ հրատարակիչ մը դրան առջեւ հրաւիրագիրը ներկայացուց, տանտիրուհին ընդհատեց՝ ըսելով. «Այո, օրաթերթին մէջ ասոր մասին հիմա կարդացի»։ Ուրիշ տանտիրուհի մը բացագանչեց. «Հիմա ձեր մասին կը կարդայի, եւ ահաւասիկ հոս էք։ Անիկա ի՞մ հրաւիրագիրս է»։ Ապա աւելցուց. «Եհովայի Վկաներուն այս ըրածը շատ գովելի է»։
3 Բազմաթիւ հետաքրքրուած անհատներ համաժողովի վայրը եկան՝ իրենց հրաւիրագիրները բռնած։ Հետաքրքրուած անհատներէն ոմանք նիստերուն ներկայ գտնուելու համար, ինքնաշարժով հեռաւոր քաղաքներէ եկան։ Ուրիշները հրաւիրելու մեր ժրաջան ջանքերը նպաստեցին որ ներկաներուն թիւը աւելնայ։ Օրինակ, երկրի մը մէջ համաժողովի ներկաներուն թիւը 27 առ հարիւր յաւելում արձանագրեց։
4 Թաղամասը ծածկել. Կրնաս յայտաթերթիկը բաշխել՝ համաժողովը սկսելէն երեք շաբաթ առաջ։ Ամէն ջանք պէտք է թափուի ժողովքին բոլոր թաղամասերը ծածկելու համար։ Շատ թաղամասեր ունեցող ժողովքներուն մէջ, համաժողովէն մէկ շաբաթ առաջ, հրատարակիչները կրնան տունը չեղողներուն համար յայտաթերթիկը խոհեմօրէն ձգել։ Ժողովքները պէտք է ջանան բոլոր յայտաթերթիկները բաշխել եւ կարելի եղածին չափ շատ թաղամասեր ծածկել։ Ժողովքին ռահվիրաները կրնան չբաշխուած յայտաթերթիկներուն հոգ տանիլ։
5 Ի՛նչ ըսել. Կրնաս ասոր նման բան մը ըսել. «Մօտալուտ կարեւոր առիթի մը վերաբերեալ այս հրաւիրագիրը համայն աշխարհի մէջ կը բաշխենք։ Ահաւասիկ քու հրաւիրագիրդ։ Անոր մէջ յաւելեալ մանրամասնութիւններ պիտի գտնես»։ Ներկայացումը համառօտ պահելը ընդարձակ բաշխման պիտի նպաստէ։ Անշուշտ, եթէ տանտէրը հարցումներ ունի, ժամանակ տրամադրէ որ անոնց պատասխանես։ Երբ անհատ մը հետաքրքրութիւն ցուցաբերէ, գրի առ ու շուտով վերայցելէ։
6 Ո՜րքան կենսական է որ ջանանք Քրիստոսի հետեւիլ։ (Յովհ. 3։36) Մեր մօտալուտ նահանգային համաժողովը բոլոր ներկաներուն պիտի օգնէ որ ասիկա ընեն։ «Քրիստոսի հետեւեցէք» բնաբանով նահանգային համաժողովը ծանուցանելու ջանքերուն շնորհիւ, վստահաբար կրնանք ակնկալել որ դարձեալ մեծ վկայութիւն մը տրուի։ Ուստի նախանձախնդրաբար հրաւիրէ կարելի եղածին չափ շատ անհատներ։ Թող Եհովա առատապէս օրհնէ ջանքերդ, մինչ այս աշխարհածաւալ արշաւին կը մասնակցիս։