Ուսումնասիրութիւններ Սկսիլ Ի՛նչ կը Պահանջէ Գրքոյկով

¹ Բոլոր աշխարհէն եկած տեղեկագրութիւնները ցոյց կու տան, որ Աստուած Ի՛նչ կը Պահանջէ Մեզմէ գրքոյկը, ճշմարտութիւնը մարդոց սորվեցնելու համար ազդու գործիք մըն է։ Ամէն շաբաթ հազարաւոր Աստուածաշունչի ուսումնասիրութիւններ կը սկսուին այս գրքոյկով։ Դուք ալ յաջողա՞ծ էք Ի՛նչ կը Պահանջէ գրքոյկով Աստուածաշունչի ուսումնասիրութիւն մը սկսիլ եւ վարել։

² Մինչ շատեր դիւրին կը գտնեն գրքոյկը տեղաւորել, սակայն ոմանք դժուարութիւն ունին ուսումնասիրութիւն մը սկսելու առաջնորդող խօսքեր գտնելու։ Ոմանք, Աստուածաշունչի ուսումնասիրութիւններ սկսելու ի՞նչպիսի ազդեցիկ մեթոտներ գտած են, Ի՛նչ կը Պահանջէ գրքոյկի գործածութեամբ։ Հետեւեալ թելադրութիւնները օգտակար պիտի ըլլան։

³ Առաջարկեցէք Ուսումնասիրութեան Կերպը Ցուցադրել. Երբ առաջին այցելութիւնը կամ վերայցելութիւն մը կ’ընէք, փոխանակ տանտիրոջ պարզապէս ուսումնասիրութիւն մը առաջարկելու, կրնաք ցուցադրել թէ Աստուածաշունչի ուսումնասիրութեան դասընթացք մը ի՛նչպէս կը կատարուի։ Ասիկա «ուսումնասիրութիւն» բառին պատճառած խորհրդաւոր մտավախութենէն պիտի ձերբազատէ տանտէրներէն շատերը։ Անգամ մը որ սորվինք ցուցադրել զայն, պիտի տեսնենք որ պարզ բացումով մը, ուղղակի ուսումնասիրութեան կրնանք անցնիլ։

⁴ Բանալին՝ Պատրաստութիւնն Է. Աստուածաշունչի ուսումնասիրութիւններ սկսելու մեր խանդավառութիւնը, ուղղակիօրէն մեր որքանով լաւ պատրաստուած ըլլալուն հետ առնչուած է։ Նախապատրաստութիւնը մեզի պիտի օգնէ, Աստուածաշունչի ուսումնասիրութեան գործին մասնակցելու նկատմամբ մեր ունեցած որեւէ վարանում յաղթահարելու։ Մեր ներկայացումը կրկին անգամ փորձելով, պիտի կարենանք զայն խօսակցական ձեւով ներկայացնել, բնական կերպով արտայայտուիլ, մեր անձնական բառերով։ Ասիկա ոչ միայն մեզ, հապա տանտէրն ալ հանգիստ վիճակի մէջ պիտի պահէ։

⁵ Երբ ցուցադրութեան համար փորձեր կ’ընէք, ժամանակը նկատի առէք, որպէսզի տանտիրոջ իմացնէք թէ որքան ժամանակ պիտի առնէք ուսումնասիրութիւնը ցուցադրելու համար։ Ինքզինք ներկայացնելէ ետք, եղբայր մը կ’ըսէ. «Եկած եմ ձեզի ցոյց տալու Աստուածաշունչի ձրի ուսումնասիրութեան մեր յայտագիրը։ Զայն ցուցադրելը շուրջ հինգ վայրկեան կ’առնէ։ Կրնա՞ք հինգ վայրկեան տրամադրել»։ Ի՛նչ կը Պահանջէ գրքոյկին առաջին դասը կրնայ շուրջ հինգ վայրկեանի մէջ ցուցադրուիլ։ Անշուշտ տրամադրուած այս ժամանակին մէջ, միայն ընտրուած համարներ կրնան կարդացուիլ. առաջին դասը մի քանի վայրկեանի մէջ վերջացնելով, տանտէրը իր ուսումնասիրութեան առաջին փորձառութիւնը կ’ունենայ։ Ապա, զինք տեղեակ պահեցէք որ երբ վերադառնաք 2–րդ դասը ուսումնասիրելու համար միայն 15 վայրկեան պիտի առնէք։

⁶ Հետեւեալ ներկայացումը ազդու եղած է.

