‘Ամէն բարի գործերու պատրաստ եղիր’
1 Երբ Յիսուս քարոզչական նոր արշաւ մը սկսաւ, ան իր աշակերտները պատրաստելու համար ժամանակ տրամադրեց։ (Մատ. 10։5-14) Թէեւ բոլորս ալ զբաղած ենք, սակայն դռնէ դուռ ծառայութեան մասնակցելէ առաջ նոյնիսկ քանի մը վայրկեան նախապատրաստուիլը մեզի պիտի օգնէ որ ընտիր արդիւնքներ ձեռք ձգենք։—Բ. Կոր. 9։6
2 Ի՛նչպէս պատրաստուիլ. Լաւ նախապատրաստութիւնը կը սկսի մեր ներկայացնելիք հրատարակութեան քաջածանօթ ըլլալով։ Նաեւ պէտք է մտածենք թաղամասին մէջ գտնուող մարդոց մասին։ Անոնք ի՞նչ նիւթերով հետաքրքրուած են։ Կրօնական ի՞նչ ենթահող ունեցող անհատներու կրնանք հանդիպիլ։ Գաղափարներ ձեռք ձգելու համար, կրնանք Մեր Թագաւորութեան ծառայութիւնը թերթիկին եւ Սուրբ Գրութիւններով պատճառաբանել գրքին մէջ գտնուող ներկայացումի նմոյշները աչքէ անցընել։
3 Ծառայութեան Ժողովին ներկայացուած ցուցադրութիւնները ուշադրութեամբ մտիկ ընելն ալ մեզի պիտի օգնէ։ Մինչ մեր ներկայացումը գործածելու մէջ փորձառութիւն ձեռք կը ձգենք, պատրաստուելու համար նուազ ժամանակ պիտի յատկացնենք։ Սակայն ամէն անգամ որ ծառայութեան պիտի ուղղուինք, եթէ մեր խօսելիքին մասին քիչ մը մտածենք եւ մեր ներկայացումները շարունակ բարելաւենք, աւելի ազդու պիտի ըլլանք։ Նաեւ պէտք է ստուգենք որ մեր վկայութեան պայուսակը հարկ եղած պիտոյքները կը պարունակէ։
4 Ի՞նչ բան մեզի պիտի օգնէ մեր ներկայացումը յիշելու։ Բարձրաձայն փորձ ընելը մեր խօսելիքը մեր մտքին մէջ դրոշմելու կերպ մըն է։ Ոմանք հաճոյք կ’առնեն իրենց ընտանեկան ուսումնասիրութեան ընթացքին փորձի նիստեր ունենալով։ Ուրիշներ օգտակար կը գտնեն իրենց ներկայացումը հակիրճօրէն բացիկի մը վրայ գրել եւ դրան մօտենալէ առաջ անոր վրայ ակնարկ մը նետել։
5 Ինչո՛ւ օգտակար է. Լաւ պատրաստուած ըլլալը ծառայութեան մէջ մեր ազդուութիւնը եւ ուրախութիւնը կ’աւելցնէ։ Անիկա մեզի կ’օգնէ հանգիստ զգալու եւ դրան առջեւ նուազ ջղագրգիռ ըլլալու։ Կարող կ’ըլլանք տանտիրոջ աւելի ուշադրութիւն ընծայելու, փոխանակ մտահոգուելու թէ ի՛նչ պիտի ըսենք։ Ասկէ զատ, հրատարակութեան քաջածանօթ ըլլալը մեզի պիտի օգնէ զայն ներկայացնելու ժամանակ աւելի խանդավառ ըլլալու։
6 Սուրբ Գրութիւնները մեզ կը յորդորեն որ ‘ամէն բարի գործերու պատրաստ գտնուինք’։ (Տիտ. 3։1) Բարի լուրը քարոզելէն աւելի լաւ գործունէութիւն մը կա՞յ։ Լաւ պատրաստուած ըլլալով, թէ՛ մեզի մտիկ ընող տանտիրոջ եւ թէ մեր ներկայացուցած Աստուծոյն՝ Եհովայի հանդէպ յարգանք ցուցաբերած կ’ըլլանք։—Եսա. 43։10