Բոլորն Ալ ‘Խօսքը Սրտանց Պէ՛տք Է Ընդունին’

¹ Միլիոնաւոր մարդիկ Աստուածաշունչը կ’ուսումնասիրեն Եհովայի Վկաներու հետ։ Յաւիտենական կեանքի որակելի ըլլալու համար, անոնք պէտք է ‘խօսքը սրտանց ընդունին’, այն 3,000 անհատներուն նման, որոնք Հ.Դ. 33–ի Պէնտէկոստէին զղջացին ու մկրտուեցան։ (Գործք 2։41) Ասիկա ներկայիս մեր վրայ ի՞նչ պատասխանատուութիւն կը դնէ։

² Աստուածաշունչի մեր աշակերտներուն պէտք է օգնենք որ Եհովայի հանդէպ նուիրում զարգացնեն։ (Ա. Տիմ. 4։7-10) Այս ուղղութեամբ, Յունիս 1996–ի Մեր Թագաւորութեան Ծառայութիւնը թերթիկին յաւելուածականը, պարբերութիւն 20–ին մէջ թելադրեց. «Ուսումնասիրութեան ամբողջ տեւողութեան, առիթներ փնտռեցէք որ Եհովայի յատկութիւններուն հանդէպ գնահատութիւն կերտէք։ Աստուծոյ հանդէպ ձեր ունեցած խոր զգացումները արտայայտեցէք։ Աշակերտը քաջալերեցէք որ Եհովայի հետ ջերմ՝ անձնական յարաբերութիւն մը զարգացնէ»։

³ Յաղթահարելիք Դժուարութիւն մը. Մարդոց մեծամասնութիւնը, սուտ կրօնքէն ազդուած, կը գոհանան պաշտամունքի կերպով մը որ իրենցմէ նուազագոյն ժամանակը ու ջանքը կը պահանջէ, եւ իրենց ապրելակերպին մէջ որեւէ իսկական փոփոխութիւն չի պահանջեր։ (Բ. Տիմ. 3։5) Մեր յաղթահարելիք դժուարութիւնն է օգնել Աստուածաշունչի մեր աշակերտներուն տեսնելու որ ճշմարիտ պաշտամունքը Աստուծոյ խօսքը լսողներ ըլլալէն աւելին կը պարփակէ։ Անոնք իրենց սորվածները պէտք է կիրարկեն իրենց կեանքին մէջ։ (Յակ. 1։22-25) Եթէ իրենց վարքին մէջ մարզ մը կայ որ Աստուծոյ ընդունելի չէ, անոնք պէտք է գիտակցին թէ ‘դարձի գալու’ ու զինք հաճեցնելու համար շիտակը ընելու ստիպուած են։ (Գործք 3։19) Յաւիտենական կեանք ձեռք ձգելու համար, անոնք պէտք է ‘ջանք’ ընեն ու ճշմարտութեան կողքին դիրք բռնեն։—Ղուկ. 13։24, 25

⁴ Բարոյականութեան զանազան երեսակները նկատի առնելու ժամանակ, Աստուածաշունչի ձեր աշակերտին հարցուցէք թէ ան այս հարցերը ի՛նչ աչքով կը դիտէ եւ թէ ի՛նչ պէտք է ընէ եթէ նկատէ թէ իր կեանքին մէջ փոփոխութիւն մը մտցնելու կարիքը ունի։ Իր ուշադրութիւնը կազմակերպութեան ուղղեցէք, որու միջոցաւ ճշմարտութիւնը կը սորվի, եւ քաջալերեցէք զինք որ ժողովքային հանդիպումներուն կանոնաւորաբար ներկայ գտնուի։—Եբր. 10։25

⁵ Մեր նպատակակէտը դարձնենք մեր ուսուցումով աշակերտին սրտին հասնիլ։ Մեզի համար ուրախութիւն է տեսնել նորեկներ, որոնք Աստուծոյ խօսքը սրտանց կ’ընդունին եւ կը մկրտուին։—Ա. Թես. 2։13