Միօրեայ Մասնաւոր Համաժողովի Նոր Յայտագիր

¹ Սեպտեմբերին սկսող միօրեայ մասնաւոր համաժողովի նոր յայտագրին բնաբանն է՝ «Եհովայէ Սորված Ըլլանք»։ (Յովհ. 6։45) Եհովայէ եկած աստուածային ուսուցումը իրապէս կ’օգնէ մեզի որ գոհացուցիչ կեանք մը վարենք։ Անիկա մեր հոգեւոր ժառանգութեան հանդէպ մեր մէջ խոր գնահատութիւն կը զարգացնէ։ Մեր ջանքերը ուրիշներու օգնելու որ բարի լուրը լսեն, մեզ ընկերութեան պիտանի անդամներ կը դարձնեն։ Այս միօրեայ մասնաւոր համաժողովը ցցուն պիտի ընէ այն օրհնութիւնները զորս Եհովայէ սորված անհատները կը վայելեն։

² Յայտագիրը պիտի հակադրէ աստուածային ուսուցման օգուտները աշխարհային կրթութեան վտանգներուն հետ։ Ա՛լ աւելի յստակօրէն պիտի տեսնենք ինչպէ՛ս Եհովա լաւագոյն կրթութիւնը կը հայթայթէ. կրթութիւն մը որ իր Խօսքին՝ Աստուածաշունչին՝ վրայ հիմնուած է։ Շեշտ պիտի դրուի պաշտամունքի երեք մարզերու վրայ, որոնց մէջ կ’ուրախանանք Աստուծմէ սորվելով։ Ասկէ զատ, պատանիներուն քաջալերութիւն պիտի տրուի որ սուրբ գրային ուշագրաւ տիպարներ ընդօրինակեն, ինչպէս՝ Դաւիթ ու Տիմոթէոս, եւ իրենց կեանքը հոգեւոր գործունէութիւններուն շուրջ կերտեն։ Մեր հաւատքը պիտի զօրանայ մինչ տարեցներուն հաւատարմութիւնն ալ աչքառու կը դարձուի։ Նոր նուիրուած անհատները, որոնք որակելի են, պիտի կարենան մկրտուիլ։ Համաժողովի օրուընէ բաւական առաջ, անոնք այդ փափաքը վերակացու տեսուչին պէտք է յայտնեն։

³ Միօրեայ մասնաւոր համաժողովի գլխաւոր դասախօսութեան խորագիրն է՝ «Եհովայէ կը Սորվինք Իր Կամքը Ընելու Համար»։ Անիկա պիտի շեշտէ թէ ինչո՛ւ բոլորս ալ կարիքը ունինք շարունակ սորվելու, հաւատքին մէջ կայուն ըլլալու եւ միշտ յառաջդիմելու։ Մեզի յորդոր պիտի տրուի որ Եհովան ընդօրինակենք ուրիշներուն սորվեցնելով այն ճշմարտութիւնը որ յաւիտենական կեանքի կ’առաջնորդէ։ Շինիչ փորձառութիւններ պիտի պարփակուին, ցոյց տալու համար թէ ինչպէ՛ս Ընկերութեան գրականութիւնները շատերուն օգնած են որ Եհովայէ սորվին։ Եհովայի երկրածաւալ ուսուցման յայտագրին դրական իրագործումները աչքառու պիտի դարձուին։

⁴ Հաստատ ծրագիրներ ըրէք ներկայ գտնուելու համար։ Բոլոր հետաքրքրուած անհատները քաջալերեցէք որ ներկայ գտնուին։ Հաճոյքով սպասեցէք մեր Մեծ Դաստիարակէն շատ մը ընտիր բաներ սորվիլ։—Եսայ. 30։20, ՆԱ։