Ուսումնասիրութիւններ Սկսելու Համար Նոր Գործիք մը Ունինք

¹ Ամերիկացի կինը թունդ Կաթողիկէ մըն էր։ Ան հաւատարմօրէն կը պաշտպանէր իր եկեղեցիին ուսուցումները։ Ան նոյնիսկ ուխտագնացութիւն մը կատարած էր դէպի Վատիկան։ Այսուհանդերձ, երբ Եհովայի Վկաներէն մէկը իր դուռը զարկաւ, ան տան սուրբ գրային ուսումնասիրութեան մը առաջարկը ընդունեց։ Ինչո՞ւ։ Քանի որ կ’ուզէր գիտնալ թէ Աստուածաշունչը ի՛նչ կ’ըսէ, իսկ իր եկեղեցին տան սուրբ գրային ուսումնասիրութիւն մը չէր առաջարկեր։ Այս փորձառութիւնը ի՞նչ կը սորվեցնէ մեզի։ Թէ՝ չենք գիտեր թէ ո՞վ հաւանաբար Աստուածաշունչի ձրի ուսումնասիրութիւն մը պիտի ընդունի։—Ժող. 11։6

² Երբեք վարանա՞ծ էք մարդոց ըսելու թէ պատրաստ ենք հետաքրքրուած ոեւէ անհատի հետ Աստուածաշունչը ուսումնասիրելու։ Ձեր շրջանակին մէջ ամէն ոք գիտէ՞ որ այս ձրի ծառայութիւնը կը մատուցանենք։ Ի՞նչպէս կրնանք վստահ ըլլալ։ Նոր գործիք մը օգտագործելով։ Անիկա վեց էջնոց գրաւիչ թերթիկ մըն է, Կը Փափաքէի՞ք Աստուածաշունչին Մասին Աւելին Գիտնալ խորագրով։ Ծանօթանանք այս թերթիկին, ենթագլուխ առ ենթագլուխ։

³ Ինչո՞ւ Կարդալ Աստուածաշունչը. Թերթիկին տուած պատճառները սրտին կը խօսին։ Անիկա կը բացատրէ թէ Աստուածաշունչը «Աստուծոյ սիրալիր խրատներ»ը կը պարունակէ, ցոյց տալով թէ ի՛նչպէս կրնանք աղօթքով իրեն մօտենալ օգնութեան համար եւ ի՛նչպէս յաւիտենական կեանքի իր պարգեւը ստանալ։ (Ա. Թես. 2։13) Թերթիկը կ’ակնարկէ Աստուածաշունչի զանազան ‘ճշմարտութիւններու, որոնք մեզ կը լուսաբանեն’, ինչպէս՝ մեռնելէն ետք ի՛նչ կը պատահի մեզի եւ ինչո՛ւ այսքան շատ դժուարութիւն կայ երկրի վրայ։ Անիկա կը նկարագրէ «Աստուածաշունչի մէջի աստուածային սկզբունքները», որոնք եթէ կիրարկուին, ֆիզիքական օգուտներ կը բերեն եւ ուրախութիւն, յոյս ու այլ ցանկալի յատկութիւններ կը մշակեն։ Թերթիկը կ’ակնարկէ Աստուածաշունչը կարդալու յաւելեալ պատճառի մը՝ ապագային մասին մարգարէութիւններ, որոնք ցոյց կու տան թէ շուտով ի՛նչ տեղի պիտի ունենայ։—Յայտ. 21։3, 4

⁴ Աստուածաշունչը Հասկնալու Օգնութիւն. Թերթիկը կ’ըսէ. «Բոլորս ալ օգնութեան պէտք ունինք Աստուծոյ Խօսքը հասկնալու համար»։ Ապա կը նկարագրէ Աստուածաշունչը ուսումնասիրելու մեր մեթոտը. «Սովորաբար, նախընտրելի է Աստուածաշունչը ուսումնասիրել աստիճանաբար, սկսելով հիմնական ուսուցումներէն»։ Մինչ յստակ կը դարձնէ թէ «Աստուածաշունչը բացարձակ հեղինակութիւնն է», թերթիկը յատկապէս կը յիշէ Ի՛նչ կը Պահանջէ գրքոյկը, որպէս բան մը որ պիտի օգնէ աշակերտին ‘այլազան նիւթերու շուրջ Սուրբ Գրքին տեսակէտը հասկնալու’։ Յաջորդ ենթագլուխը ուշագրաւ հարցում մը կը յարուցանէ։

