Յաջող Վերայցելութիւնները Ազդեցիկ Ուսուցում Կը Պահանջեն
1 Վերայցելութիւնները մեր դաշտի ծառայութեան կարեւոր եւ ուրախ մաս մըն են։ Ինչո՞ւ ժրաջան պէտք է ըլլանք հետաքրքրուողներուն այցելելու։ Եհովայի անունը կը ճանչցուի եւ կը մեծարուի աշակերտելու այս գործով, եւ աստուածավախ անհատները օգնութիւն կը ստանան կեանքի ճամբան գտնելու։ (Բ. Կորն. 2։17–3։3) Գիտակցիլը որ թէ՛ Եհովայի անուան սրբացուիլը եւ թէ ուրիշներու կեանքերը պարփակուած են, պէտք է մղէ մեզ որ լաւ պատրաստուինք վերադառնալէ առաջ։
2 Լաւ ուսուցանող մը պիտի օգնէ աշակերտին որ շինէ այն հիմին վրայ որ արդէն դրուած է։ Ինչպէս որ դպրոցի ուսուցիչ մը կը շինէ այն գիտութեան վրայ զոր աշակերտները օրէ օր ձեռք կը ձգեն, մենք պէտք է սովորաբար հետեւինք մեր առաջին այցելութեան, յաւելեալ մեկնաբանութիւններ ընելով նոյն նիւթին մասին։ Ասիկա կը նպաստէ գաղափարին շարունակութեան եւ յառաջդիմական մտածելակերպին։
3 Երբ կը վերադառնաս «Աստուած Իրապէս կը Հոգա՞յ Մեզի» գրքոյկը տեղաւորելէ ետք, կրնաս ասիկա ազդեցիկ գտնել.
◼ «Անցեալ այցելութեանս, խօսակցեցանք Աստուածաշունչին մէջ յիշուած ‘վերջին օրեր’ուն մասին եւ թէ ատիկա ի՛նչ կը նշանակէ մեզի համար։ Թերեւս հարց կու տաս թէ ինչպէ՞ս գիտենք որ վերջին օրերուն մէջ կ’ապրինք։ (Բ. Տիմ. 3։1) Յիսուսի աշակերտները անհամբեր էին այդ հարցումին պատասխանը առնելու համար։ [Կարդա Մատթէոս 24։3։] Իր պատասխանին մէջ, Յիսուս նկարագրեց վիճակներ զորս այսօր մեր շուրջը կը տեսնենք։ Ասոնք կը պարփակեն աննախընթաց նեղութիւն եւ բռնութիւն»։ Ցոյց տուր նշանին այն երեսակը որ նկատի առնուած է 19–րդ էջին 3 եւ 4–րդ պարբերութիւններուն մէջ։ Եթէ ընդառաջումը նպաստաւոր է, ցոյց տուր նշանին ուրիշ երեսակները 20–րդ էջի 5–8–րդ պարբերութիւններուն մէջ։ Առաջարկէ վերադառնալ եւ գրքոյկին սկիզբը յարուցուած հարցումներուն պատասխանել։
4 «Ի՞նչ Է Կեանքին Նպատակը» գրքոյկին նկատմամբ յայտնաբերուած հետաքրքրութիւնը մշակելու համար, կրնաս ըսել.
◼ «Անհամբեր էի վերսկսելու մեր խօսակցութիւնը կեանքի նպատակին մասին։ Կը խորհիմ որ երկուքս ալ կը համաձայնինք թէ Աստուած մտադրած էր որ այս երկրի վրայ ապրինք ուրախ եւ խաղաղ պայմաններու տակ, փոխանակ ներկայ տառապանքին ներքեւ։ Կը խորհի՞ս որ ան պիտի կատարէ իր խոստումը»։ Թոյլ տուր որ պատասխանէ։ Կարդա Եսայեայ 55։11–ը, եւ ետքը նկատի առ 30–րդ էջի 25–27–րդ պարբերութիւններուն գաղափարները։ Աստուածաշունչի անձնական ուսումնասիրութիւն մը յանձնարարէ որպէս լաւագոյն կերպը կեանքի մէջ արժանի նպատակ մը ունենալու համար։
5 «Երկրի Վրայ Կեանքը Յաւիտեան Վայելեցէ՛ք» գրքոյկին հանդէպ նախապէս ցուցաբերուած հետաքրքրութիւնը մշակելու համար, կրնաս զայն կրկին ցուցադրել եւ ըսել.
◼ «Մենք խօսեցանք այս գրքոյկին կողքին վրայ նկարագրուած գեղեցիկ աշխարհին մասին. կ’ուզեմ քեզի ըսել թէ ինչո՛ւ Յիսուս Քրիստոսի հաւատալը շատ կարեւոր է այն մարդոց որոնք կ’ուզեն հոն ապրիլ»։ Ցոյց տուր 41–րդ պատկերը եւ կարդա Եսայեայ 9։6–ը։ Ակնարկէ 62–րդ պատկերին եւ կարդա Յովհաննու 3։16–ը, շեշտելով հնազանդութեան կարիքը։ Բացատրէ թէ Եհովայի Վկաները մարդոց կ’օգնեն որ սորվին ինչպէս հաւատք ի գործ դնեն, Աստուածաշունչը սերտելով եւ փորձելով ապրիլ անոր խրատներուն համաձայն։
6 Իւրաքանչիւր վերայցելութենէ ետք, վերլուծէ զայն այն նպատակով որ ազդեցիկ ըլլալդ բարելաւես։ Դուն քեզի հարց տուր. Մտքիս մէջ ըսելիք որոշ բան մը ունէի՞։ Ուշադրութիւնը Աստուածաշունչին վրայ կեդրոնացուցի՞։ Առաջին այցելութեան դրուած հիմին վրայ շինեցի՞։ Ներկայացումս ծրագրուա՞ծ էր որ Աստուածաշունչի ուսումնասիրութեան մը առաջնորդէ։ Դրական պատասխանները կը վստահեցնեն թէ կը ջանաս Աստուծոյ Խօսքին լաւ ուսուցանող մը ըլլալ։