Յաջողութիւն Գտնող Ներկայացումը Գործածեցէք
1 Մեր Թագաւորութեան Ծառայութիւնը թերթիկը շարունակաբար կը հայթայթէ մեզի դաշտի ծառայութեան մէջ գործածուելիք զանազան ներկայացումներ։ Անիկա Թագաւորութեան պատգամին հանդէպ հետաքրքրութիւն արթնցնելու մասին թարմ գաղափարներ կու տայ մեզի։ Թերեւս ամէն ամիս ջանք կը թափէք մէկ կամ աւելի նոր ներկայացումներ սորվելու։ Սակայն, հրատարակիչներէն ոմանք կրնան նկատել, որ երբ կը սկսին անոնցմէ մէկը գործածել, Մեր Թագաւորութեան Ծառայութիւնը թերթիկին յաջորդ թիւը նոր ներկայացումներ կը հայթայթէ։ Բացայայտօրէն, ամէն անհատ չի կրնար ներկայացումի մը գործածութեան հմուտ չդարձած, նոր հատ մը սորվիլ։
2 Անշուշտ, հազարաւոր ռահվիրաներ եւ հրատարակիչներ կան, որոնք դաշտի ծառայութեան մէջ շատ ժամեր կ’անցընեն։ Ասկէ զատ, բազմաթիւ ժողովքներ մի քանի շաբթուան ընթացքին իրենց բոլոր թաղամասերը կ’աշխատին։ Այս պարագաներուն, հրատարակիչները ուրախութեամբ կ’ողջունեն պատգամը ներկայացնելու նոր մօտեցումներ ու գաղափարներ։ Ասիկա կ’օգնէ անոնց որ իրենց հմտութիւնները բարելաւեն, իրենց ծառայութիւնը աւելի հետաքրքրական ու պտղաբեր դարձնեն ու նոր դժուարութիւնները յաղթահարեն։
3 Ամէն պարագայի, եթէ ներկայացում մը պատրաստած էք որ հետաքրքրութիւն մշակելու մէջ ազդեցիկ է, ամէն գնով շարունակեցէք զայն գործածել։ Երբ ազդեցիկ ներկայացում մը գործածելով արդիւնքներ ձեռք կը ձգէք, մի դադրիք զայն գործածելէ։ Պարզապէս զայն յարմարցուցէք ընթացիկ ամսուան ներկայացուելիք գրականութեան։ Երբ Մեր Թագաւորութեան Ծառայութիւնը թերթիկին թելադրած ներկայացումները աչքէ կ’անցընէք, կրնաք հետաքրքրական կէտեր ընտրել ձեր անհատական ներկայացումին մէջ պարփակելու համար։
4 Արդ, երբ Մեր Թագաւորութեան Ծառայութիւնը թերթիկին նոր թիւը ստանաք, յիշեցէք թէ անոր բովանդակած ներկայացումները պարզապէս՝ թելադրութիւններ են։ Եթէ կրնաք զանոնք գործածել՝ շատ լաւ։ Իսկ եթէ արդէն գտած էք ներկայացում մը որ ձեր թաղամասին մէջ արդիւնաբեր է, զայն գործածեցէք։ Կարեւորը՝ ‘ձեր ծառայութիւնը լիովին ու պատշաճօրէն կատարեցէք’, արժանի եղողները գտնելով ու անոնց օգնելով որ աշակերտներ ըլլան։—Բ. Տիմ. 4։5, ՆԱ։