Ձեր Դրացիին Խօսեցէք Ճշմարտութեան Մասին
1 Երկու մեծագոյն պատուիրաններէն մէկն է. «Քու ընկերդ սիրես քու անձիդ պէս»։ (Մատթ. 22։39) Այս սէրը մեզ պիտի մղէ որ մեր դրացիին հետ բաժնենք մեր ունեցած լաւագոյն բանը՝ Աստուծոյ Խօսքին մէջ մեր գտած ճշմարտութիւնը։ Քանի որ Դիտարան ու Զարթի՛ր պարբերաթերթերը Աստուածաշունչի ճշմարտութեան պատգամը կը հաղորդեն, զանոնք Մայիս ամսուան ընթացքին ցրուելը կերպ մըն է որպէսզի ‘մեր դրացիին խօսինք ճշմարտութեան մասին’։—Եփ. 4։25
2 22 Ապրիլ թուակիր «Զարթի՛ր»ը պէտք է ներկայացուի մինչեւ վերջին օրինակը։ Կրնաս ներկայացումդ սա հարցումով սկսիլ.
◼ «Պատերազմէ զերծ աշխարհի մը նկատմամբ ի՞նչ է հակազդեցութիւնդ։ [Թոյլ տուր որ պատասխանէ։] Գիտէի՞ր որ աշխարհի կրօնքները իրապէս պատերազմներ ու սպանութիւն կը խրախուսեն։ [Թոյլ տուր որ պատասխանէ։] Ասոր ճիշդ հակառակը, նկատի առ Աստուածաշունչին ըսածը թէ Աստուծոյ ճշմարիտ երկրպագուները ի՛նչ պիտի ընեն»։ Կարդա Եսայեայ 2։2–4, որ յիշուած է պարբերաթերթին 4–րդ էջին վերի մասը, յետոյ կարդա էջ 10–ի վրայ գտնուող «Կոչ՝ Խաղաղութիւն Սիրողներուն» ենթագլուխին առաջին պարբերութիւնը։ Անկէ ետք հարցուր. «Գիտե՞ս թէ Աստուած ի՛նչպէս պիտի ընէ ասիկա։ Պատասխանը կը գտնուի այս պարբերաթերթին մէջ, եւ ահաւասիկ օրինակդ որպէսզի զայն կարդաս»։
3 Երբ 15 Մայիս թուակիր «Դիտարան»ը կը ներկայացնես, փորձէ մարդոց անապահովութեան զգացում պատճառող վերջերս պատահած դէպքի մը ակնարկել, ապա հարցուր.
◼ «Այս կեանքին մէջ իրապէս ապահով զգալու համար ի՞նչ կը խորհիս որ կը պահանջուի։ [Թոյլ տուր որ պատասխանէ։] Անկեղծօրէն խօսելով, մարդկութեան դիմագրաւած խնդիրներուն լուծման համար, իրապաշտութի՞ւն է մարդոց վստահիլ։ [Թոյլ տուր որ պատասխանէ. յետոյ կարդա Սաղմոս 146։3։] Ապա սաղմոսերգուն ապագային նկատմամբ լաւատես ըլլալու պատճառ կու տայ մեզի։ [Կարդա Սաղմոս 146։5, 6։] Այս յօդուածը՝ ‘Իսկական Ապահովութիւն, Ներկայիս ու Յաւիտեան’՝ կը բացատրէ որ երկրի վրայ աւելի լաւ վիճակներ բերելու համար ինչո՛ւ կրնանք Եհովա Աստուծոյ վստահիլ»։ Առաջարկէ մի քանի պարբերաթերթեր իրեն ձգել ու վերադառնալ քննարկելու համար թէ ի՛նչպէս կարելի է նոյնիսկ ներկայիս ապահով կեանք մը վայելել։
4 22 Մայիս թուակիր «Զարթի՛ր»ի կողքին նիւթը կրնայ մարդոց ուշադրութիւնը գրաւել թէ՛ տունէ–տուն ծառայութեան ատեն եւ թէ առեւտրական թաղամասին մէջ։ Կրնաս զայն ներկայացնել հետեւեալը ըսելով.
◼ «Շատ մը կիներ գործատեղիին մէջ սեռային ձանձրոյթի մղձաւանջին փորձառութիւնը ունեցած են։ Վիճակը ա՛յնքան լուրջ եղած է որ դատարանները սկսած են յանցաւորները պատժել ու զոհ գացողներուն հատուցում ընել։ Ընկերութեան առ ի ծառայութիւն, այս տեղեկագրութիւնը հրատարակած ենք, որ այս նիւթին շուրջ եղած սովորական զրոյցները կը հերքէ։ Նաեւ, անիկա կիներուն եւ այր մարդոց համար գործնական գաղափարներ կը հայթայթէ, թէ ի՛նչպէս իրենք զիրենք պաշտպանեն որպէսզի սեռային ձանձրոյթին զոհ մը չդառնան կամ անով ամբաստանուին։ Կը փափաքի՞ս կարդալ Զարթի՛ր պարբերաթերթին այս թիւը։ [Թոյլ տուր որ պատասխանէ։] Թէեւ մեր պարբերաթերթերը ձրիաբար կը մատուցանենք, սակայն մեր երկրածաւալ գործին համար պզտիկ նուիրատուութիւններ կ’ընդունինք»։
5 Եթէ համառօտ ներկայացում մը կը նախընտրես, կրնաս հետեւեալը փորձել.
◼ «Շատեր կը գիտակցին որ ներկայ ժողովրդական պարբերաթերթերուն մեծամասնութիւնը առեւտրական գործառնութիւնները, սեռը կամ վայրագութիւնը ցցուն կ’ընէ։ [Ցոյց տուր Դիտարանն ու Զարթի՛րը։] Աստուածաշունչի վրայ հիմնուած այս օգտակար պարբերաթերթերը կը ցրուենք։ Անոնք շատ դաստիարակչական են ու մեզի կը սորվեցնեն որ Աստուած պաշտենք, մեր դրացին սիրենք եւ ուղիղ վարք պահպանենք։ Եթէ այս տեսակ նիւթեր ընթերցելը կը նախընտրես, վստահ եմ որ այս թիւերէն հաճոյք պիտի առնես»։
6 Եթէ մեր դրացիներուն նախանձախնդրաբար խօսինք ճշմարտութեան մասին, թերեւս կարենանք շատերուն մեծ ուրախութիւն բերել։—Գործք 8։4, 9