◼ «Կ’ուզեմ ձեզի ցուցադրել շատ պարզ եւ արագ Աստուածաշունչի տան ուսումնասիրութեան կերպ մը, Աստուած Ի՛նչ կը Պահանջէ Մեզմէ այս գրքոյկով։ Շատեր շաբաթական 15 վայրկեան տրամադրելով, 16 շաբթուան մէջ Աստուածաշունչի այս կարեւոր հարցումներուն պատասխանները առած են»։ Հակիրճօրէն նիւթերու ցանկը ցոյց տուէք։ Առաջին դասին դառնալով ըսէք. «Եթէ մեզի շուրջ հինգ վայրկեան տրամադրէք, ձեզի ցոյց պիտի տանք որ ասիկա ի՛նչպէս տեղի կ’ունենայ։ Առաջին դասին վերնագիրն է ‘Ինչպէս Կրնաք Գիտնալ Թէ Աստուած Ի՛նչ կը Պահանջէ Մեզմէ’»։ Ապա կարդացէք երեք հարցումները եւ փակագծի մէջ առնուած թուանշաններուն մասին բացատրութիւն տուէք։ Առաջին պարբերութիւնը կարդացէք եւ ցոյց տուէք տանտիրոջ, թէ ի՛նչպէս պատասխանը կրնայ գտնել։ Կրնաք տանտիրոջմէ խնդրել որ 2–րդ պարբերութիւնը կարդայ։ Ապա ըսէք. «Այս տեղեկութեան վրայ հիմնուելով, ի՞նչպէս կը պատասխանէք այս հարցումին։ [Հարցումը դարձեալ կարդացէք եւ թոյլ տուէք որ տանտէրը մեկնաբանէ։] Պիտի նշմարէք որ ամէն պարբերութեան հետ համարներ կցուած են։ Ասոնք մեր ուշադրութիւնը, այս հարցումներու նկատմամբ Աստուածաշունչի պատասխաններուն կ’ուղղեն։ Օրինակի համար, կարդանք Բ. Տիմոթէոս 3։16, 17 եւ տեսնենք թէ Աստուածաշունչի հեղինակին առնչութեամբ ձեր տուած պատասխանին թիկունք կը կանգնի՝ կամ ոչ»։ 3–րդ պարբերութիւնը կարդալէ, հարցումը նկատի առնելէ եւ Յովհաննու 17։3–ը կարդալէ ետք, տանտիրոջ ուշադրութիւնը ուղղեցէք առաջին դասը վերաքաղ ընելով իր ձեռք ձգած տեղեկութեան վրայ։ Անկէ վերջ 2–րդ դասին կրնաք անցնիլ եւ կարդալ վերջին հարցումը՝ «Աստուծոյ մասին ո՞ր երկու կերպերով կրնանք սորվիլ»։ Ետքը հարցուցէք. «Ե՞րբ 15 վայրկեան կրնաք տրամադրել որպէսզի 2–րդ դասը նկատի առնենք եւ պատասխանը գտնենք»։

⁷ Շատ կարեւոր է խօսակցութիւնը պարզ պահել եւ երբ կարելի է՝ գովել տանտէրը։ Երբ յաջորդ այցելութեան համար կարգադրութիւններ կ’ընէք, փոխանակ հարցնելու թէ կը փափաքի՞ ուսումնասիրութիւնը շարունակել, պարզապէս քաջալերեցէք որ այս կերպով ընէ յաջորդ դասը։ Ըսէք որ կը փափաքիք իրեն վերայցելել։ Կարգ մը հրատարակիչներ առաջարկած են հեռաձայնով դաս մը վարել, երբ այլապէս յայտագրելը դժուար ըլլայ։ Կրնաք աշակերտը քաջալերել որ գրքոյկը ապահով, յարմար տեղ մը դնէ, որ յաջորդ այցելութեան համար ձեռքին տակ ըլլայ։

⁸ Վճռակամ Եղէք. Մինչ յաջողելու բանալին պատրաստութիւնն է, սակայն վճռակամ պէտք է ըլլանք յարատեւելու։ Մի քանի վայրկեանի մէջ դաս մը վարելը մարտահրաւէր մը կրնայ ըլլալ, ուրեմն վճռեցէք ներկայացումը հարկ եղածին չափ յաճախ փորձելու, որպէսզի սահունութեամբ ցուցադրէք զայն։ Ուսումնասիրութեան ներկայացումը փորձեցէք ցուցադրել ձեզի հանդիպող ամէն անձի՝ դռներուն առջեւ, անպաշտօն կերպով, ինչպէս նաեւ՝ հեռաձայնով վկայելու ատեն։ Եթէ դժուարութիւն ունիք Աստուածաշունչի ուսումնասիրութիւն մը սկսելու, մի յուսահատիք։ Աստուածաշունչի ուսումնասիրութիւն մը սկսելու յաջողութիւնը, վճռակամութիւն եւ ճշմարտութիւնը ուրիշներուն հետ բաժնելու անկեղծ փափաք մը կը պահանջէ։—Գաղ. 6։9

⁹ Այս թելադրութիւնները կիրարկելով, դուք ալ առանձնաշնորհումը կրնաք ունենալ անհատի մը օգնելու, որ կեանքի ճամբուն մէջ առաջնորդուի, Ի՛նչ կը Պահանջէ գրքոյկով Աստուածաշունչի ուսումնասիրութիւն մը սկսելով եւ վարելով։—Մատթ. 7։14