Յաւիտեան Ապրիլ Գրքին Հանդէպ Հետաքրքրութիւն Մշակենք
1 Երբ մարդոց կ’այցելենք իրենց տուները, սովորաբար կը նկատենք որ «աշխարհիս զբաղմունքներ»ուն միջամուխ եղած են։ (Մար. 4։19) Միտքը գրգռող ներկայացումով մը անոնց հետաքրքրութիւնը գրաւելու մարտահրաւէրը կը դիմագրաւենք։ Ընդհանուր առմամբ, մարդոց մեծամասնութիւնը քիչ կը հետաքրքրուին մեր ըսելիքով։ Եթէ կրնանք իրենց կեանքին ազդող բան մը ըսել, թերեւս որոշ հետաքրքրութիւն շարժենք Թագաւորութեան պատգամին հանդէպ։ Խօսակցութիւններ սկսելու բանալին է ընտրել ուշագրաւ խօսակցական կէտեր Յաւիտեան Ապրիլ գրքէն, զոր ի մտի ունինք տեղաւորելու վերայցելութեան ատեն։ Ի՞նչ կրնանք ըսել։
2 Կրնաք այս մօտեցումը գործածել.
◼ «Եթէ կարողութիւնը ունենայիք, ներկայիս ո՞ր նեղիչ խնդիրը պիտի լուծէիք։ [Թոյլ տուէք որ պատասխանէ, եւ եթէ յարմար է, ընդունեցէք որ շատ մը մարդիկ նոյն կերպով կը մտածեն։] Մինչեւ հիմա, կը թուի որ աշխարհի առաջնորդները քիչ յաջողութիւն ունեցած են ներկայ շատ մը շփոթեցուցիչ խնդիրներուն լուծում մը գտնելու մէջ։ Բայց Մէկը կայ որ կրնայ ու վերջ մը պիտի դնէ մարդկութիւնը վշտացնող բոլոր խնդիրներուն։ Հաճեցէք նկատել ինչ որ ըսուած է Սաղմոս 145։16–ին մէջ։ [Համարը կարդացէք, եւ ի մտի ունեցէք 11-13–րդ էջերուն մէջ եղած պատկերները, զորոնք ցոյց պիտի տաք վերայցելութեան ատեն։] Բայց ասիկա ե՞րբ տեղի պիտի ունենայ»։ Բացատրեցէք որ գիրք մը կայ որ այս հարցումին կը պատասխանէ, եւ եթէ հետաքրքրութիւն կայ, խոստացէք գիրքը բերել։
3 Կամ կրնաք ասոր նման բան մը ըսել.
◼ «Թերեւս գիտէք այն պարապութեան զգացումը որ կ’ընկերանայ սիրելի մը մահով կորսնցնելուն հետ։ Հաւանաբար անիկա պատճառ կ’ըլլայ որ տխրիք ու զգաք թէ անօգնական էք։ Արդեօք հարց տուա՞ծ էք թէ ի՛նչ կը պատահի երբ անհատ մը կը մեռնի։ [Թոյլ տուէք որ պատասխանէ, ապա կարդացէք Ժողովողի 9։5, 10։] Կրնաք քաջալերուիլ գիտնալով որ Աստուածաշունչը մեռեալներուն հաստատ յոյս մը կը վերապահէ։ [Կարդացէք Յովհաննու 5։28, 29։] Աստուածաշունչը մեզի կ’օգնէ որ հասկնանք մեռեալներուն վիճակը եւ ապագային նկատմամբ ի՛նչ յոյս կայ»։ Ամփոփօրէն կէտեր յիշեցէք 8 եւ 20–րդ գլուխներէն։ Եթէ թուի որ հետաքրքրութիւն կայ, տանտիրոջ խոստացէք Յաւիտեան Ապրիլ գիրքը բերել։
4 Մեծ հաւանականութիւն կայ որ առիթներ պիտի ունենաք անպաշտօն կերպով վկայելու։ Ուստի, կրնաք ձեր յատուկ բառերով ասոր նման բան մը ըսել.
◼ «Այսօր աշխարհը խնդիրներով լեցուն է, եւ անկասկած դուք ալ անոնցմէ մաս մը ունիք։ Ցաւօք սրտի, կը թուի որ անմեղները ամենէն շատ կը տառապին։ Կը խորհի՞ք որ Աստուած վերջ մը պիտի դնէ բոլոր տառապանքներուն։ [Թոյլ տուէք որ պատասխանէ։] Նկատի առնենք ինչ որ Աստուած կը խոստանայ ընել իրեն ծառայողներուն համար։ [Կարդացէք Սաղմոս 37։40, ապա Յաւիտեան Ապրիլ գրքին 99–րդ էջը բացէք։] Այս գիրքը կը բացատրէ թէ Աստուած ինչո՛ւ թոյլատրած է ամբարշտութիւնը եւ ինչպէ՛ս վերջ մը պիտի դնէ անոր»։
5 Եթէ պատանի հրատարակիչ մըն էք, կրնաք այս ներկայացումը գործածել հարց տալով.
◼ «Կը փափաքի՞ք խաղաղ աշխարհի մը մէջ ապրիլ։ [Թոյլ տուէք որ պատասխանէ։] Ասիկա հիմնուած է Աստուծոյ Խօսքին՝ Աստուածաշունչին՝ մէջ նշուած խոստումի մը վրայ։ [Կարդացէք Եսայեայ 9։6, 7։] Աստուածաշունչը կրնայ ձեզի օգնել որ ա՛լ աւելի սորվիք Աստուծոյ խոստումին մասին թէ ամբողջ երկրագունդը դրախտի մը պիտի վերածէ։ Անիկա կենսապահ տեղեկութիւններ կը բովանդակէ եւ զինք կարդալու տրամադրուած ժամանակը կ’արժէ»։—Յովհ. 17։3
6 Երբ կը ծրագրէք վերայցելութեան մը ատեն գիրքը ներկայացնել, արթնամիտ եղէք ձեր ունկնդիրներուն ուշադրութեան յանձնելու անոնց պատեհութիւնը նուիրատուութիւն ընելու անոր համար։