Ցորեկ Ու Գիշեր Սրբազան Ծառայութիւն Մատուցանենք

¹ Բացառիկ առանձնաշնորհում մը շնորհուած է մեզի։ Անիկա Եհովայի Վկաներ ըլլալու առանձնաշնորհումն է։ Մենք աւետարանիչներէ բաղկացած համաշխարհային կազմակերպութեան մաս կը կազմենք, զոր Եհովա կը գործածէ Թագաւորութիւնը ծանուցանելու ցայժմ ձեռնարկուած մեծագոյն գործունէութիւնը կատարելու համար։ (Մար. 13։10) Մեր ժամանակներուն ստիպողականութեան ի տես, կարելի եղածին չափ լիովին կը մասնակցի՞նք այս գործին։

² Մենք չենք գիտեր որ մեր քարոզչութեան շնորհիւ տակաւին քանի հոգիներ պիտի ընդառաջեն։ Սակայն Եհովա մեզ կը վստահեցնէ որ անոնք «մեծ բազմութիւն մը» պիտի ըլլան, որոնք բոլորն ալ բնորոշուած են որպէս «իրեն կը ծառայեն ցորեկ ու գիշեր»։ (Յայտ. 7։9, 15) Արդէն իսկ Աստուծոյ ծառայութեան մէջ գործունեայ եղող հինգ միլիոնէ աւելի Վկաները պարզապէս հետաքրքրուած ունկնդիրներ չեն, ոչ ալ՝ միմիայն ժողովներու յաճախողներ։ Անոնք աշխատողներ են, որոնք բարի լուրը համայն աշխարհի մէջ կը ծանուցանեն։

³ Ամէն օր, Եհովան փառաբանելու պատեհութիւններ կան, կա՛մ դաշտի ծառայութեան մէջ եւ կամ անպաշտօն կերպով։ Պահ մը խորհինք այն հսկայ վկայութեան մասին որ կրնայ տրուիլ եթէ մեզմէ ամէն մէկը ամէն օր նախաձեռնութիւնը առնէ ճշմարտութիւնը բաժնելու մի՛միայն մէկ անհատի հետ։ Եհովայի հանդէպ մեր գնահատանքը պէտք է մղէ մեզ որ իր մասին խանդավառութեամբ խօսինք։—Սաղմ. 92։1, 2

⁴ Ուրիշներուն Օգնենք որ Սրբազան Ծառայութիւն Մատուցանեն. Եհովա յաւելումներ պատճառելով կը շարունակէ մեզ օրհնել։ (Անգ. 2։7) Միացեալ Նահանգներու մէջ անցեալ ծառայութեան տարուան ընթացքին, ամէն ամիս միջին հաշուով 568,480 Աստուածաշունչի ուսումնասիրութիւններ վարուեցան։ Այս անհատներուն հետ ուսումնասիրելու մեր նպատակակէտն է անոնց օգնել որ Յիսուսի աշակերտները ըլլան։ (Մատթ. 28։19, 20) Անոնցմէ շատեր ժողովներուն կանոնաւորաբար յաճախելով, արդէն իսկ ընտիր կերպով յառաջդիմած են։ Անոնք «Աստուծոյ մեծամեծ բաներու մասին» իրենց սորվածները սկսած են իրենց ծանօթներուն պատմել։ (Գործք 2։11) Հիմա կրնա՞նք զանոնք հրաւիրել որ հանրային ծառայութեան մասնակցին։

⁵ Ապրիլ ամսուան ընթացքին մասնաւոր ջանք պէտք է թափենք որակելի նորեկներ հրաւիրելու որ մեր հետ դաշտի ծառայութեան մասնակցին։ Աշակերտդ ասիկա ընելու փափաք յայտնա՞ծ է։ Եթէ պարագան այդ է, ան սուրբ գրային պահանջներուն գոհացում կու տա՞յ։ (Տես Մեր Ծառայութիւնը էջ 97–99, Անգլերէնով։) Երբ աշակերտը կը փափաքի դաշտի ծառայութեան մասնակցիլ, վերակացու տեսուչին հետ իր պարագան նկատի առ ու ան կարգադրութիւն պիտի ընէ որ երկու երէցներ հարցը քննեն։ Եթէ աշակերտը որակելի է որ չմկրտուած հրատարակիչ մը ըլլայ, հրաւիրէ զինք որ հետդ դաշտի ծառայութեան մասնակցի։ Ծառայութեան տեսուչները եւ գրքի ուսումնասիրութեան վարիչները յատկապէս ուշադիր պէտք է ըլլան որակելի եղողներուն օգնելու որ Ապրիլին սկսին քարոզել որպէս չմկրտուած հրատարակիչներ։

⁶ Ծնողներ կրնան նկատի առնել որ իրենց զաւակները չմկրտուած հրատարակիչներ ըլլալու որակելի՛ են թէ ոչ։ (Սաղմ. 148։12, 13) Եթէ ձեր զաւակը փափաքի Թագաւորութեան ծառայութեան մէջ իր բաժինը բերել ու ան բարի վարք ունի, կրնաք ծառայութեան յանձնախումբի երէցներէն մէկուն մօտենալ պարագան նկատի առնելու համար։ Ձեր եւ ձեր զաւկին հետ ժողվուելէ ետք, երկու երէցներ պիտի որոշեն թէ ձեր զաւակը որակելի՛ է հրատարակիչ մը ըլլալու կամ ոչ։ Ուրախանալու մասնաւոր պատճառ մը կ’ունենանք երբ երախաներ մեր հետ Աստուած կը փառաբանեն։

⁷ Միայն Եհովա արժանի է մեր սրբազան ծառայութեան։ (Ղուկ. 4։8) Իւրաքանչիւրս զինք «շատ» փառաբանելու սքանչելի առանձնաշնորհումը օգտագործենք։—Սաղմ. 109։30. 113։3