⁵ Յօժա՞ր Էք Ամէն Շաբաթ Ժամանակ Տրամադրել՝ Աստուածաշունչը Հասկնալու Համար. Թերթիկը կը բացատրէ թէ Աստուածաշունչի ուսումնասիրութիւն մը կրնայ կարգադրուիլ, աշակերտին յարմար եղող ժամու մը եւ վայրի մը մէջ, իր տան մէջ կամ նոյնիսկ հեռաձայնով։ Որո՞նք կրնան խօսակցութեան մասնակցիլ։ Թերթիկը կը պատասխանէ. «Ձեր ամբո՛ղջ ընտանիքը։ Կրնաք հրաւիրել ոեւէ բարեկամ, որ կ’ուզէ մասնակցիլ։ Կամ՝ եթէ կը փափաքիք, խօսակցութիւնը միայն ձեզի հետ կարելի է ունենալ»։ Անհատը որքա՞ն ժամանակ պէտք է տրամադրէ ուսումնասիրութեան։ Թերթիկը կը բացատրէ. «Շատեր շաբաթը ժամ մը կը տրամադրեն Աստուածաշունչը ուսումնասիրելու համար։ Որեւէ շաբաթ որ կարելիութիւն ունենաք աւելի ժամանակ տրամադրելու, կամ ձեր ժամանակը սահմանափակ ըլլայ, Վկաները պատրաստ պիտի ըլլան ձեզի յարմարելու»։ Հո՛ս է բանալին։ Պատրաստ ենք իւրաքանչիւր աշակերտի պարագաներուն յարմարելու։

⁶ Սորվելու Հրաւէր մը. Կտրօն մը հայթայթուած է, որուն միջոցաւ թերթիկը ստացողը կրնայ խնդրել Ի՛նչ կը Պահանջէ գրքոյկը կամ այցելութիւն մը, որպէսզի բացատրենք տան սուրբ գրային ձրի ուսումնասիրութեան մեր յայտագիրը։ Ի՛նչ կը Պահանջէ գրքոյկին գունաւոր կողքը ցուցադրուած է։ Չէ՞ք նկատեր թէ ինչո՛ւ այս թերթիկը պիտի քաջալերէ աւելի մեծ թիւով պարկեշտ սիրտ ունեցող անհատներ, որ մեր օգնութիւնը ընդունին։ Այժմ, ի՞նչպէս կրնանք այս նոր գործիքը լաւագոյն կերպով գործածել։

⁷ Այս Թերթիկը Որո՞ւ Կրնաք Ներկայացնել. Թերթիկը կրնաք ուղղակի անհատներու ներկայացնել, կամ՝ տունը չեղողներուն օրինակ մը ձգել։ Անիկա կարելի է բաշխել տունէ տուն, փողոցը եւ առեւտրական թաղամասերու մէջ։ Զայն ներկայացուցէք մարդոց, անոնք մեր գրականութիւնները ընդունին կամ ոչ։ Զայն դրէք ձեր տեղաւորած պարբերաթերթերուն կամ այլ գրականութիւններուն մէջ։ Երբ նամակներ կը գրէք, զայն ներփակեցէք։ Առաջարկեցէք զայն թղթատարական միջոցով ղրկել անոնց, որոնց հետ հեռաձայնով շփման մէջ կու գաք։ Միշտ ձեր հետ օրինակներ ունեցէք, զանոնք բաշխելու համար, երբ գնում կ’ընէք, հանրային փոխադրամիջոցը կը գործածէք, եւ անպաշտօն կերպով կը վկայէք։ Ձեր դուռը զարնող ոեւէ անհատի տուէք զայն։ Թերթիկը առաջարկեցէք ձեր ազգականներուն, դրացիներուն, գործակիցներուն, դասընկերներուն, եւ այլ ծանօթներու։ Ջանացէք այս թերթիկը ձեր հանդիպած բոլոր անհատներուն ներկայացնել։ Անկէ ետք ի՞նչ։

⁸ Եթէ Ընդառաջումը Անմիջական Է. Ոմանք անմիջապէս պիտի ընդառաջեն, ըսելով թէ կ’ուզեն Աստուածաշունչը ուսումնասիրել։ Հետեւաբար, երբ դաշտի ծառայութեան կը մասնակցիք, վստահ եղէք որ ձեր հետ միշտ Ի՛նչ կը Պահանջէ գրքոյկէն երկու օրինակ ունիք. մէկը՝ աշակերտին, իսկ միւսը՝ ձեզի համար։ Եթէ անհատը յօժար է, տեղւոյն վրայ ուսումնասիրութիւնը սկսեցէք։ Ներսի կողքը բացէք, եւ կարդացէք՝ «Ինչպէս Գործածել Այս Գրքոյկը»։ Ապա անմիջապէս անցէք Դաս 1–ին, եւ ուսումնասիրութիւնը ցուցադրեցէք։ Ասկէ դիւրին բան կա՞յ։

⁹ Եթէ Ձեր Ունկնդիրը Ասոր Մասին Մտածելու Համար Ժամանակի կը Կարօտի. Շատ ժամանակ չանցած, ջանացէք դարձեալ իր հետ կապ պահել։ Երբ ասիկա ընէք, վստահ եղէք որ ձեր հետ Ի՛նչ կը Պահանջէ գրքոյկը ունիք։ Անոր ցոյց տուէք ներսի կողքին վրայ գտնուած բովանդակութեան ցանկը։ Թոյլ տուէք որ ընտրէ այն նիւթը որ կը թուի թէ ամենէն աւելի կը հետաքրքրէ զինք։ Բացէք զայն, եւ սկսեցէք իր ընտրած դասը նկատի առնել։

¹⁰ Վերադարձէք Այն Անհատներուն՝ Որոնց Պարբերաթերթեր Տուած Էք. Եթէ պարբերաթերթերուն հետ այս թերթիկն ալ տուած էիք, կրնաք վերադառնալ, գործածելով հետեւեալ մօտեցումը. «Անցեալ այցելութեան, ձեզի Դիտարան պարբերաթերթէն օրինակ մը տուի։ Թերեւս նկատեցիք որ այս պարբերաթերթին լման անունն է՝ Դիտարան՝ Կը Ծանուցանէ Եհովայի Թագաւորութիւնը։ Այսօր ձեզի կ’ուզեմ բացատրել թէ այս Թագաւորութիւնը ի՛նչ է եւ անիկա ի՛նչ պիտի նշանակէ ձեզի եւ ձեր ընտանիքին համար»։ Ապա Ի՛նչ կը Պահանջէ գրքոյկին 6–րդ դասը բացէք։ Առաջին պարբերութենէն սկսելով, նիւթը կարդացէք եւ քննարկեցէք, տանտիրոջ ժամանակին ներած չափով։ Անկէ ետք կարգադրութիւններ ըրէք ուրիշ օր մը վերադառնալու եւ դասը ամբողջացնելու համար։

¹¹ Թերթիկներէն Մի՛շտ Քանակ մը Ունեցէք Ձեզի Հետ. Ծառայութեան տեսուչը եւ գրականութիւններուն հոգ տանող եղբայրները պիտի ուզեն Աստուածաշունչը Գիտնալ թերթիկէն միշտ բաւարար քանակ մը ունենալ ժողովքին մէջ։ Անկէ քանակ մը ունեցէք ձեր գրպանը կամ դրամապանակին մէջ, ինքնաշարժին մէջ, գործատեղին, դպրոցը, ձեր տան մուտքին մօտ. հո՛ն ուր ձեռքի տակ է։ Անշուշտ, ձեր ծառայութեան պայուսակին մէջ ալ քանակ մը ունեցէք, որպէսզի զայն գործածէք երբ հանդիպիք անհատի մը, որու հետ կրնաք Աստուածաշունչին մասին խօսակցիլ։

¹² Թող որ Եհովան Օրհնէ Մեր Ջանքերը. Բոլոր Քրիստոնեաներուն փափաքելի մէկ նպատակակէտն է՝ ճշմարտութիւնը ուրիշի մը սորվեցնել։ (Մատթ. 28։19, 20) Ներկայիս տան սուրբ գրային ուսումնասիրութիւն մը կը վարէ՞ք։ Եթէ այո, կրնա՞ք ձեր շաբաթական յայտագրին մէջ ուրիշ ուսումնասիրութեան մը համար ժամանակ գտնել։ Եթէ ներկայիս ուսումնասիրութիւն մը չէք վարեր, վստահաբար կ’ուզէք ասիկա ընել։ Եհովայի աղօթեցէք որ ձեր ջանքերը օրհնէ, գտնելու համար անհատ մը, որու հետ կրնաք ուսումնասիրել։ Ապա, այդ աղօթքներուն հետ ներդաշնակ գործեցէք։—Ա. Յովհ. 5։14, 15

¹³ Աստուածաշունչի ուսումնասիրութիւններ սկսելու համար նոր գործիք մը ունինք։ Անոր քաջածանօթ եղէք։ Զայն անվարան բաշխեցէք։ Ամէն ջանք թափեցէք ‘բարիք գործելու, բարի գործերով հարստանալու, առատաձեռն ըլլալու, պատրաստ ըլլալու որ բաժնէք’ Աստուծոյ Խօսքին մասին ձեր սորված բաները։—Ա. Տիմ. 6։18, ՆԱ

[Շրջանակ՝ էջ 4]

ԹԵՐԹԻԿԸ ԲԱՇԽԵԼՈՒ ՊԱՏԵՀՈՒԹԻՒՆՆԵՐ

◼ Ամէնօրեայ– խօսակցութիւններու միջոցին

◼ Երբ անհատ մը մեր գրականութիւնները կ’ընդունի

◼ Երբ տունը մէկը չկայ

◼ Երբ վերայցելութիւններ կ’ընենք

◼ Երբ փողոցի վկայութեան ընթացքին մէկու մը կը հանդիպինք

◼ Երբ առեւտրական թաղամասի մը մէջ կը վկայենք

◼ Երբ անպաշտօն վկայութիւն կ’ընենք

◼ Երբ նամակներ կը գրենք

◼ Երբ հանրային փոխադրամիջոց մը կը գործածենք

◼ Երբ անհատ մը մեր դուռը կը զարնէ

◼ Երբ կը խօսակցինք ազգականներու, դրացիներու, գործակիցներու, դասընկերներու, եւ այլ ծանօթներու հետ